Read bura-pabir Ezekiyel 37 Bible Online

Ezekiyel 37 - bura-pabir bible

Ezekiyel 37

¹Aghəla saka laga antə I nggatə dunar MTHLAKU səghəi ata kəri, tə tsa kəɓəla ra atar mambələr MTHLAKU, ka kətə ra ka ra vəi ra aghəi akwa mular laga na nghyinghyari ka ɗethlu.

²Antə tsa pwar ra akwa nca ɗa shang. Da ku hara hang ka duna akwa mular ni, tsuwa shanga ɗa ul'ulari swaiswai.

³Antə tsa pəla ali, “Ɓzər mda, ɗethlayeri ngəni ata mzhi jaktə ndzi ka mpikə ya?” Antə I shinau alari ka pəla, “MTHLAKU na ka Duna ta Shang, gə shinga an asənda!”

⁴Antə tsa jaktə pəla ali, “Hara naɓikur aka ɗethlayeri ngəni, kara pəla, ‘Giri na ɗethlu ul'ula, psi giri thləm aka su tə MTHLAKU akwa pəlari.’

⁵I na MTHLAKU na ka Duna ta Shang akwa pəla aka ɗethlayeri ngəni abbər, ‘I ata vu ka mpika ləkwa kuta giri antə giri ata jaktə ndzi ka mpika.

⁶I ata puta ala giri pərɗayeri, kəi vu ka kum hartə giri, kəi hartə kəra giri ka kəsəm, kəi vu mpika akwa kuta giri, antə giri ata ndzi ka mpika. Antə giri ata sənda abbər I an MTHLAKU.’ ”

⁷Antə I hara naɓikur apatə tsa ku tsawa ali. Sakatə I tsu akwa hara naɓikur ni antə I nggatə kuraku laga akwa ndəra, kuraka su laga an akwa ndəkəla tyetya tyetya. Antə ɗethlayeri ni ku paktədzi kəga nvwa ɗa, ka dethhədzi ɗethlu ka ɗethlu.

⁸I tsu akwa wulari, təng nggədza pərɗayeri ata da, ka kəsəm na hartə kəra ɗa. Amma mpika aɗi akwa da wa.

⁹Antə tsa pəla ali, “Hara naɓikur aka mpika! Hara naɓikur, gə na ɓzər mda, kara pəla aka mpika abbər, I na MTHLAKU na ka Duna ta Shang akwa pəla, ‘Gə na mpika, thlata akwa kuɗəmayeri nfwar kara si, ka gə mpika ata kəra mshiyayeri ngəni, kamnyar ka da ndzi ka mpika.’ ”

¹⁰Antə I hara naɓikur ni tsu apa tə tsa ku tsawa ali. Antə mpikə ni ku ləkwa dza ɗa, antə da ku ndzi ka mpika, ka thləthlata ata səla ɗa. Antə da ndzi mji dlama dlama.

¹¹Antə tsa pəla ali, “Ɓzər mda, ɗethlayeri ngəni an mjir Israila shang ata kəma duku. Kamnyar da akwa pəla ‘Ɗethlayeri ar yeru shang ku ulantədzi, antə yeru aɗi ka vəkər ka su kəra wa. Mdə ku kuri ka yeru karkar.’

¹²Antə ka gə hara naɓikur ala ɗa, kara pəla, I na MTHLAKU na ka Duna ta Shang akwa pəla, ‘Mjirna Israila, I ata mburəmta kulayeri ar giri, ka fwaɓəla giri akwa kulayeri ni. I ata ngka ka giri avi akwa tsəɗi Israila.

¹³Ma sakatə I ku mburəmta kulayeri ar giri, ka fwaɓəla giri, antə giri na mjirna, ata sənda abbər I an MTHLAKU.

¹⁴Antə I ata vu mambələrna akwa dza giri, antə giri ata ndzi ka mpika, kəi ra pwi giri akwa tsəɗiyir kəra giri. Apani antə giri ata sənda abbər I na MTHLAKU an gari ni, antə I ku harata. I na MTHLAKU an pəla.’ ”

¹⁵Antə MTHLAKU gari ali ka pəla,

¹⁶“Ɓzər mda, kətə zwal ka gə rəbuta ata abbər, ‘Kamnyar Yahuda, ka maɗa' Israila na ku paktə kər ka tsa.’ Ka gə kətə zwal damwa kara rəbuta ata abbər, ‘Kamnyar Yusuf, watau zwalər Ifrayim ka shanga mjir Israila na ku paktə kər ka tsa.’

¹⁷Ka gə dethtə ɗa ka da ndzi zwal pal, kamnyar ka da ndzi duku akwa tsiya ga.

¹⁸Antə ma sakatə mjir nga ku yu nga abbər, ‘Ga aɗi ata ncaɓəla ala yeru karapur suayeri ngəni wa ya?’

¹⁹Ka gə pəla ala ɗa abbər I na MTHLAKU na ka Duna ta Shang akwa pəla abbər, I akwa bara kətə zwalər Yusuf, na akwa tsiya Ifrayim ni, ka nyarmbwayeri na akwa Israila na ku paktə kər ka tsa, kəi paktə ni ka zwalər Yahuda, kəi namtə ɗa ka da ndzi zwal duku, kamnyar ka da ndzi su duku akwa tsi.

²⁰Ka gə kəsi zwalayeri ngəni suɗə tə gə rəbuta ata ni akwa tsiya ga ata nca ɗa,

²¹ka gə pəla ala ɗa abbər, I na MTHLAKU na ka Duna ta Shang akwa pəla, I ata fwaɓəla mjir Israila akwa tsəɗiyayeri tə da təra mwari akwa, kəi fatə ɗa akwa kəlar bwa kəi səntə ɗa akwa tsəɗiyir kəra ɗa, ka da ndzi ata kəma duku.

²²I ata hara ka da ndzi tsəɗi duku akwa tsəɗi ni, ata kəra garayeri ar Israila. Antə kuthli duku an ata ndzi ata kəra ɗa shang, da aɗi ata ndzi tsəɗiyayeri zumzum suɗa kəra wa, wala jaktə ndəkəmtadzi ka ndzi kuthlikurayeri suɗə wa.

²³Tsuwa da aɗi ata jaktə diɓərantə kərɗa ka haptayeri arɗa, wala suayeri na adiya kəra wa, wala jaktə hilantə kərɗa akwa hara bikayeri wa. Kamnyar I ata mbantə ɗa akwa shanga vəyayeri tə da pəramta akwa ka hara biku, kəi kəcimta ɗa, antə da ata ndzi mjirna antə I tsuwa ata ndzi Hyelər ɗa.”

²⁴“Antə buɗarna Dauda an ata ndzi kuthlir ɗa. Antə shanga ɗa ata ndzi akira mdərɓəla duku. Antə da ata ɓəlatə tsawayeri arna, ka vu hangkala ɗa akwa hara shanga suayeri tə I thlamta abbər ka mdə hara.

²⁵Da ata ndzəndzi akwa tsəɗi natə I hamta aka buɗarna Yakub, tsəɗi tə kəkayeri arɗa ku ndzəndzi akwa. Da ata ndzi anda ba saka madi, da kəga maɗa' ɗa shang kəga kəkayeri arɗa. Antə Dauda na buɗarna an ata ndzi kuthlir ɗa ba saka madi.

²⁶I ata mbwi alkawal ar msərakur kəga da, alkawal na ata ndzi ba saka madi. Antə I ata nci ɗa, kəi hara ka da yatədzi hang, kəi vəi Vəi Ndzəndziyirna na Ɓɗakkarkara akwa nca ɗa ba saka madi.

²⁷Vəi Ndzəndziyirna ata ndzi akwa nca ɗa. Tsuwa I ata ndzi Hyelər ɗa, antə da ata ndzi mjirna.

²⁸Apani antə mji ata sənda abbər I na MTHLAKU an kəcimta Israila, ma sakatə I ku vəi Vəi Ndzəndziyirna na Ɓɗakkarkara akwa nca ba saka madi.”