Read bura-pabir Ezekiyel 25 Bible Online

Ezekiyel 25 - bura-pabir bible

Ezekiyel 25

¹Antə MTHLAKU ku gari ali ka pəla,

²“Ɓzər mda, thlentə kəma ga təbwar mjir Ammon, ka gə hara naɓikur ata kəra ɗa.

³Pəla ala ɗa ka da psi thləm aka ndərər MTHLAKU na ka Duna ta Shang. Kamnyar I na MTHLAKU na ka Duna ta Shang akwa pəla, akwa sakatə mdə diɓərantə Vəi Ndzəndziyirna na Ɓɗakkarkara, ka namtə tsəɗi Israila tə tsa ndzi fya, ka mwantə mjir Yahuda akwa tsəɗi mafakur, ga ku pəla, ‘Yauwa, ku hara ja!’

⁴Antə apani I ata hamta giri aka mjir raghəi ka da ndzi mthlakər giri. Da ata pwi tentayeri arɗa akwa nca giri, ka da latə kəyayeri arɗa akwa nca giri, ka da səm sur fakər giri, ka da sa uwar giri.

⁵I ata namtə bərni Rabba ka tsa ndzi vəi ɓəla dləkəmauwayeri, kəi namtə tsəɗi mjir Ammon ka tsa ndzi vəi pwi ciɓər təma. Aghəla nda antə giri ata sənda abbər I an MTHLAKU.

⁶Kamnyar I na MTHLAKU na ka Duna ta Shang akwa pəla, təng tə giri ɓu tsiya giri, ka tsa səla giri ata di, ka hara kucali kamnyar ncantə shanga ɗimikur na akwa ɗəffa giri ata kəra tsəɗi Israila,

⁷to, I ata ɗi giri. I ata hamta giri apa su gapani aka mji damwa, apa su tə mdə fata akwa mpa. Antə I ata famta giri kazhar durayeri shang, kəi vu ka thləma giri sha ata kəra duniya. I ata hilantə giri. Antə giri ata sənda abbər I an MTHLAKU.”

⁸Antə I na MTHLAKU na ka Duna ta Shang pəla, “Kamnyar tə Mowab ka Seyir pəla abbər Yahuda an tsu apa bwadukwa tsəɗiyayeri,

⁹to, I ata kəlar nyarfur shanga bərniyayeri na ɓɗakɓɗakta shang akwa tsəɗi ni, apa Beth Yeshimoth, ka Baal Meyon, ka Kiriyathlayim, na ata kəla tsəɗi ni.

¹⁰I ata hamta ni ata kəma duku ka mjir Ammon ka da ndzi akira mjir raghəi. Antə mda aɗi ata jaktə ɗangtə mjir Ammon akwa nca mji kəra wa.

¹¹Tsuwa I ata ɗi Mowab. Antə da ata sənda abbər I an MTHLAKU.”

¹²I na MTHLAKU na ka Duna ta Shang akwa pəla, “Kamnyar tə Edom ku ntəskur ata kəra Yahuda, ka ɓzamtə su na ola atar ntəskur ngəni ata kəra ɗa ni,

¹³to, I na MTHLAKU na ka Duna ta Shang akwa pəla I ata ɗi Edom. I ata kurəmta mjirni ka mwaɓiyirni, kəi namtə ni apa fya. Su na baɗita ahar Teman har ka mwanta ahar Dedan, da ata mtər katsakar akwa mpa.

¹⁴I ata kəthlər ka mjirna Israila ka da ntəskur ata kəra mjir Edom, ka da sənda abbər ɗəffi ku ɓzi. Antə mjir Edom ata səndə jili ntəskur tə I hara ni. I na MTHLAKU na ka Duna ta Shang an pəla.”

¹⁵Antə I na MTHLAKU na ka Duna ta Shang pəla, “Kamnyar tə mjir Filistiya ku ndzangkir akwa nggəlar nca mjir Yahuda, antə da ku ntəskur ata kəra ɗa. Tsuwa da ku kurəmta ɗa ata kəra dawakur na fəifəyari.

¹⁶Antə apani, I na MTHLAKU na ka Duna ta Shang akwa pəla, I ata ɗi mjir Filistiya ni. I ata kədləɓəla mjir Kerethli, kəi kurəmta mambila mji na ka ndzi ata mnya manda.

¹⁷I ata ntəskur ka jirkur ata kəra ɗa, kəi ɗi ɗa ka duna. Ma sakatə I ku ntəmta dawakur ata kəra ɗa, antə da ata sənda abbər I an MTHLAKU.”