Read bura-pabir Ezekiyel 30 Bible Online

Ezekiyel 30 - bura-pabir bible

Ezekiyel 30

¹Antə MTHLAKU ku gari ali ka pəla,

²“Ɓzər mda, hara naɓikur kara pəla, I na MTHLAKU na ka Duna ta Shang akwa pəla, “ ‘Tuwa giri ka giri pəla, “Sha ku wutə mburu ata kəra vir ngəni!”

³Kamnyar vir ku hara kudzəha, virər MTHLAKU ku hara kudzəha, Vir nda ata ndzi vir zhimaru, ka sakar asar na ɗimi aka tsəɗiyayeri ni.

⁴Mji ata pwa ata kəra Masar ka mpa, tsuwa bwani ata pwa ata kəra mjir Ithliyopiya, ma sakatə mji tə mdə kurəmta ni ku ndlagamtadzi akwa Masar, tə mdə ku famnya gənarni, ka ntsugəmta nggilangayerari.’ ”

⁵Antə sojayeri ar Ithliyopiya, ka Put, ka Lud, ka shanga Arabiya, ka Libiya, ka mjir tsəɗi na paktə kəra ɗa ka Masar ni, shang ata kurəmtadzi akwa mpa na ndaga.

⁶Apani I na MTHLAKU akwa pəla, “Mji na ku mbwa kir aka Masar, duna tə tsa akwa gaya ata kər ni ata kura. Su na baɗita akwa Migdol har ka mwantə bərni Aswan, mda ata kurəmta ɗa shang akwa mpa akwa kutari, I na MTHLAKU na ka Duna ta Shang an pəla.

⁷Antə tsəɗi Masar ata ndzi hilhilari ta shang tsəɗiyayeri na hilhilari akwa duniya, tsuwa bərniyayeri arni ata ndzi hilhilari ta shanga bərniyayeri na hilhilari akwa duniya.

⁸Ma sakatə I ku hatə u'u ata Masar shanga mjir dlar ni ata kurəmtadzi. Antə da ata sənda abbər I an MTHLAKU.”

⁹“Ma vir nda I ata thlenta akwa sharər yimi, ka da mwari ra thlivərantə mjir Ithliyopiya na akwa ndzəndziyir ɗa lapiya. Antə asar ata pwa ata kəra ɗa akwa vir tə mda ata ɓdləmta Masar ni. Kamnyar nggədza vir ni akwa si!

¹⁰“ ‘I na MTHLAKU na ka Duna ta Shang akwa pəla, I ata kurəmta mjir Masar na hang ni, ata tsiya Nebukadnezzar na kuthlir Babila.

¹¹Tsa ka sojayeri arni ata kəma duku, mji na kula kətadzə ta shanga mji damwa, antə mda ata səntari ka da kurəmta tsəɗi ni. Da ata mpa mjir Masar ka katsakarayeri arɗa, ka da nghyantə tsəɗi ni ka mshiyir ɗa leɓleɓu.

¹²I ata ulantə Thlyagha Nayil, kəi ɗələmta tsəɗi ni aka mji na ɗimi. I ata hilantə tsəɗi ni ka shanga su na akwa, ata tsiya mətəpiyayeri. I na MTHLAKU na ka Duna ta Shang an pəla.’ ”

¹³“I na MTHLAKU na ka Duna ta Shang akwa pəla, “ ‘I ata shamta haptayeri ka hyelayeri, kəi thləthlatə ka dludzər haptu Memfis. Mda aɗi ata jaktə wutə kuthli akwa Masar wa, I ata hara ka thlivər ngkəi mjir tsəɗi ni.

¹⁴I ata hilantə Pathros ka tsa ndzi fya, kəi hatə u'u ata bərni Zowan, kəi hara shariya aka bərni Thlebes.

¹⁵I ata pumta ɗəffi na ɓzi ni ata kəra Pelusiyum, bərni na ola akwa məciɓa ar Masar, kəi kurəmta mjir Thlebes na hang ni.

¹⁶I ata hatə u'u ata tsəɗi Masar, Pelusiyum ata ləkwa bwani na mwavər. Asar ata kəl Thlebes, antə mda ata huzamta məciɓərni, dawayeri ata ɓukci akwa dlər Memfis.

¹⁷Maɗadakwiyir bərni On ka Pibeseth, mda ata kurəmta ɗa akwa mpa, ka mdə mwantə maɗankwiyir ɗa akwa mafakur.

¹⁸Akwa Tapanhes vir nda ata sə ndzi kuthlu, sakatə I ku ɓəli dunawakur Masar anda, antə duna tə tsa akwa ɓwadzi kəgari ni ata kura. Dlamba ata hartə kəra Masar, antə mji na akwa bərniyayeri arni mda ata mwantə ɗa akwa mafakur.

¹⁹Apani antə I ata ɗi Masar, antə da ata sənda abbər I an MTHLAKU.’ ”

²⁰Akwa vir na murfəkur ar thliya ni, akwa məva na kumkantangkur, antə MTHLAKU ku gari ali ka pəla,

²¹“Ɓzər mda, I ku ɓələmta tsiya kuthlir Masar. Nggədza tsuwa mda aɗi mbwi alari tsiyari ni kamnyar ka tsa kur wa, wala mbwi alari akwa laku tə tsa ata mzhi jaktə kəsi katsakar wa.

²²Antə apani I na MTHLAKU na ka Duna ta Shang akwa pəla, I ku nggəlar kuthlir Masar. Antə I ata ɓələmta tsiyayerari japu, tsiyari na tsu ka duna ni ka na ɓəlɓəlari ni. Tsuwa I ata hara ka katsakar ni təri kazhar tsiyari.

²³I ata titiləmta mjir Masar akwa nca durayeri kəi ɓucimta ɗa akwa tsəɗiyayeri na akwa duniya.

²⁴Antə I ata dunautə tsiya kuthlir Babila, kəi vu katsakarərna akwa tsiyari. Amma I ata ɓələmta tsiya kuthli ni, antə tsa ata nggyinggya akəma dawarni apa mdə na ku dəkəidzər mta.

²⁵I ata dunautə tsiya kuthlir Babila, kəi fəi shaha kuthlir Masar. Antə da ata sənda abbər I an MTHLAKU, ma sakatə I ku vu katsakarərna akwa tsiya kuthlir Babila kamnyar ka tsa ndərangkər ata kəra tsəɗi Masar ni.

²⁶Antə I ata titiləmta mjir Masar akwa nca durayeri, kəi ɓucimta ɗa akwa tsəɗiyayeri na akwa duniya. Antə da ata sənda abbər I an MTHLAKU.”