Read bura-pabir Ezekiyel 29 Bible Online

Ezekiyel 29 - bura-pabir bible

Ezekiyel 29

¹Akwa vir na kumnya suɗkur ar thliya na kumkur ar məva na kumkur, antə MTHLAKU ku gari ali ka pəla,

²“Ɓzər mda, thlentə kəma ga təbwar kuthlir Masar, ka gə hara naɓikur ata kərari ka shanga mjir Masar.

³Pəla alari, “ ‘I na MTHLAKU na ka Duna ta Shang akwa pəla, I ku nggəlar nga, kuthlir Masar, kamnyar ga an nggələm na ola, na ana pəpəi ata ɗəffa yimayeri, ga ana pəla, “Ai Thlyagha Nayil arna, I an namtə ni kamnyar kəri.”

⁴I ata hau anggilkayeri akwa mnya ga, kəi vu ka shanga kəlfayeri na akwa zərkayeri ni bartə kumər dza ga. Antə I ata ndəkərɓəla nga kazhar zərkəu ni ata kəma duku ka shanga kəlfayeri na bartə kumər dza gə ni.

⁵I ata ndzəhəmta nga akwa mtaku, ga ka shanga kəlfayeri na akwa zərkəu ni Antə ga ata təri ata di ata bəbal, mda aɗi ata mzhi tsaptə nga ka mdə harəmta ngə wa. Aka mwaɓiyayeri na akwa mtaku kəga ɗikayeri antə I ata hamta nga apa susəma ala ɗa.

⁶Apani antə shanga mjir Masar ata sənda abbər I an MTHLAKU. Kamnyar ga ka mjir nga ku ndzi kula ampani aka Israila, kula ampani apa zwalər kusar duwathlu,

⁷natə ma mdə ku tamtə ka tsi ga ata ɓələmtadzi, ka dəkəi pathlaha ɗa. Tsuwa ma da ku rwatədzi ata ga, ga ata ɓələmtadzi, ka vu ka da ndlagamtadzi.’ ”

⁸“Antə kulini, I na MTHLAKU na ka Duna ta Shang akwa pəla, I ata vu ka sojayeri pwa ata kəra ga ka mpa, ka da kurəmta mjir nga kəga mwaɓiyayeri arɗa.

⁹Antə Masar ata ndzi fya kula ampani. Antə da ata sənda abbər I an MTHLAKU. Kamnyar gə pəla abbər Nayil an ar nga, tsuwa ga an namta.

¹⁰Antə apani I ku nggəlar nga, tsuwa I ku nggəlar zərkayeri ar nga. Antə I ata namtə tsəɗi Masar ka tsa ndzi fya, hilhilari kula ampani, baɗita akwa bərni Migdol ka mwanta akwa bərni Aswan, har ka pudza aka kəla Ithliyopiya.

¹¹Antə tsəɗi ni ata hara məva nfwarkumari kula mdə wutə səla mda wala səla mwaɓi təramta akwa, tsuwa mda aɗi na ata ndzi akwa wa.

¹²I ata namtə Masar ka tsa ndzi tsəɗi na hilhilari ta shanga tsəɗiyayeri na akwa duniya. Tsuwa bərniyayeri na akwa tsəɗi ni ata ndzi hilhilari ta shanga tsəɗiyayeri na hilhilari har mnyar məva nfwarkumari. I ata titiləmta mjir Masar ka da ra ndzəndzi akwa nca durayeri damwa, kəi ndəkəmta ɗa akwa shanga tsəɗiyayeri na akwa duniya.”

¹³“Tsuwa I na MTHLAKU na ka Duna ta Shang pəla, akwa tsikəra məva nfwarkumari ni, I ata fwaɓəla mjir Masar kazhar nca mji tə I titiləmta ɗa akwa ni, kəi tsaptə ɗa akwa tsəɗiyir ɗa.

¹⁴Tsuwa I ata ngka aka Masar barkayeri na arni, kəi ngka ka da akwa tsəɗi Pathros, tsəɗiyir ɗa na hwatu. Antə anda da ata ndzi kuthlikur na kula duna.

¹⁵Tsa ata ndzi kuthlikur na lələɓu ta shanga kuthlikurayeri, antə tsa aɗi ata jaktə haptə kərari ata kəra tsəɗiyayeri damwa kəra wa. Tsuwa I ata hara ka da ndzi raka ka duna tə da aɗi ata mzhi jaktə hara kuthlikur ata kəra tsəɗiyayeri wa.

¹⁶Antə kuthlikur ar Masar aɗi jaktə ndzi su tə mjir Israila ata vəkər kari kəra wa. Mjir Israila ata ɗangtə bikayeri arɗa na waci, sakatə da shinar kəma təbwar Masar ka bara dlara akəla ɗa ni. Apani antə Mjir Israila ata sənda abbər I an MTHLAKU na ka Duna ta Shang.”

¹⁷Vir laga akwa vir na ntangkəma ar thliya na ntangkəma ar məva na sərkumari ka murfəkur, təng MTHLAKU gari ali ka pəla,

¹⁸“Ɓzər mda, Nebukadnezzar na kuthlir Babila ku vu sojarni na dlama dlama ni ghəra akwa ɗəmhədzi kamnyar ra dlər tsəɗi Taya. Tsa vu ɗa akwa fa kəla na kəgəɓu har tə kəlara kər ku durəmtadzi ka ndzi hyalang, tsuwa pathlaha waskəi ku nthlə mbəlku. Amma ata bwani ngəni shang, ta tsa ya, ta sojayeri arni ya, aɗi na wutə su laga na ata ntəmta bwani tə da ɗari akwa mpa ka mjir Taya ni wa.

¹⁹Antə apani I na MTHLAKU na ka Duna ta Shang akwa pəla, I ata hamta tsəɗi Masar aka Nebukadnezzar na kuthlir Babila, ka tsa famnya gənarni, ka tsa hilantə ni, ka tsa dlutsə su tə tsa kəgari, kamnyar ka tsa wutə su tə tsa ata ntəmta sojayeri arni kəgari.

²⁰I ku hamta tsəɗi Masar ka tsa ndzi watsəɓər ghəra tə da hara, kamnyar tə da kəthlər ni ali. I na MTHLAKU na ka Duna ta Shang an pəla.”

²¹“Antə vir nda I ata hara ka mjir Israila jaktə ndzi ka duna. Antə gə na Ezekiyel, I ata ncantari ata bəbal akwa nca ɗa abbər I an kəlar mnya ga. Antə da ata sənda abbər I an MTHLAKU.”