Read bura-pabir Ezekiyel 31 Bible Online

Ezekiyel 31 - bura-pabir bible

Ezekiyel 31

¹Akwa vir na ntangkəma ar thliya na makərkur akwa məva na kumkantangkur, antə MTHLAKU gari ali ka pəla,

²“Ɓzər mda, pəla aka kuthlir Masar ka shanga mjirni na dlama dlama ni abbər, “ ‘Ka wa antə mda ata gira olkurər ngə ri?

³Ma waci tsəɗi Assiriya ndzi apa seda na ahar Lebanon, na ka tsiyayerari ɓɗakɓɗaku ka shanggur kuɓər nfwa, tsa an nfu na saɓəl ka duna, tə kərari har ku ləkwa dlambayeri.

⁴Yimayeri an vu tə tsa kəla ni, zurangkur zərkayeri an hara tə tsa hara saɓəl ni, Yimər zərkayeri ku hwi ka kalaktə vəi tə mdə thləka ni ata, yimər kufayeri ku mwa ciju har ka mwari adzə shanga nfwayeri na akwa kuɓər nfu ni.

⁵Apani antə tsa ku kəl saɓəl, ta shanga nfwayeri na akwa kuɓər nfwa. Tsiyayerari na ol'ola ku kəl bitu tsiyayerari na raka raka ku kəl saɓəl, kamnyar yimi na hang akwa nggilangayerari.

⁶Shanga ɗikayeri ana la mbwar ɗa ata tsiyayerari na ol'ola. Akira tsiyayerari na raka raka shanga mwaɓi mtaku ana yaɓəla maɗa' ɗa tsuwa shanga mjir duniya ku ndzəndzi akwa shanggurərni.

⁷Tsuwa olkurərni an ɓɗak ka duna, akwa tsiyayerari na ndərardzi saɓəl saɓəl, kamnyar nggilangayerari ku ləghəi zurang, akwa vəi tə yimi aɗi hang.

⁸Aɗi akwa nca nfwayeri ar seda na akwa gadinar Hyel tə mda a gira ka tsa wa.

⁹I namtə ni ɓɗak laga, ka tsiyayerari hang, tə shanga nfwayeri na akwa Eden, na gadinar Hyel ku səlkər ni.’ ”

¹⁰“Kamnyar ngəni antə I na MTHLAKU na ka Duna ta Shang akwa pəla, kamnyar tə tsa ku hara saɓəl, har tə kərari ku mzhitə kuta dlambayeri, antə tsa ləkwa gaya kamnyar saɓəlkurərni.

¹¹Antə I hamta ni aka kuthlir mji damwa, antə kuthli ni ata ɗi ni kalkal ka ɗimikur tə tsa hara. Apani I ku kəɓəla ni ka psəmta.

¹²Mətəpiyayeri na kula kətadzə ta shang an nthləmta ni ata di, ka təra kazhar ni. Antə tsiyayerari na raka raka ku pugəmtadzi ata garayeri na akwa mular, tsiyayerari na ol'ola tsuwa ku ɓəgələmtadzi ka pugəmtadzi akwa lakwayeri ar yimi na akwa tsəɗi ni. Antə shanga mjir duniya ku thlatə kazhar shanggurərni, ka təra.

¹³Antə shanga ɗikayeri ata sə pwa ata kəra nfu na ndla ni, tsuwa shanga mwaɓi mtaku ata sə si ka da ntsəntsarəmta tsiyayerari ni.

¹⁴Shanga su ngəni mdə hara kamnyar ta nfu laga akwa nca nfwayeri na ata mnya yimi asə haptə kərari atar kəl saɓəl, har ka kərari ləkwa dlambayeri apani ni. Tsuwa nfu laga akwa nca nfwayeri na ku sa yimi asə hara saɓəl apa da. Kamnyar mdə ku kurtə hamta shanga ɗa aka mta, akwa vəi ndzəndziyir mji mtəmta, ata kəma duku ka mji na ləghəi anda akwa kur mji mtəmta.”

¹⁵“Antə I na MTHLAKU na ka Duna ta Shang pəla, ‘Vir tə nfu ni ləghəi akwa duniyar mji mtəmta, antə I vu tə yimayeri na akwa kira di hartə ni ka tuwa, ka thləthlatə ka zərkayeri arni ka thləthlatə ka yimayeri arni na hang ni. Kamnyar mtər nfu ni, I vu tə kuthlu hartə Lebanon kamnyar ɗəffə ɓzəɓza, tsuwa shanga nfwayeri na akwa mtaku ku tətəɓumtadzi kamnyar ni.

¹⁶I vu tə durayeri ku kədzantədzi kamnyar olkur kuraka ndlarni, sakatə I psəghəi ni akwa duniyar mji mtəmta ata kəma duku ka mji na ləghəi akwa ku. Antə shanga nfwayeri na akwa Eden ka nfwayeri na ɓɗakta shang tə mdə carɓəla akwa nca nfwayeri ar Lebanon, ka shanga nfwayeri tə yimi ku mzhi ɗa, ku wutə sur vətə ɗəffu aghəi akwa duniyar mji mtəmta.

¹⁷Antə mji na ku ɗar thlir shanggurərni nda, watau mji na ku paktə kər ka tsa, ku ləghəi ata kəma duku ka tsa akwa duniyar mji mtəmtə ni, adzə mji tə mdə kurəmta ka katsakar ni.

¹⁸Nfu madi akwa nca nfwayeri na akwa Eden an kalkal ka ga akwa olkur ka darajakur ri? Jiri, mda ata ləghəi ka ga ata kəma duku ka nfwayeri ar Eden ni akwa duniyar mji mtəmta. Antə ga ata pəpəi akwa nca mji na kula səndə Hyel, ata kəma duku ka mji tə mdə kurəmta ka katsakar. Ngəni an kuthlir Masar ka shanga mjirni na dlama dlama ni. I na MTHLAKU na ka Duna ta Shang an pəla.’ ”