Read bura-pabir Ezekiyel 3 Bible Online

Ezekiyel 3 - bura-pabir bible

Ezekiyel 3

¹Antə tsa pəla ali, “Ɓzər mda, ɓɗəmnya su tə mdə na ala gə ni. Ɓɗəmnya kakaɗə ngəni pərpərari ni. Aghəla nda ka gə təra, ka gə ra pəla aka mjir Israila.”

²Antə I kəlar mnyi, antə tsa na ali kakaɗə ni kəi ɓɗəmnya.

³Antə tsa pəla ali, “Ɓzər mda, ɓɗəmnya kakaɗə ngəni tə I na ala gə ni, ka gə nghyantə kuta ga kəgari.” Antə I ɓɗəmnya. Tsuwa təng su ni nənəm akwa mnyi apa cirməma.

⁴Antə tsa pəla ali, “Ɓzər mda, mwari adzə mjir Israila, ka gə pəla ala ɗa su tə I pəla ka gə pəla.

⁵Kamnyar I aɗi akwa thlentə nga adzə mji tə mnyar ɗa zum ka ar ngə wa, wala mji tə mnyar ɗa mwavər wa, amma adzə mjir Israila.

⁶I aɗi thlentə nga adzə mji tə mnyar ɗa zum ka ar ngə wa, wala mji tə mnyar ɗa mwavər, tə ga amzhi nggaɓəlari wa wa. Kamnyar jiri, ma I thlentə nga adzə jili mji apani, da ata psi thləm ala ga.

⁷Amma ar mjir Israila da aɗi ata psi thləm ala gə wa, kamnyar tə da aɗi akwa hir psi thləm ali wa. Kamnyar tə shanga mjir Israila ni kəra ɗa ɓəɓal, tsuwa ɗəffa ɗa ɓəɓal.

⁸Nggədza tsuwa I ata namtə nga ka gə ndzi nggyarɗu tsu apa da.

⁹I ata namtə ka kəra ga ndzi ɓəɓal apa pela na ɓəɓal ta shang, har ma ɓəɓal ta pela ndaga. Antə ga aɗiya thlivər ɗa wa, wala damitədzi ata kəra laku tə da ata wul nga akwa wa, kamnyar hwatu da mjir thlentə hangkala mda.”

¹⁰Antə tsa jaktə pəla ali, “Ɓzər mda, kəlar thləma ga, ka gə dlu shanga gari tə I akwa pəlari ni akwa ɗəffa ga.

¹¹Antə mwa, ka ra mwari adzə mjir nga na akwa mafakur ni, ka gə pəla ala ɗa abbər, ‘Nggədza su tə MTHLAKU na ka Duna ta Shang pəla’ wala da ata psi thləm akari, wala da ata an nggəlarari.”

¹²Antə mambəl ni ku haptə ra amta. Antə I nggata abwahili kuraku laga na ol ka duna apa di an kənggərantədzi, sakatə səliyir MTHLAKU haptədzi kazhar vəi tə tsa ata hwatu.

¹³Azha kuraka ɓəɓəka suayeri na ka mpikə ni sakatə da dlərtsə nvwa ɗa, ka kuraka garegare na athlimbəla ɗa ni an akwa tuwa apa di an kənggərantədzi ni.

¹⁴Antə mambəl ni ku haptə ra, ka təra ka iya. Antə I təra ka ɗəffə ɓzəɓza ka duna, ka hangkali thlatəthlatari, ka dunar MTHLAKU ata kəri swaiswai.

¹⁵Antə I si adzə mji na akwa mafakur ni, ata mnya Thlyagha Kebar na ahar Tel Abib ni. Antə I ndzəndzi anda har vir murfa, kula mzhi səndə su tə kəi pəla kamnyar surndatayeri ngəni tə I wutə ka nggatə ni.

¹⁶Aghəla vir murfə ni, antə MTHLAKU gari ali abbər,

¹⁷“Ɓzər Mda, I ku namtə nga mdər sək kəra tsəɗi Israila. Kəlara sakatə ga ku nggatə ndər akwa mnyi, ka gə tsaktə ɗa kəgari.”

¹⁸Ma I pəla aka mdə na kəmanggar abbər jiri tsa ata mta, amma ga aɗi tsaktə ni wala gari alari ka tsa zhar kəmanggarkurərni ni kamnyar ka tsa mbantə mpikari wa, to, mdə ndaga ata mta akwa bikərni, amma watsəɓər bikərni ni ata ndzi ata kəra ga.

¹⁹Amma ma ga ku tsaktə mdə na kəmanggar ni, amma tsa an aɗi zhar kəmanggarkurərni ni wa, wala zhar surhararni na ɗimi ni wa, to, tsa ata mta akwa bikərni, amma ga ku msərantə mpika ga.

²⁰“Ma mdə na pwa ku zhar hara ɓɗakkur, ka ləkwa hara ɗimikur, antə I vəi surtsasəl akəmari, to, tsa ata mta. Ma ga aɗi tsaktə ni wa, tsa ata mta akwa bikərni. Antə ɓɗakkur tə tsa hara akwa sakayeri na təramta nda aɗi ata ndzi akwa jika wa, amma watsəɓər bikərni ata ndzi ata kəra ga.

²¹Amma ma ga an ku tsaktə mdə na pwa ta tsa ahara biku, antə tsa zhar hara biku ni, jiri tsa ata ndzi ka mpika, kamnyar tə tsa ku psi thləm ala gə ka nu su tə gə pəla alari. Antə apani gə ma ga ku msərantə mpika ga.”

²²Antə dunar MTHLAKU si ata kəri, ka pəla ali, “Thlatə ka gə mwari akwa mular ni, anda antə I ata gari ka ga.”

²³Antə I thlata, ka təra mwari akwa mular ni. Antə I wutə parakər səliyir MTHLAKU athləthlata anda, tsu apa parakər səli natə I wuta ata mnya Thlyagha Kebar nda. Antə I ndla ka mnya ɗəffi ata di.

²⁴Antə mambələr Hyel si ka ləkwa dzi ka thlentə ra ata səli. Antə tsa gari ali ka pəla, “Təra, ka gə ləmbwar ngkiri, ka gə harəngkər nyarmbwa ata kəra ga.

²⁵Antə gə na ɓzər mda, mda ata mbwamta nga ka səwa, har tə ga aɗi ata mzhi ləɓəla akwa nca mji wa.

²⁶Antə I ata dləɓtə mnya ga, ta ga amzhi tsaktə mji ngəni na hir thlentə hangkala mdə ni.

²⁷Amma kəlara sakatə I ata gari ka ga, I ata kəlar mnya ga. Antə ga ata pəla ala ɗa abbər, ‘Ngəni an su tə MTHLAKU na ka Duna ta Shang pəla.’ Mdə na ka thləmər nggatə su, ka tsa nggata, tsuwa mdə na ata nggəlarari, ka tsa nggəlari, təng tə hwatu da mji na ka kəra ɗa ɓəɓal ni.”