Read bura-pabir Ezekiyel 36 Bible Online

Ezekiyel 36 - bura-pabir bible

Ezekiyel 36

¹“Antə ar nga, gə na ɓzər mda, ka gə hara naɓikur aka garayeri ar Israila, kara pəla, ‘Giri na garayeri ar Israila, psi gir thləma giri aka ndərər MTHLAKU.

²I na MTHLAKU na ka Duna ta Shang akwa pəla, təng tə dawayeri ku pəla, “Yauwa ku hara ja! Kulini garayeri na waci ni ku ndzi ar mburu!” ’ ”

³Antə apani kara hara naɓikur, kara pəla, “I na MTHLAKU na ka Duna ta Shang, akwa pəla, nggədza kulini dawayeri ar giri ku namtə giri tə giri ndzi fya. Da ku hadləmta giri akwa kəlara bwa, har tə tsəɗiyayeri na kalaktə giri ku ndzi mthlakər giri, antə giri ku ndzi sur ngkər aka mji, tə mji akwa gha giri tədəku.

⁴Antə apani, giri na garayeri ar Israila, psi gir thləma giri aka ndərər MTHLAKU na ka Duna ta Shang. I na MTHLAKU na ka Duna ta Shang akwa pəla ala giri, giri na garayeri, ka ɗəɗəgəlayeri, ka zərkayeri, ka mularayeri, ka fyayeri na ku higəlantədzi, ka bərniyayeri tə mji ku hwi kazhari, giri na ku ndzi susəmər mji, ka sur kumshi aka shanga tsəɗiyayeri na kalaktə giri.

⁵I na MTHLAKU na ka Duna ta Shanga akwa pəla, I akwa gari ka ɗəffə bwarbwar kamnyar səlkər shanga mambila tsəɗiyayeri ni, apa mjir tsəɗi Edom ma wa, kamnyar da ku kətə tsəɗiyirna, ka ndzi mthlakari, ka hara kucali ka ɗəffa ɗa shang, ka rutə na ɗimi, abbər da ku fatə danggar ar su.”

⁶“Antə ka gə hara naɓikur ata kəra Israila, kara pəla aka garayeri, ka ɗəɗəgəlayeri, ka zərkayeri, ka mularayeri, abbər I na MTHLAKU na ka Duna ta Shang akwa pəla, ‘Nggədza I akwa gari ka ɗəffu ar səlka kamnyar hirkur tə I kəgari kamnyar giri, kamnyar nggəl tə giri sa akəla mji nayeri ni.

⁷Kamnyar ngəni, I na MTHLAKU na ka Duna ta Shang akwa kahyel abbər tsəɗiyayeri na kalaktə giri ni, da ma da ata sa nggənggəla.’ ”

⁸“Amma ar giri, giri na garayeri na akwa Israila, giri ata hara tsi, ka giri ya aka mjirna Israila. Kamnyar aɗi ata fəi wa da ata ngka avi.

⁹Kamnyar nggədza, I kamnyar giri, antə I ata shinar kəmi təbwar giri ka ɓɗakkur, antə mda ata kukultə giri, ka mdə thləkatə giri.

¹⁰Antə I ata hara ka mjir Israila yatədzi hang ata kəra giri, kəi vu ka bərniyayeri nghyi ka mji, har ka mdə jaktə hənɓəla vəyayeri na ku ndzi fi ni.

¹¹I ata hara ka mji kəga mwaɓiyayeri yatədzi hang ata kəra giri. Antə da ata jakjaka ka yatədzi. I ata hara ka mji jaktə nghyantə giri apa akwa sakayeri na təramta waci, kəi hara ala giri ɓɗakkur na ata təramta na waci. Antə giri ata sənda abbər I an MTHLAKU.

¹²Jiri, I ata hara ka mji mwa ata giri, mjirna Israila, ka da ndzi mthlakər giri antə giri ata ndzi kifa arɗa, tsuwa giri aɗi ata jaktə kwasəmnya maɗa' ɗa wa.”

¹³I na MTHLAKU na ka Duna ta Shang akwa pəla, mji ana pəla ala giri abbər, “Giri ana kwasəmnya mji, ka famnya maɗankyar kazhar tsəɗiyir giri.

¹⁴Amma kulini giri aɗi ata jaktə kwasəmnya mji kəra wa, wala famnya maɗa' tsəɗiyir giri kəra wa. I na MTHLAKU na ka Duna ta Shang an pəla.

¹⁵Tsuwa I aɗi ata zhar ka mji jaktə nggəl giri kəra wa, wala zhar ka mji kəli səli giri kəra wa, wala zhar ka su laga hara ka tsəɗiyir giri ndla kəra wa. I na MTHLAKU na ka Duna ta Shang an pəla.”

¹⁶Antə MTHLAKU ku gari ali ka pəla,

¹⁷“Ɓzər mda, sakatə mjir Israila akwa ndzi akwa tsəɗiyir ɗa, da ku diɓərantə tsəɗi ni atar surharar ɗa. Sur hara ɗa akəmi ndzi apa adiyakur mdə mwala akwa sakar kəcirni.

¹⁸Antə I pumta ɗəffə bwarbwarkurərna ata kəra ɗa kamnyar mamshi tə da pumta akwa tsəɗi ni, ka tsuwa kamnyar tə da ku diɓərantə tsəɗi ka haptayeri arɗa.

¹⁹I ku titiləmta ɗa akwa nca durayeri ka ɓucimta ɗa bamama akwa tsəɗiyayeri. I thlamta ala ɗa shariya na kalkal ka halər ɗa ka surharar ɗa.

²⁰Amma kəlara bwa tə da ku mwari akwa, da ana ɓzamtə thləmi na ɓɗakkarkara, kamnyar tə mji ana ngkər ɗa abbər, ‘Nayeri ni an mjir MTHLAKU, amma wala apani tar tə da ləɓəla kazhar tsəɗiyirni.’

²¹Amma I ku damitədzi kamnyar thləmi na ɓɗakkarkara, natə mjir Israila akwa ɓzamtari akwa tsəɗiyayeri tə da mwari akwa ni.”

²²Antə kulini pəla aka mjir Israila abbər I na MTHLAKU na ka Duna ta Shang pəla, abbər aɗi kamnyar giri wa, giri na mjir Israila, tə I ata hara su ngəni wa, amma kamnyar thləmi na ɓɗakkarkara natə giri ɓzamta akwa tsəɗiyayeri tə giri mwari akwa ni.

²³I ata kəcimta thləmi na ku tuwa ka duna tə giri ɓzamta akwa tsəɗiyayeri ni, antə da ata sənda abbər I an MTHLAKU, ma sakatə I ku ncaɓəla ala ɗa atar giri abbər jiri thləmi ni an ɓɗakkarkara. I na MTHLAKU na ka Duna ta Shang an pəla.

²⁴Kamnyar I ata fwaɓəla giri akwa nca durayeri, ka akwa tsəɗiyayeri na akwa duniya, kəi ngka ka giri ka tsaptə giri akwa tsəɗiyir giri.

²⁵I ata pshingkər yimi na ɓɗaku ata kəra giri, antə giri ata kəcimtadzi ka ndzi kəcəkəcari kula diɗi. Tsuwa I ata ndəkəmta giri ka nu haptayeri ar giri.

²⁶I ata hamta ala giri ɗəffu na bilən, kəi vu mambəl bilən akwa ɗəffa giri. I ata kəɓəla ɗəffu na ɓəɓal apa pela akwa ɗəffa giri ni kəi hamta ala giri ɗəffu na ar kum ka mamshi.

²⁷I ata vu mambələrna akwa ɗəffa giri, kəi wuta abbər giri ku nu tsawurna, ka vu hangkala giri akwa ɓəla suayeri tə I thlamta abbər ka mdə hara.

²⁸Antə giri ata ndzəndzi akwa tsəɗi natə I hamta aka kəkayeri ar giri ni. Giri ata ndzi mjirna, antə I ata ndzi Hyelər giri.

²⁹I ata mbantə giri ta shanga adiyakur ar giri. Tsuwa I ata hara ka mthli ya hang, kəi ngkatə ta mi ajaktə tsəkwar giri.

³⁰I ata vu ka yar nfwa ka yar sur fakəu hara hang ka duna kamnyar ta giri asə jaktə ɗar bwaniyir mi, ka ləkwa sur səli akwa nca mji.

³¹Sakanda antə giri ata ɗangtə sur hara giri na ɗimi ni, ka suayeri na aɗi ɓɗaku wa tə giri hara. Antə giri ata cikə kər giri kamnyar bikayeri ka shanga suayeri tə giri hara na ku ndzi sur cika.

³²Mjir Israila, ka giri sənda abbər aɗi kamnyar ɓɗakkurər hala giri antə I ata hara su ngəni wa. I akwa bara ka giri nggatə səliyir surharar giri ni ka giri ndatədzi. I na MTHLAKU na ka Duna ta Shang an pəla. I na MTHLAKU na ka Duna ta Shang an pəla.

³³I na MTHLAKU na ka Duna ta Shang akwa pəla, “Ma vir tə I ku kəcimta shanga bikayeri ar giri, I ata zhar giri ka giri ndzəndzi akwa bərniyayeri ar giri ka damwa, tsuwa vəyayeri na ku ndzi fya giri ata jaktə hənɓəla ɗa.

³⁴Antə fakayeri ar giri na ku ndzi shizha mda ata jaktə kukultari, ata vəya ka tsa ləkəma ka ndzi shizha ata nca mjir təramtar laku ni.

³⁵Antə apani mjir təramtar laku ni ata pəla, ‘Faku ngəni na ndzi shizha waci ni kulini ku sə ngka apa gadina ar Eden, tsuwa bərniyayeri na ndzi fya ka higəlantədzi waci ni kulini ku sə nghyantədzi ka mji har mdə ku gartə ɗa ka məciɓa.’

³⁶Antə mji na ku mbila akwa tsəɗiyayeri na kalaktə giri ata sənda abbər I na MTHLAKU an hənɓəla vəyayeri na higəlantədzi ni, ka thləkatə fakayeri na ndzi shizha ni. I na MTHLAKU an gari ni, antə I ata haratari.”

³⁷I na MTHLAKU na ka Duna ta Shang akwa pəla, “Tsuwa I ata zhar mjir Israila ka da yu ra suayeri tə I ata hamta ala ɗa amsari. I ata hara ka da yatədzi hang apa bəri təma,

³⁸apa ciɓər təma tə mdə vəi kamnyar thla saɗaka, apa bəri təma ahar Urushalima akwa sakar kucalayeri tə mdə thlamta. Apani antə bərniyayeri na ndzi fi ni ata sə nghyantədzi ka mji dlama dlama. Antə da ata sənda abbər I an MTHLAKU.”