Read bura-pabir Ezekiyel 26 Bible Online

Ezekiyel 26 - bura-pabir bible

Ezekiyel 26

¹Akwa vir na ntangkəma ar thliya, akwa məva na kumkantangkur, antə MTHLAKU ku gari ali ka pəla,

²“Ɓzər mda, nggədza su tə mjir Taya pəla ata kəra Urushalima, “ ‘Yauwa, ku hara kalkal ja! Urushalima ku huzamtadzi! Mdə ku huzamta nyarfur kəɓar durayeri! Kulini nyarmbwa ku kəlardzi ali, I ata ndzi ka gəna təng tə tsa ku ndzi fya.’

³Kamnyar ngəni I na MTHLAKU na ka Duna ta Shang akwa pəla, I ku nggəlar nga, gə na Taya. I ata thlentə mji hang ata kəra ga hang apatə manda ana si ka mpar yimi, ka da pwa ata kəra ga ka mpa.

⁴Da ata huzamta məciɓər taya, ka da ndlagamta mbwayeri na nal. I ata tsarɓəla bərbərari ngyatu, kəi zhar ni ka tsa ndzi pirakthlya shini.

⁵Tsa ata ndzi apa ɗəɗəgəl ata ɗəffa manda, ka ndzi vəi wunar banggamayeri. I na MTHLAKU na ka Duna ta shang an pəla. Tsa ata ndzi apa su tə mdə fata akwa mpa,

⁶mjir tsəɗi ni na akwa kauyayeri, mda ata kurəmta ɗa ka katsakar. Antə da ata sənda abbər I an MTHLAKU.”

⁷“Kamnyar ngəni I na MTHLAKU na ka Duna ta Shang akwa pəla, akwa bwar yala antə I ata səntə Nebukadnezzar na kuthlir Babila, kuthli na olta shang. Tsa ata si ata kəma duku ka takwayeri, ka wagənayeri ar taku, ka mjir fəl taku, ka sojayeri dlama dlama ka da dlər Taya.”

⁸“Mjir tsəɗi ni na akwa kauyayeri, mda ata kurəmta ɗa ka katsakar. Tsa ata həntə suayeri ar ndlə məciɓə ni ka fəlvi, ka tsaptə həi ar ndlə məciɓə ni ka fəlvi, ka haptə partauwayeri arni kamnyar mpa nga.

⁹Tsa ata huzamta məciɓə ni ka gangər huzamta ri ka ndlagamta mbwayeri na nal nal ka kəmayeri arni.

¹⁰Takwayeri arni ata ndzi hang, har bərbər tə da ata thlentari ata hartə nga. Hangkur kuraka takwayeri ka səla wagənayeri, ata vu ka məciɓər nga kənggərantədzi. Antə kuthli ni ata ləvəi akwa nyarfur nga, apatə sojayeri ana puvidzi akwa bərni tə mdə ku huzamta məciɓari.

¹¹Ka səla takwayeri arni antə tsa ata dlarhə shanga lakur kuta di ar nga, ka tsa kurəmta mjir nga ka katsakar, ka zhimbwalayeri na ol'ola ndlagamtadzi ata di.

¹²Da ata famnya gənar nga, ka da famnya ka sur fəliyir nga. Da ata huzamta məciɓər nga, ka da hilantə mbwayeri ar nga na ɓɗakɓɗaku. Da ata fatə pelayerari, ka udzəmayerari ka bərbərari ka da ra pumtari ata manda.

¹³I ata vu ka mdə thləthlatə ka ha ar nga, tsuwa mda aɗi ata jaktə nggatə guləmər ngə wa.

¹⁴I ata namtə nga ka gə ndzi pirakthlya shini, ka gə ndzi vəi wunar banggama. Mda aɗi ata jaktə hənɓəla ngə wa, kamnyar I na MTHLAKU na ka Duna ta Shang an pəla.”

¹⁵“Nggədza su tə I na MTHLAKU na ka Duna ta Shang pəla ata kəra Taya. Shanga bwar mnya manda ata sə kənggərantədzi ma sakatə da ku nggatə kuraka ndlar nga, ka nggyinggyir mji na ku dəkəidzi, ka ləlu ar mji tə mdə kurəmtadzi akwa ga.

¹⁶Shanga kuthlyayeri na akwa bərniyayeri na ata mnya manda tsuwa ata sə səghəi kazhar dəkəl kuthlikurər ɗa. Da ata ntsugəi ləptayeri arɗa ka fəi ləptayeri arɗa natə mdə dəɓatə ka ndəɓur tsi, ka ndzi akwa kədza kamnyar thlivəra, ka ndzəndzi ata di. Tədəku da ata ndzi akwa thlivəra, ka ndatədzi ata kəra ga.

¹⁷Da ata sə jikatuwar nga abbər, “Gə hara ka sha ata mnya manda nə ri, gə na bərni na sənsəndari ni? Gə hara ka sha ata mnya manda nə ri, gə na ku ɗar ndzi ka duna ata manda, gə tə mjir nga ku ɗar ndzi sur thlivəra, aka shanga kauyayeri na kalaktə nga?

¹⁸Amma kulini tsəɗiyayeri na ata mnya manda, ata kədza akwa vir tə ga ku ndla, ɗəɗəgəlayeri na akwa manda, ata sə thlivəra kamnyar ndlar ngə ni.”

¹⁹“Kamnyar I na MTHLAKU na ka Duna ta Shang akwa pəla, ma sakatə I ku namtə nga fya, apa bərniyayeri natə mda aɗi ɗar ndzi akwa wa, I ata ncighəi nga akwa kira manda na zurang, kəi hartə nga ka yimi na hang.

²⁰Tsuwa I ata psəghəi nga ata kəma duku ka mji na ləghəi akwa vəi ndzəndziyir mji mtəmta, adzə mji na waci. Tsuwa I ata hara ka gə ndzi akwa kira di, akwa vəi na fya təng waci, ata kəma duku mji na ku kurtə ləghəi akwa vəi ndzəndziyir mji mtəmtə ni. Ga aɗi ata jaktə ngka wa, zhar ka ndzəndzi akwa vəi ndzəndziyir nga akwa duniyar mji na ka mpikə wa.

²¹I ata hara ka datər nga ndzi sur thlivəra, mda aɗi ata jaktə wutə nga kəra wa. Wala mda an pakə ngə ma, mda aɗi ata wutə ngə wa. I na MTHLAKU na ka Duna ta Shang an pəla.”