Read bura-pabir Ezekiyel 34 Bible Online

Ezekiyel 34 - bura-pabir bible

Ezekiyel 34

¹Antə MTHLAKU gari ali ka pəla,

²“Ɓzər mda, hara naɓikur ata kəra mjir ɓəla ar Israila, kara pəla aka mjir ɓəla ar Israila abbər, I na MTHLAKU na ka Duna ta Shang akwa pəla, sha ku wutə giri, giri na mjir ɓəla ar Israila, kamnyar giri ana wulwul kər giri daci! Aɗi kalkal ka mjir ɓəla wulwul təmar ɗa wa ya?

³Giri ku səm su ka mal ka mal, ka ha ləptu tə mdə nam ka shishir təmayeri ni, ka tsəgəi na təksətəksayerari, amma giri aɗi ana na susəma aka təmayeri ni wa.

⁴Giri aɗi ana dunautə mji na kula duna wa, wala mbantə mji na nggawa nggawa wa, wala mbwi mbəlka mji na ku dəkəidzi wa, wala ngka ka mji na ku sha akwa laku wa, wala pakə mji na ku mji na ku sha wa. Ata vəyari, giri ana hara kuthlikur ata kəra ɗa ka mpa ka mwavərkur.

⁵Antə apani da ku titiləmtadzi kamnyar tə mdər ɓəla aɗi wa. Antə da ku ndzi susəma aka shanga mwaɓi mtaku.

⁶Antə təmayeri arna ku titiləmtadzi, ka mwari akwa kadla ata kəra shanga garayeri kəga ɗəɗəgəlayeri. Da ku titiləmtadzi akwa kəlara bwa ata kəra duniya, tsuwa mdər pakə ɗa aɗi wa.”

⁷“Kamnyar ngəni giri na mjir ɓəla, psi giri thləma giri aka ndərər MTHLAKU.

⁸Apatə I aɗi, I na MTHLAKU na ka Duna ta Shang akwa pəla, təmayeri arna ku ndzi susəmər mwaɓi mtaku, kamnyar tur mdər ɓəla, tsuwa kamnyar tə mdər ɓəla aɗi na ku ra pakə ɗa wa. Mjir ɓəla ni akwa səm msəra, amma da aɗi akwa na susəma aka təmayeri arna.

⁹Antə apani, giri na mjir ɓəla, psi gir thləma giri aka ndərər MTHLAKU.

¹⁰I na MTHLAKU na ka Duna ta Shang akwa pəla, I ku nggəlar giri, antə I ata yu təmarna akəla giri, tsuwa giri aɗi ata ndzi mjir ɓəla təmayeri ni kəra wa, tsuwa giri na mjir ɓəla ni aɗi ata ɓəla kər giri kəra wa. I ata mbulɓəla təmarna akwa mnya ɗa, da aɗi ata ndzi susəmər ɗa kəra wa.”

¹¹“I na MTHLAKU na ka Duna ta Shang akwa pəla, I ka kəri surna an ata nu dəlpa təmarna ni, kəi paktə ɗa.

¹²Apatə mdər ɓəla ana ra pakɓəla ciɓərni, akwa sakatə təmayeri arni laga ku titiləmtadzi akwa mtaku antə I ata pakɓəla təmayeri arna. I ata mbuli ɗa, kəi fata akwa vəyayeri tə da titiləmtadzi akwa vir zhimaru ka kuthlə na pələku ni, kəi ngka ka da akwa ciɓa.

¹³I ata fwaɓəla ɗa akwa nca durayeri, akwa tsəɗiyayeri na akwa duniya, kəi səntə ɗa ka tsaptə ɗa ata kəma duku akwa tsəɗiyir kəra ɗa. Tsuwa I ata mwantə ɗa akwa vəi ɓəla na ɓɗaku ata kər garayeri ar Israila, ka ata mnya zərkayeri, ka akwa shanga vəyayeri tə mji akwa tsəɗi ni.

¹⁴I ata mwantə ɗa akwa vəi ɓəla na ɓɗaku. Apani kəra garayeri ar Israila an ata ndzi vəi ɓəlar ɗa. Anda antə da ata pəpəi ka ghərəmtaghəra ata kəra kusar vəi ɓəla na ɓɗaku, ka da ɓɗə kusar na lapiya na ata təksantə ɗa ata kəra garayeri ar Israila.

¹⁵I ka kəri surna an ata ndzi mdər ɓəla təmayeri ni, antə I ata mwantə ɗa akwa vəi na ɓɗaku ar ghərəmtaghəra. I na MTHLAKU na ka Duna ta Shang an pəla.

¹⁶I ata pakə na ku sha, kəi ngka ka pəramta akwa laku, kəi mbwi mbəlka na ku dəkəidzi, kəi dunautə na kula duna, amma na təksətəksayerari ka na ɓəɓal ɓəɓal, I ata kurəmta ɗa. I ata ndzi ka jirkur akwa ɓəla ɗa.”

¹⁷“Ar giri, giri na ciɓərna, I na MTHLAKU na ka Duna ta Shang akwa pəla, I ata hara shariya akwa daɓwa təma ka təma nvwani, ka akwa daɓwa gamayeri ka nciwayeri.

¹⁸Giri amzhi ɓɗə kusar na lapiya ni ka ndzəndzi daci wa ya, tə tar ka giri ntsəntsarəmta kusar na ku mbiləmta ka səla giri ni? Tsuwa ma sakatə giri ku sa yimi na ɓɗaku, kalkal ya ka giri hwathtə mbila yimi ni ka səla giri?

¹⁹Tsuwa kalkal ya ka mambila təmayeri arna ɓɗə kusar tə giri ntsəntsartə ni, ka sa yimi tə giri hwathtə kutari ka səla giri ni?”

²⁰“Kamnyar ngəni I na MTHLAKU na ka Duna ta Shang akwa pəla, I ka kəri surna an ata hara shariya akwa daɓwa təmayeri na təksətəksari ka təmayeri na tegtegari.

²¹Təng tə giri na ka dza ana bukəmta na kula duna ka thlimbəla giri kəga pathlaha giri, ka dlər na kula duna ka təmbəla giri, har ka giri titiləmta ɗa.

²²I ata mbantə ciɓərna, antə da aɗi ata ndzi susəmər mwaɓi mtaku kəra wa. Tsuwa I ata hara shariya akwa daɓwa təma ka təma nvwani.

²³I ata vəi mdər ɓəla duku ata kəra ɗa, natə tsa an buɗarna Dauda, antə tsa ata na ɗa susəma. Antə tsa ata ndzi mdər ɓəla arɗa.

²⁴Antə I na MTHLAKU ata ndzi Hyelər ɗa, antə buɗarna Dauda ata ndzi kuthlir ɗa.”

²⁵“I ata mbwi alkawal ar msərakur ka da, kəi kədləmta mwaɓi mtaku na mwavər mwavər kazhar tsəɗi ni, kamnyar ka da ndzi lapiya akwa mtaku, ka heni lapiya akwa kuɓər nfwa.

²⁶I ata namtə ɗa ka shanga vəyayeri na kalaktə garərna ka da ndzi ka barka. Tsuwa I ata hamta ala ɗa yimərhyel akwa sakari.

²⁷Antə nfwayeri na akwa fakər ɗa ata ya, tsuwa di ata ya su. Antə da ata ndzi lapiya akwa tsəɗiyir ɗa. Antə da ata sənda abbər I an MTHLAKU ma sakatə I ku ɓələmta gangər bwanikurər ɗa, ka msərantə ɗa akəla mji na vu ɗa akwa mafakur ni.

²⁸Antə da aɗi ata jaktə ndzi susəma aka mjir tsəɗiyayeri damwa wa, wala ka mwaɓi mtaku jaktə ɓɗə ɗa wa. Da ata ndzəndzi lapiya, kula su na ata thlivərantə ɗa.

²⁹I ata hara ka fakayeri arɗa ya su hang ka duna ta mi asə jaktə kurəmta ɗa akwa tsəɗi ni. Tsuwa mjir tsəɗi damwa aɗi ata jaktə wutə sur nggəl ɗa kəra wa.

³⁰Antə da ata sənda abbər I na MTHLAKU na Hyelər ɗa, an ata vəi duku ka da, ka tsuwa abbər da na mjir Israila an mjirna. I na MTHLAKU na ka Duna ta Shang an pəla.

³¹Antə giri an təmarna, təmar vəi ɓəlarna, antə I an Hyelər giri. I na MTHLAKU na ka Duna ta Shang an pəla.”