Read bura-pabir Ezekiyel 33 Bible Online

Ezekiyel 33 - bura-pabir bible

Ezekiyel 33

¹Antə MTHLAKU ku gari ali ka pəla,

²“Ɓzər mda, gari aka mjir nga kara pəla, ‘Ma I akwa mwantə dləra ata kəra tsəɗi laga, antə mjir tsəɗi ni carɓəla mdə pal akwa nca ɗa, ka vəi ni tə tsa ndzi mdər sək kəra ɗa.

³Antə ma tsa ku wutə dawa akwa si, ka mbur təmbəl kamnyar tsaktə mji,

⁴antə ma mdə laga ku nggata, amma tsa aɗi psi thləm kari wa, antə dawa ni si ka tsi ni, watsəɓər bikər mtərni ata ndzi ata kərari surni.

⁵Təng tə tsa ku nggatə kuraka təmbəl ni amma tsa aɗi vədzə hangkalari wa, to, watsəɓər bikər mtərni ata ndzi ata kərari. Ma tsa an vədzə hangkalari, sakani tsa ata msərantə kərni.

⁶Amma ma mdər sək ni ku wutə dləra akwa si, antə tsa aɗi mbur təmbəl ni wa, antə dlər ni ku si ka kəl mpika mdə pal akwa nca ɗa, mpika mdə ndaga ata təra kamnyar bikərni, amma watsəɓər bikər tsi mdə ni ata ndzi ata kəra mdər gadi ni.’ ”

⁷“Antə kulini, gə na ɓzər mda, I vəi nga mdər sək kəra mjir Israila. Antə psi thləma ga, ka gə hamta ala ɗa tsaktədzi ngəni akəli ni.

⁸Ma I ku pəla aka mdə na kəmanggar abbər ‘Kəmanggar, jiri ga ata mta,’ antə ga aɗi gari alari abbər ka tsa zhar surhararni ni wa, to, kəmanggar ni ata mta akwa bikərni, amma I ata tam nga kamnyar watsəɓər bikər mtərni.

⁹Amma ma ga ku tsaktə mdə na kəmanggar ni abbər ka tsa zhar surhararni ni, amma tsa an aɗi zhar wa, to, tsa ata mta akwa bikərni, amma ga ku msərantə kər nga.”

¹⁰Antə Hyel pəla ali, “Ar nga, gə na ɓzər mda, pəla aka mjir Israila abbər, ‘Giri akwa pəla, nggyarɗəkurər yeru ka bikayeri ar yeru ku ngka ata kəra yeru, har yeru akwa hila kamnyar ɗa. Apa madi tə yeru ata mzhi ndzi ka mpikə ri?’

¹¹‘Pəla ala ɗa abbər, I na MTHLAKU na ka Duna ta Shang akwa kahyel abbər jiri, I aɗi ana nggatə msərakur mtər mdə na kəmanggar wa. I ana bara kəi wuta abbər mdə na kəmanggar ku zhar surhararni, ka tsa ndzi ka mpika. Ngka giri! Ngka giri kazhar sur hara giri na ɗimi ni! Kamnyar mi tə giri ata bara mtə ri, mjir Israila?’

¹²Antə kulini, gə na ɓzər mda, pəla aka mjir nga abbər, ‘Ɓɗakkur tə mdə na pwa hara aɗi ata msərantə ni ma tsa ku baɗitə hara biku wa, tsuwa kəmanggarkur tə mdə na kəmanggar hara aɗi ata ndlamta ni ma tsa ku zhar hara kəmanggarkur wa. Tsuwa ma mdər hara ɓɗakkur ku ləkwa hara biku, to ɓɗakkurərni ni aɗi ata hara ka tsa ndzi ka mpikə wa.

¹³Wala ma I ku pəla aka mdər hara ɓɗakkur abbər jiri tsa ata ndzi ka mpika, ma har tsa ku hara biku, mda aɗi ata ɗangtə wala su pal akwa nca suayeri na ɓɗakɓɗaku tə tsa hara ni wa, amma akwa biku tə tsa hara ni antə tsa ata mta.

¹⁴Tsuwa wala tə I ku pəla aka mdə na kəmanggar abbər jiri tsa ata mta, ma har tsa ku zhar hara biku ka ləkwa hara su tə tsawa thlamta, ka hara su kalkal,

¹⁵ma mdə na kəmanggar ni ku ngka ka su tə mdə vəi adzə ni ata vəya təpa aka mthlakari, ka ngka ka su tə tsa dlutsa akwa thla laku, ka nu tsawayeri ar ndzi ka mpika, kula hara biku, to, jiri tsa ata ndzi ka mpika, tsa aɗi ata mtə wa.

¹⁶I ata fwari ata kəra shanga bikayeri tə tsa hara ni. Təng tə tsa ku hara su tə tsawa thlamta ka hara su na kalkal, to, jiri tsa ata ndzi ka mpika.’ ”

¹⁷“Amma wala apani, mjir nga akwa pəla, ‘Su tə MTHLAKU akwa harari ni aɗi kalkal wa!’ Amma su tə da akwa harari an kalkal wa.

¹⁸Ma mdər hara ɓɗakkur ku zhar hara ɓɗakkur, ka ləkwa hara biku, tsa ata mta kamnyari.

¹⁹Tsuwa ma mdə na kəmanggar ku zhar kəmanggarkurərni, ka hara su tə tsawa thlamta, akwa hara su kalkal, to, tsa ata ndzi ka mpika.

²⁰Amma wala apani giri, na mjir Israila, akwa pəla, ‘Su tə MTHLAKU akwa harari ni aɗi kalkal wa.’ Antə I ata hara shariya aka waskəi, kalkal ka su tə tsa hara.”

²¹Akwa vir na ntəfkur ar thliya na kumkur akwa məva na kumnya suɗkur, antə mdə laga na msər kazhar Urushalima si ka pəla ali abbər, “Bərni ni ku ndla.”

²²Tsuwa vir nda tahaku akəmata mdə ni asi, MTHLAKU ku ni dunarni. Antə tsa kəlar mnyi sakatə mdə ni si adzə ra ɗəɗəpə ni, antə mnyi ku kəlardzi, tə I aɗi ndzi ka mnyi ɓdləɓdləɓari kəra wa.

²³Antə MTHLAKU ku gari ali ka pəla,

²⁴“Ɓzər mda, mji na ka ndzi akwa vəyayeri tə mdə hilanta akwa tsəɗi Israila ni akwa pəla, ‘Ibrahim an mdə duku, amma wala apani tsa ku ndzi mthlakər tsəɗi ni shang. Amma ar mburu mburu hang, antə kulini mdə ku hamta tsəɗi ni ala mburu ka mburu an ndzi mthlakari.’

²⁵Antə apani kara pəla ala ɗa su tə I na MTHLAKU na ka Duna ta Shang akwa pəlari abbər, ‘Təng tə giri akwa ɓɗə kum ka mamshi, ka vəngkər səli aka haptayeri, ka tsi mda, giri tamata abbər giri an ata ndzi mthlakər tsəɗi ni ya?

²⁶Giri ku vəkər ka katsakarayeri ar giri, ka hara sur cika hang, har ka hara adiyakur ka mwalar ntəwulər giri, antə ba kulini ka giri jaktə ndzi mthlakər tsəɗi ni ya?

²⁷Pəla ala ɗa abbər I na MTHLAKU na ka Duna ta Shang akwa pəla abbər jiri, apatə I aɗi, mji na akwa vəyayeri tə mdə hilantə ni mda ata tsəgəi ɗa akwa mpa. Tsuwa mji na ka ndzi akwa mtaku I ata hamta ɗa aka mwaɓi mtaku ka da ɓɗəmnya ɗa. Antə mji na akwa vəi ɗuwardzi ka na akwa kuayeri shilku an ata kurəmta ɗa.

²⁸I ata namtə tsəɗi ni ka tsa ndzi fya ka su hilhila, tsuwa duna tə tsa ana gayari ni ata kura. Antə garayeri ar Israila ata ndzi fya har tə mda aɗi na ata nggitə təramta akwa wa.

²⁹Ma sakatə I ku namtə tsəɗi ni tə tsa ndzi fya ka su hilhila, kamnyar shanga sur cika tə da harata, antə da ata sənda abbər I an MTHLAKU.’ ”

³⁰Antə MTHLAKU pəla, “Ar nga, gə na Ɓzər mda, mjir nga akwa gari ata kəra ga adzə dza məciɓər bərni ni. Tsuwa akwa nyarfayeri da akwa gari akadzi waskəi ka ɓzərma'ni, akwa pəla, ‘Sər giri usa, ka mburu ra ngga labar na thlata akəla MTHLAKU ni.’

³¹Antə da ana si adzə nga apatə mji ana si hwatu, ka ndzəndzi akəma ga apa mjirna na jirari. Da ana nggatə su tə ga ana pəla, amma da aɗi ata harari wa. Kamnyar ata kyanggyara ɗa, da ana ncanta abbər da hir ra, amma hangkala ɗa akwa bara riɓa akwa laku na dlərpu.

³²Antə ga ku ndzi ala ɗa apa mdər hara har hirdzi na ka kurakari msəra, ka na asəndə tsa su msəra. Kamnyar da ana ngga shanga su tə gə pəla, amma da aɗi ata harari wa.

³³Antə ma sakatə su ngəni ku si, kamnyar jiri tsa ata si, sakanda antə da ata sə sənda abbər naɓi ku ndzi akwa nca ɗa.”