Read bura-pabir Ezekiyel 27 Bible Online

Ezekiyel 27 - bura-pabir bible

Ezekiyel 27

¹Antə MTHLAKU gari ali ka pəla,

²“Ɓzər mda, haptə ha ar ata kəra Taya,

³kara pəla aka Taya, “Gə na ka ndzi ata mnya manda, gə na ana fəli ka durayeri hang, na ka ndzi ata mnya manda, nggatə su tə I na MTHLAKU na ka Duna ta Shang ata pəlari. Gə na Taya, ga ku pəla, ‘I dakwi ka duna apa mələm.’

⁴Kəla ga an ata ɗəffa mandayeri, mji na hən nga ku namtə nga dakwi ka duna apa mələm.

⁵Shanga katakowayeri ar nga, da nam ka udzəmər fir na ahar Senir. Da nthlətsə nfur seda ahar Lebanon, kamnyar namtə udzəm nal ar hahəi səwur zhaɓər sharər yimi.

⁶Ka udzəmər ok na ahar Bashan, antə da namtə udzəmər nggur shar ni. Da namtə kuta vəi ɓukci ni ɓɗak laga, ka katakowur nfur mnya mandar Kittim, ka dəɓatə kutari ka thlira ciwar.

⁷Mdə dəɓatə sharayeri ar nga ka zhaɓər lilin, tə mdə dəɓatə ka ndəɓur tsi ahar Masar, tə tsa ku ndzi ala ga apa alamər nga. Mdə ku namta ala gə səva ka zhaɓi na ka kalar lipəla ka ndləngi həng'ha na thlata ahar ɗəɗəgəl ar Elisha.

⁸Mjir bərniyir Sidon ka Arvad an mjir nggur shar ar nga.

⁹Mji ol'olər Gebal ka mjirni na masəkur kəthlər ka tsi aɗi akwa ga, da an nam shanga vəi dethlər katakowayeri ni. Shanga sharayeri ar yimi ka mjir nggur ɗa, ku si akwa ga kamnyar fəli.

¹⁰Mjir Parsiya, ka Lud, ka na ar Put, an sojayeri ar nga masəku akwa mpa, da ana hahəi partauwayeri, ka dzakwar mpa akwa ga, ka wuta ala gə olkur.

¹¹Sojayeri na mjir Arvad ka Helek, an mjir gadi na kalaktə məciɓər nga. Mjir Gamad an akwa mbwayeri na nal nal, da hahəi partauwayeri arɗa ata məciɓər nga har ka kalakta. Da an mji na ku namtə nga ɓɗaku.”

¹²“Mjir Spen ku nggal su akəla ga, kamnyar gə ka gəna hang ar suayeri zumzum. Antə da ku palɓəla adzərfa, ka liya mənggəl, ka kuza, ka dalma, ata vəya kariyayeri ar nga.

¹³Mjir Yavan, ka mjir Tubal, ka mjir Meshek ana nggal su akəla ga. Da ku palɓəla mafayeri kəga suayeri tə mdə nam əmza, ata vəya kariyayeri ar nga.

¹⁴Mjir Beth Togarma ku palɓəla takwayeri ar kəthlər, ka takwayeri ar mpa, ka kwaraləbandərayeri, ata vəya kariyayeri ar nga.

¹⁵Mjir Rodes ku nggal su akəla ga. Tsuwa mji hang na ata mnya manda ku ndzi mjir masə su akəla ga. Da ku palɓəla thlira ciwar ka katako ar washina ata vəya kariyir nga.

¹⁶Mjir Siriya ku nggal su akəla ga kamnyar gə ka kariyayeri hang. Da ku si ka palɓəla kariyir ɗa apa yadər lipəla, ka kari dəɓa ar ndəɓur tsi, ka lilin na ɓɗaku, ka pelayeri na kala ɓɗakɓɗaku akwa yimi apa emeral, ka kirisolat, ka agat, ata vəya kariyayeri ar nga.

¹⁷Mjir Yahuda ka mjir Israila ku nggal su akəla ga. Da palɓəla alkama, ka mal zaitun, ka yar kamnda, ka məma, ka mal kəkəra na kamnyar kəta, ata vəya kariyayeri ar nga.

¹⁸Mjir Damaska ku nggal su akəla ga, kamnyar gə ka kari hang, kamnyar gə ka gəna hang ar suayeri zumzum. Antə da ku palɓəla yimər anap na ar Helbon, ka ulu mwapu ata vəya kariyayeri ar nga.

¹⁹Antə mjir Dan ka mjir Yavan na thlata ahar Uzal ku nggal su akəla ga. Da palɓəla liya mənggəl tə mdə namtə ɓɗaku, ka udzəm kassiya na ka shiwurari msəra, ka kari yaji, ata vəya kariyayeri ar nga.

²⁰Mjir Dedan ku nggal su akəla ga. Da si ka zhaɓər sərɗu ka palɓəla ka kariyir nga.

²¹Mjir Arabiya ka kuthlyayeri ar Kedar an mji na hir si ka maɗa' gam, ka gamayeri, ka palɓəla kariyir nga ka maɗa' təma, ka gamayeri ka nciwayeri ka palɓəla ka kariyayeri ar nga.

²²Mjir fəli na ahar Sheba ka Raama ku nggal su akəla ga. Da ku si ka kari yaji na msəra ta shang, ka shanga jili pelar dəɓa, ka dinar, ka palɓəla ka kariyayeri ar nga.

²³Mjir bərniyayeri ar Haran, ka Kanne, ka Eden, ka mjir fəli na ahar Sheba, ka mjir bərniyayeri ar Asshur, ka Kilmad shang ku nggal su akəla ga.

²⁴Mji nayeri ni ku si ka ɗələmta ala gə yadayeri na ka daraja, ka yadayeri na lipəla, kariyayeri tə mdə dəɓata ka ndəɓur tsi, ka kapetayeri zumzum tə mdə tsa ka puwa na ɓɗaku ka duna tsuwa.

²⁵Sharayeri na ol'ola andər mwantə kariyayeri ar nga, ka si ka kariyayeri damwa.” “Antə apani ga ku ndzi apa sharər yimi, na nghyinghyari ka kari na kəgəɓu, shar na ata ɗəffa manda.

²⁶Mjir nggur nga ku səntə nga ata ɗəffa manda na ola, antə shambar raghəi ku hukthləmta nga ata ɗəffa manda ni.

²⁷Antə gənar nga, ka kariyir nga, ka sur fəli ar nga, ka mjir nggur sharayeri ni, ka mjir nga na ol'olər manda, ka mjir nam sharayeri ni, ka mjir fəli ar nga, ka shanga sojayeri ar nga na masəkur mpa na akwa ga, shanga ɗa ku ləghəi ata ɗəffa manda ni akwa vir tə mdə tsi ngə ni.

²⁸Nggatər kuraka tuwar mjir nga na ol'olər manda, antə kauyayeri ar nga na ata mnya manda ku thlivəra.

²⁹Shanga mjir nggur sharayeri ni, ka mjir kəthlər ata kəra sharayeri ni, ka mjir ndəkər sharayeri ar yimi ni, shang ku hwi kazhar sharayeri arɗa, ka thləthlata ata mnya manda.

³⁰Da akwa haptə kuraku ka tsa ləlu ata kəra ga, da akwa tuwa ka duna kamnyar nga. Da akwa pungkər bərbər ata kəra ɗa, ka takəla akwa pənju.

³¹Da ku shimta kəra ɗa kamnyar nga, ka hatə dasa kamnyar ncantə ɓzərɗəffu. Da ku tuwa ka duna kamnyar nga, ka jikatuwa kamnyar nga

³²Akwa tuwar ɗa ni, da ku haptə har jikatuwar nga, abbər, ‘Gə na Taya, wa antə mdə ku ɗar tsi ni apa gə ri, na ku ndzi səri kulini akwa manda?

³³Sakatə kariyir fəliyir nga ku təra ata kəra yimi, ga ku kuri turər mji hang. Kamnyar hangkur gənar nga ka fəliyir nga, ga ku vu tə kuthlyayeri ar duniya ku hara gəna.

³⁴Kulini manda ku pukthləmta nga, ga ku ləghəi səri akwa kira yimayeri. Kari fəli ar nga ka shanga mjir kəthlər ala ga, ku ləghəi ata kəma duku ka ga.

³⁵Shanga mji na bwar mnya manda, ku ndatədzi ata kəra su na wutə nga. Wala kuthlyayeri arɗa ku thlivəra, kəma ɗa ku ndzi hərhərari kamnyar thlivəra.

³⁶Mjir fəli na akwa durayeri ku hara kyartəkur ala ga, datər nga ku sə ndzi sur thlivəra, ga aɗi ata jaktə ndzi akwa duniya kəra wa, ba saka madi.’ ”