Read bura-pabir Ezekiyel 32 Bible Online

Ezekiyel 32 - bura-pabir bible

Ezekiyel 32

¹Akwa vir na ntangkəma, ar thliya na kumnya suɗkur akwa məva na kumnya suɗkur, antə MTHLAKU ku gari ali ka pəla,

²“Ɓzər mda, haptə ha ar jikatuwa kamnyar kuthlir Masar, kara pəla, “ ‘Gə namtə kər nga apa tsəngi akwa nca mji amma gə dludzər shatan na ola ar kuta yimi, Ga ana huzəɓta yimər thlyaghayeri, ka hilantə yimi ni ka səla ga, ka diɓərantə yimər thlyaghayeri ni.

³I na MTHLAKU na ka Duna ta Shang akwa pəla, akwa tsaptədzər durayeri dlama dlama, antə I ata ndzəhə banggamarna ata kəra ga, kəi ndəkərɓəla nga akwa banggamarna ni.

⁴I ata psəmta nga ata di, kəi shiwuləmta nga ata bəbal ɓamtərathlu, I ata vu ka shanga ɗikayeri pwa ata kəra ga, kəi ndlantə shanga mwaɓi mtaku ka kumər dza ga.

⁵I ata titiləmta kumər dza ga ata kəra garayeri, kəi nghyantə mularayeri ka ɗethlər nga.

⁶I ata ləɓantə tsəɗi ni ka mamshir nga, har ba ata kəra garayeri, ka tsa hwi ka nghyantə shanga lakur yimi.

⁷Ma sakatə I ku fiɓəla nga, I ata hartə vəi na amtazi, kəi vu ka sasəlkayeri arɗa ngka kuthlu. I ata hartə pci ka dlamba antə thliya aɗi ata hamta parakərni wa.

⁸Shanga sur hamta parakəu na amtazi, I ata vu ka da ndzi kuthlu ata kəra ga, kəi vu ka tsəɗiyir nga ndzi akwa kuthlu. I na MTHLAKU na ka Duna ta Shang an pəla.’ ”

⁹“Mji hang ata sə damitədzi, ma sakatə I ku mwantə nga akwa mafakur, akwa tsəɗiyayeri tə ga aɗi səndə wa.

¹⁰I ata vu ka mji hang ndatədzi ata kəra ga, ka kuthlyayeri arɗa ləkwa kədza kamnyar nga, akwa sakatə I ku kədaɓtə katsakarərna akəma ɗa. Ma vir tə ga ku ndla, waskəi akwa nca ɗa ata yakata tədəku, waskəi akwa damitədzi kamnyar mpikari.

¹¹Kamnyar I na MTHLAKU na ka Duna ta Shang akwa pəla, Kuthlir Babila ata sə pwa ata kəra ga ka mpa.

¹²I ata zhar ka sojayeri na masəkur mpa ni, sojayeri na kula kətadzə ta shang ni, kurəmta shanga sojayeri ar nga na dlama dlama ni. Da ata namtə ka gayar Masar ni ndzi gapani, shanga mjirni na dlama dlama ni ata kurəmtadzi.

¹³I ata tsəgəi shanga mwaɓiyirni na akwa ɓəla ata mnya yimayeri. Antə mda aɗi na ata jaktə huzəɓtə yimi ni ka səlari wa, tsuwa mwaɓi aɗi na ata jaktə diɓərantə yimi ni ka səlari wa.

¹⁴I ata hara ka yimər ɗa ndzi cilangcilang, ka zərkər ɗa hwi səɗəɗu apa mal. I na MTHLAKU na ka Duna ta Shang an pəla.

¹⁵Ma Sakatə I ku namtə tsəɗi Masar tə tsa ndzi fya, sakatə mdə ku ndəkəmta tsəɗi ni ka shanga su na akwa tsa, sakatə I ku tsa shanga mji na ka ndzi akwa tsa, antə da ata sənda abbər I an MTHLAKU.”

¹⁶“Ngəni an har jikatuwa tə mda ata ləkəma ka harari. Antə maɗankwiyir tsəɗiyayeri damwa an ata harari. Tsuwa da ata hara ha ngəni ata kəra Masar ka mjirni na dlama dlama ni. I na MTHLAKU na ka Duna ta Shang an pəla.”

¹⁷Akwa vir na kumnya ntəfkur ar thliya na ntangkəma ar məva na kumnya suɗkur, antə MTHLAKU gari ali ka pəla,

¹⁸“Ɓzər mda, tuwa mjir Masar na dlama dlama ni, ka gə thlentə ɗa aghəi akwa duniyar mji mtəmta, tsa ka mjir tsəɗiyayeri damwa na ka daraja ni, ka da ləghəi adzə mji na akwa kur mji mtəmtə ni. Ka gə pəla alari,

¹⁹“ ‘Ga ana wutə gə təramta wa ri ka ɓɗakkur? Ga ata mwari akwa duniyar mji mtəmta kara pəpəi akwa nca mji na kula səndər Hyel.’ ”

²⁰“Antə mda ata kurəmta mjir Masar ka mdə pumta ɗa akwa nca mji tə mdə kurəmta ka katsakar. Kamnyar mdə ku kurtə ntsuɓəla katsakar kamnyar ɗa antə tsa ka shanga mjirni na dlama dlama ata kurəmtadzi ata kəma duku.

²¹Mji na ol'ola na masəkur mpa ata kəma duku ka mjir dlar ɗa an ata ndzi apa mjir dlu ɗa, ka gari ka da akwa duniyar mji mtəmta, abbər, ‘Ai da ku kurtə ka səghəi, nggədza ɗa apəpəi azi ata kəma duku ka mji na kula səndə Hyel, natə mdə kurəmta akwa mpa ni!’ ”

²²“Tsəɗi Assiriya anda, kalakkalakari ka shanga kulər sojayeri arni, kulər shanga mji tə mdə kurəmta akwa mpa.

²³Kulayeri arɗa an akwa vəi na zurang ta shang akwa kur mji mtəmtə ni. Antə sojayeri arni na kurəmtadzi akwa mpa ni ku kalaktə ni, watau shanga sojayeri na thlivərantə mji akwa duniyar mji na ka mpikə nda.”

²⁴“Tsəɗi Elam anda, ka kulərni kalakkalakari ka kulər shanga sojayeri arni, kulər shanga mjirni na dlama dlama na kurəmtadzi akwa mpa nda. Da ləghəi akwa duniyar mji mtəmta adzə mji na kula səndə Hyel ni. Da an mji na thlivərantə mji sakatə da akwa duniyar mji na ka mpika, antə kulini da akwa ngga səliyir kərɗa ata kəma duku ka mji na ləghəi akwa ku ni.

²⁵Mdə ku ɗəmha aka Elam vəi pəpəi akwa nca mji mtəmta, ata kəma duku ka mjirni na dlama dlama tə mdə tsəgəi akwa mpa, ka kulərni akwa ɗəffa kulayeri arɗa. Tsuwa shanga ɗa an mji na kula səndə Hyel, mji na thlivərantə mji sakatə da akwa duniyar mji na ka mpika. Amma kulini da akwa ngga səliyir kərɗa ata kəma duku ka mji na ləghəi akwa kur mji mtəmta, akwa nca mji tə mdə kurəmta akwa mpa.”

²⁶“Tsəɗi Meshek ka Tubal anda, ka kulər ɗa kalakkalakari ka kulər shanga sojayeri arɗa na dlama dlama, tsuwa shanga ɗa kula səndə Hyel. Mdə kurəmta ɗa shang akwa mpa, kamnyar tə da ku ndzi sur thlivərantə mji akwa kəlara bwa, sakatə da akwa duniyar mji na ka mpika

²⁷Mda aɗi peri ɗa adzə mji na katsalar mpa na kula səndər Hyel tə mdə kurəmta waci ni wa, mji na ləghəi akwa duniyar mji mtəmta ata kəma duku ka kari mpar ɗa ni. Da namtə katsakarayeri arɗa apa sur vətə kər, ka hartə kəra ɗa ka partauwayeri arɗa. Kamnyar mji ngəni na katsalar mpa ku ndzi sur thlivəra aka mji sakatə da akwa duniyar mji na ka mpika.

²⁸Antə apani giri na mjir Masar, mda ata kurəmta giri, ka mdə harəmta giri akwa nca mji na kula səndə Hyel ni, ata kəma duku ka mji tə mdə kurəmta akwa mpa.”

²⁹“Tsəɗi Edom anda, ka kuthlyayeri arni kəga mjirni na ol'ola, natə wala tə da ka duna, da apəpəi akwa nca mji tə mdə kurəmta akwa mpa. Da ata kəma duku ka mji na kula səndə Hyel, ata kəma duku ka mji na ləghəi akwa kur mji mtəmtə ni.”

³⁰“Shanga kuthlyayeri na bwar yala anda, ka tsuwa shanga mjir Sidon, ku ləghəi akwa duniyar mji mtəmtə ni akwa ngga səli ata kəma duku ka mji tə mdə kurəmta akwa mpa ni. Kamnyar da ku ndzi sur thlivəra aka mji kamnyar duna tə da kəgari sakatə da akwa duniyar mji na ka mpika, amma kulini da akwa nca mji na kula səndər Hyel, natə mdə kurəmta akwa mpa, na ləghəi akwa kur mji mtəmtə ni.”

³¹“Ma sakatə kuthlir Masar ku wutə ɗa, ɗəffari ata pwi, watau sakatə tsa ka sojayeri arni ku wutə mjirni na dlama dlama tə mdə kurəmta akwa mpa ni. I na MTHLAKU na ka Duna ta Shang an pəla.

³²Kamnyar wala tə I ku hara tə kuthli Masar ndzi sur thlivəra aka mji sakatə tsa akwa duniyar mji na ka mpika, tsa ata pəpəi ata kəma duku ka mji na kula səndə Hyel, ata kəma duku ka mji tə mdə kurəmta akwa mpa ni, watau kuthli ni ka shanga mjirni na dlama dlama ni. I na MTHLAKU na ka Duna ta Shang an pəla.”