Read bura-pabir Ezekiyel 38 Bible Online

Ezekiyel 38 - bura-pabir bible

Ezekiyel 38

¹Antə MTHLAKU ku gari ali ka pəla,

²“Ɓzər mda, thlentə kəma ga təbwar Gog, kuthli na olta shang ar Meshek ka Tubal akwa tsəɗi Magog. Hara naɓikur ata kərari,

³kara pəla, I na MTHLAKU na ka Duna ta Shang akwa pəla, I ku nggəlar nga, gə na Gog, kuthli na olta shang ar Meshek ka Tubal.

⁴Antə I ata shinantə nga, kəi vu anggilku akwa mnya ga, kəi ndəkərɓəla nga ata kəma duku ka shanga sojayeri ar nga na dlama dlama, kəga takwayeri ka mjir fəl taku, shanga ɗa akwa kari ar mpa, ka partauwayeri, ka ləptər liya ar mpa, shanga ɗa mji na masəkur mpa ka katsakarayeri.

⁵Tsuwa sojayeri ar Parsiya, ka Ithliyopiya, ka Libiya aɗi akwa nca ɗa, antə shanga ɗa ka partau ka dzakwar mpa.

⁶Tsuwa Gomer ka shanga sojayeri arni na dlama dlama ni, ka sojayeri ar Beth Togarma na akwa datər tsəɗi bwar yala ka shanga sojayeri arni na dlama dlama, mji hang ata kəma duku ka ga.”

⁷Antə ɗəmhədzi, jiri, kara ɗəmhədzi, ga ka shanga mji dlama dlama na tsaptədzi ka kalaktə nga ata ɗəffu, ka gə ndzi mdər pwar ɗa.

⁸Aghəla virayeri hang, mda ata tsaptə giri. Antə azi ka məvayeri laga akəmazi, giri ata ra dlər tsəɗi tə mdə mbultsa akwa mpa, tsəɗi natə mjirni thlata akwa tsəɗiyayeri damwa, ka si ka tsaptədzi ata garayeri ar Israila. Tsa an tsəɗi na ku ɗar pi hilhilari kula ampani. Mdə fwaɓəla mjirni akwa tsəɗiyayeri, antə kulini shanga ɗa akwa ndzəndzi lapiya.

⁹Gə na Gog, ga ata ləmta. Ga ata si apa shambar yimi, apa zhimaru na ana hartə tsəɗi, ga ka shanga sojayeri ar nga kəga durayeri hang na ata kəma duku ka ga.

¹⁰I na MTHLAKU na ka Duna ta Shang akwa pəla, “Vir nda dzamayeri laga ata sə ləkwa ɗəffa ga, antə ga ata ɗəmhə su na ɗimi.

¹¹Ga ata pəla, ‘I ata ləmta kəi ra dlər kauyayeri na kula məciɓa. I ata pwa ata kəra mji na akwa ndzəndzi lapiya kula sur damita, shanga ɗa na akwa ndzəndzi akwa kauyayeri na kula məciɓa wala nyarfayeri, zhar ka sur dzəka nyarfu wa.

¹²I ata dlutsə kariyayeri arɗa, kəi famnya shanga su tə da wuta akwa mpa, kəi dlər mji na akwa vəyayeri tə mdə hilantə ni, ka mji na thlata akwa tsəɗiyayeri ka si ka tsaptədzi, mji na ka mwaɓi kəga kariyayeri damwa, na akwa ndzi ata ɗəffa duniya.’

¹³Mjir Sheba, ka Dedan, ka mjir fəli na akwa bərniyayeri ar Spen, ka shanga kauyayeri arni ata pəla ala ga, abbər, ‘Gə si ni kamnyar ka gə famnya sur yeru ya? Gə si ka sojayeri ar nga dlama dlama ni kamnyar ka da dlutsə ka famnya su, apa dinar, ka adzərfa, mwaɓi, ka kari, ka shanga bumtər su tə da wuta, ka da təra kəgari ya?’ ”

¹⁴“Antə apani, gə na ɓzər mda, hara naɓikur ka gə pəla aka Gog abbər, I na MTHLAKU na ka Duna ta Shang akwa pəla, ‘Akwa sakatə mjirna Israila akwa ndzəndzi lapiya, antə kula səndər nga, ga ata thlata

¹⁵ka zhar vəi ndzəndziyir nga na ciju abwar yala, ga ka durayeri hang na ata kəma duku ka ga, shanga ɗa ata takwayeri, sojayeri dlama dlama na ka duna.

¹⁶Antə ga ata pwa ata kəra mjirna Israila ka mpa, ga ata hartə ɗa apatə zhimaru ana hartə kəra di. Akəmazi akwa tsikərari I ata sə thlentə nga ka gə dlər tsəɗiyirna, kamnyar ka durayeri na səndə ra, akwa sakatə I ku kələmta nga, gə na Gog, ka ɓɗakkarkarkurərna akəma ɗa.’ ”

¹⁷“I na MTHLAKU na ka Duna ta Shang akwa pəla, ga an mdə tə I gari ata kərari waci atar buɗayeri arna na naɓiyayeri ar Israila, na hara naɓikur waci abbər vir laga I ata səntə nga ka gə dlər ɗa ni ya?

¹⁸Amma vir nda, akwa sakatə Gog ata səntə mpa ata kəra mjirna Israila ni, hangkali ata thlata. I na MTHLAKU na ka Duna ta Shang an pəla.

¹⁹Kamnyar akwa səlkərna ka ɗəffi na akwa mba ra, I akwa psəmnya ala giri abbər, vir nda di ata sə kənggərantədzi ka duna akwa tsəɗi Israila.

²⁰Antə kəlfayeri na akwa yimi, kəga ɗikayeri, kəga mwaɓi mtaku, ka shanga su na ka mpika na ana mwa ka kutari ata di, ka shanga mji na ata kəra duniya, ata kədza akəmi kamnyar thlivəra. Garayeri ata huzamtadzi, jikwara garayeri ata ɓəgələmtadzi ka təri, tsuwa kəlara məciɓa ata huzamtadzi ka pumtadzi ata di.

²¹I ata kəgangkər aka Gog, shanga garayeri arna ka da pwa ata kərari ka mpa, ndə I na MTHLAKU na ka Duna ta Shang. Antə waskəi akwa nca mjirni ata mpa ka nvwani.

²²Tsuwa I ata ɗi ni ka shilku ka tsəgəidzi. Tsuwa I ata pughəi yimərhyel na ata lamta di, kəga handzəkəla, kəga u'u na mwavər ka duna ata kərari, ka ata kəra mji dlama dlama na adzə ni, ka mji na tsaptədzi hang adzə ni ni.

²³Apani antə I ata ncantə olkurərna, ka ɓɗakkarkarkurərna, kəi ngkərɓəla kərna ata bəbal akəma aka mji hang. Apani antə da ata sənda abbər I an MTHLAKU.”