Read bura-pabir Ezekiyel 35 Bible Online

Ezekiyel 35 - bura-pabir bible

Ezekiyel 35

¹Antə MTHLAKU gari ali ka pəla,

²“Ɓzər mda thlentə kəma ga təbwar Gar Seyir, ka gə hara naɓikur ata kərari,

³kara pəla alari, “ ‘I na MTHLAKU na ka Duna ta Shang akwa pəla, I ku nggəlar nga, Gar Seyir, I ata haptə zwal ala ga, kəi namtə nga fya ka su hilhila.

⁴I ata ɓdləmta bərniyayeri ar nga, kəi namtə ɗa ka da ndzi fya. Antə ga ata sənda abbər I an MTHLAKU.’ ”

⁵Kamnyar təng waci antə gə nggəlar nca mjir Israila, har tə ga ku hamta ɗa kamnyar ka mdə kurəmta ɗa akwa sakar asar na kəl ɗa, sakatə mda akwa ɗi na akwa tsikərari.

⁶Antə I na MTHLAKU na ka Duna ta Shang akwa pəla, apatə I aɗi, I ata hamta nga aka mta, antə mta ata nu nga. Təng tə ga aɗi ana nggəlar pumta mamshi wa, to mta ata nu nga.

⁷I ata hara ka Gar Seyir ndzi fya, ka tsa ndzi su hilhila. Tsuwa I ata tsi kəlara mdə na ata si ka təramta akwa tsa.

⁸I ata hartə kəra garayeri ar nga ka mshiyayeri. Mji tə mdə ku tsi, mda ata pumta mshiyir ɗa ata kəra ɗəɗəgəlayeri, ka akwa mularayeri, ka akwa shanga kuta zərkayeri ar nga.

⁹I ata hara ka gə ndzi fya ba saka madi, antə mda aɗi na ata jaktə ndzi akwa bərniyayeri ar nga kəra wa. Apani antə ga ata sənda abbər I an MTHLAKU.

¹⁰“Kamnyar ga ku pəla, ‘Tsəɗiyayeri ngəni suɗə ni, watau tsəɗi Israila ka tsəɗi Yahuda, japu ata ndzi arna, antə yeru ata ndzi mthlakər ɗa,’ wala tə I na MTHLAKU akwa nca ɗa,

¹¹antə apani, I na MTHLAKU na ka Duna ta Shang akwa pəla, apatə I aɗi, I ata ngkərta ala gə su, ata kəra ɗəffə bwarbwarkur ka səlka, tə gə ncanta ala ɗa kamnyar nggəlar nca ɗa ni. Antə I ata ncaɓəla kərna ala ɗa akwa sakatə I ata ɗi nga.

¹²Antə ga ata sənda abbər, I na MTHLAKU, ku nggatə shanga nggəl tə gə hara ata kəra garayeri na ar Israila, sakatə gə pəla, ‘Mdə ku hilantə ɗa, antə da ku ndzi su hilhila! Mdə ku hamta ɗa ala yeru ka yeru kwasəmnya ɗa!’

¹³Tsuwa ga ku haptə kəra ga ka mnya ɗimi ata kəri, ka kəɗar jikamnya ata kəri, tsuwa I ku nggati.”

¹⁴I na MTHLAKU na ka Duna ta Shang akwa pəla, “I ata namtə nga ka gə ndzi su hilhila, antə mjir duniya shanga ata hara kucali ata kəra hilər ngə ni,

¹⁵tsu apatə ga ku hara kucali sakatə mdə hilantə tsəɗi Israila tə ndzi fya. Antə apani I ata ngkərta ala gə su. Ga ata ndzi fya, gə na Gar Seyir, ka shanga Edom. Antə apani da ata sənda abbər I an MTHLAKU.”