Read bura-pabir Ezekiyel 28 Bible Online

Ezekiyel 28 - bura-pabir bible

Ezekiyel 28

¹Antə MTHLAKU ku gari ali ka pəla,

²“Ɓzər mda, pəla aka kuthlir Taya abbər, “ ‘I na MTHLAKU na ka Duna ta Shang akwa pəla, ga ku haptə kəra ga ka duna har ka pəla, “I an hyel laga! I ana ndzəndzi ata dəkələr kuthlikur, I ana ndzəndzi ata dəkələr hyel laga ata ɗəffa manda.” Wala tə tsu mdə daci, aɗi hyel laga wa, wala tə ga ku namtə kər nga, abbər gə mdə na ɗəɗu apa hyel laga.

³Jiri gə ku təramta Daniyel ka ɗəɗukur, ashir aɗi na kula ama ga ku səndə wa!

⁴Atar ɗəɗukurər nga ka səndər nga, ga tsaptə gəna aka kəra ga, ga ku tsaptə dinar ka adzərfa akwa mbwayeri ar pwi su.

⁵Atar ɗəɗukurər nga na hang kamta akwa fəli antə gənar nga ku jakjaka, har tə ga akwa gayar gənar ngə ni.’ ”

⁶Antə I na MTHLAKU na ka Duna ta Shang akwa pəla, “təng tə ga ku namtə kər nga abbər gə mdə na ɗəɗu apa hyel,

⁷to, I ata səntə mətəpiyayeri na ata nggəlar nga, mji na kula kətadzə ta shang. Antə da ata ntsuɓəla katsakarayeri arɗa, ka da ɓzamtə ɓɗakkur ɗəɗukurər ngə ni, ka da hilantə darajar ngə tsuwa.

⁸Da ata ndzəhəu nga akwa kur mji mtəmta, anda akwa ɗəffa manda.

⁹Wala ba akəma mji na ata tsi ngə ni, tsu ga ata mzhi pəla ga an hyel laga ni ya? Akwa tsiya mji na ata thlamta wulya ga, sakatə mdə ku nggaɓəla abbər ga aɗi hyel wa, amma gə mda, tsu ga ata mzhi pəla abbər ga an hyel laga ni ya?

¹⁰Ga ata mta apa mtər kila akwa tsiya mətəpiyayeri. Kamnyar I an pəla gari ni. I na MTHLAKU na ka Duna ta Shang an pəla.”

¹¹Antə MTHLAKU ku gari ali ka pəla,

¹²“Ɓzər mda, haptə ha ar jikatuwar kuthlir Taya, kara pəla alari, “ ‘I na MTHLAKU na ka Duna ta Shang akwa pəla, ga ku ndzi lenduwar kuthlikur na ɓɗakta shang, nghyinghyari ka ɗəɗukur ka tsuwa ɓɗakkur.

¹³Ga ana ndzəndzi akwa Eden na fakər Hyel, tsuwa kəlara pelar daraja ku ndzi kari dəɓar nga. Pelayeri ar karneliyan, ka topaz, ka jaspa, ka kirisolat, ka beril, ka oniks, ka sapfiya, ka kabunkul, ka emeral. Mdə marəmta ɗa ka kalaktə ɗa ka sur dəɓa ar dinar na ɓɗakta shang. Akwar vir tə mdə alaktə nga, antə mdə ɗəmhə ɗa cip cipu.

¹⁴I ku kəkərtə kəra ga mal ka vəi nga I ku namtə nga tə gə ndzi kerub. I ku vu tə ga ku ndzəndzi ata kəra Garər Hyel, antə ga ku mwa akwa cinjiɓa pelar u'u.

¹⁵Təng tsu vir tə mdə alaktə nga, antə ga ku mwa akwa jirkur, har tar vir tə mdə wutə biku adzə nga.

¹⁶Akwa hangkur fəliyir ngə ni, ga ku haptə hangkal, ka hara biku. Antə apani I ku kədləmta nga apa su na adiya, kazhar kəra Garər Hyel ni. Antə gə na kerub ni, I ku kədləmta nga kazhar cinjiɓa pelayeri ar u'u.

¹⁷Kamnyar ɓɗakkur nga antə ga ku hara kər olkur, ka hilantə ɗəɗukur tə ga kəgari atar bara ncantə darajar nga. Antə I psəmta nga ata di, ka kəlar ashira ga akəma kuthlyayeri, kamnyar ka gə ndzi ala ɗa sur wula.

¹⁸Atar hangkur bikayeri ar nga, atar kula jirkur tə ga ana hara akwa fəli, antə ga ku diɓərantə vəyayeri na ɓɗakkarkara. Antə apani I ku hatə u'u akwa ga, antə u'u ni ku mbamta nga tuktukku. Antə I namtə nga tə gə ndzi pənju, ata nca shanga mji na ku wutə nga.

¹⁹Shanga mji na ku səndə nga akwa nca durayeri ni, ku ndatədzi ata kəra su na wutə nga. Kamnyar datər nga ku sə ndzi sur thlivəra, tsuwa ga aɗi ata jaktə ndzi ka mpika kəra wa, ba saka madi.’ ”

²⁰Antə MTHLAKU ku gari ali ka pəla,

²¹“Ɓzər mda, thlentə kəma ga təbwar Sidon, kara hara naɓikur ata kərari.

²²Ka gə pəla, “ ‘I na MTHLAKU na ka Duna ta Shanga akwa pəla, I ku nggəlar nga, Sidon, amma mda ata haptə səliyirna akwa ga. Antə da ata sənda abbər I an MTHLAKU, akwa sakatə I ku ɗi mji na akwa ga, ka ncantə vəi ɓɗakkarkarkurərna akwa ga.

²³I ata thlentə shilku akwa ga, kəi vu ka mamshi hwi akwa lakur kuta diyir nga. Mji natə katsakar ku səm ɗa, da ata ndlagamtadzi ata ɗəffa ga, katsakar ni ata nu nga akwa kəlara bwa. Antə mjir nga ata sənda abbər I an MTHLAKU.’ ”

²⁴“Aghəla suayeri ngəni, mda aɗi ata jaktə wutə tsəɗi pal akwa nca ntəwulayeri na ku hara bwani ala ɗa, na ata jaktə ndzi apa mtəhəra ka tsa kwahəi mjir Israila wala dəkəi ɗa kəra wa. Antə da ata sənda abbər I an MTHLAKU na ka Duna ta Shang.”

²⁵“I na MTHLAKU na ka Duna ta Shang akwa pəla, ma sakatə I ku fwaɓəla mjir Israila akwa nca mji tə I titiləmta ɗa akwa ni, ka tsaptə ɗa, ka ncantə vəi ɓɗakkarkarkurərna ata nca mji ni, antə mjirna Israila ata sə ndzəndzi akwa tsəɗiyir ɗa natə I hamta aka buɗarna Yakub.

²⁶Antə da ata ndzəndzi anda akwa lapiyakur. Da ata həntə mbwayeri ka thləka fakayeri ar anap. Da ata ndzəndzi akwa lapiyakur sakatə I ata ɗi ntəwulayeri arɗa na hara ala ɗa bwani akwa saka na təramta ni. Apani antə da ata sənda abbər I an MTHLAKU na Hyelər ɗa.”