Read bura-pabir Ezekiyel 39 Bible Online

Ezekiyel 39 - bura-pabir bible

Ezekiyel 39

¹Antə ar nga, gə na ɓzər mda, hara naɓikur ata kəra Gog, ka gə pəla, I na MTHLAKU na ka Duna ta Shang pəla, “Nggədza kulini I ku nggəlar nga, gə na kuthli na olta shang ar Meshek ka Tubal.

²I ata shinar nga, kəi psəkəma nga, kəi mwantə nga akwa datər bwar yala, har kəi mwantə nga ata garayeri ar Israila.

³I ata tsamta laliyir nga na akwa tsi matsəkara ga, kəi vu ka afayeri ar nga puɓəladzi kazhar tsi mazəma ga.

⁴Antə ga ata təri ata kəra garayeri ar Israila, ga ka shanga mjir nga na dlama dlama, ka mji na adzə nga. I ata hamta nga aka shanga ɗikayeri na ana ɓɗə kum, ka aka mwaɓi mtaku.

⁵Ga ata təri ata bəbal, kamnyar I ku kurtə ka pəla. I na MTHLAKU na ka Duna ta Shang an pəla.

⁶I ata thlentə u'u ata kəra tsəɗi Magog, ka ata kəra mji na akwa ndzəndzi lapiya ata mnya mandayeri. Antə da ata sənda abbər I an MTHLAKU.”

⁷“I ata hara ka mdə səndə thləmi na ɓɗakkarkara ni akwa nca mjirna Israila. I aɗi ata zhar ka thləmi na ɓɗakkarkara ni hilantədzi kəra wa. Apani antə mji ata sənda abbər I an MTHLAKU, Na Ɓɗakkarkara ar Israila.

⁸Nggədza, virari akwa si! Jiri, su ni ata hara, ndə I na MTHLAKU na ka Duna ta Shang. Vir ndaga an vir tə I gari ata kər ni.

⁹“Mji na ka ndzi akwa bərniyayeri ar Israila ata ləɓəla kamnyar ra tsaptə kariyayeri ar mpa, apa partauwayeri, kəga ləptər liya ar mpa, kəga lali ka afayeri, kəga zwalayeri, kəga mwasayeri. Kariyayeri ni ata hara hang har tə mda ata mba u'u kəgari har ka mwanta aka məva murfa.

¹⁰Da aɗi ata tur mwari akwa mtaku kamnyar ra bara udzəm wa, wala tadərəmta kuɓər nfwayeri wa, kamnyar da ata mba u'u ka kariyir mpa na hang ni. Da ata mbultsə kariyir mji na mbultsə sur ɗa, ka famnya kariyir mji na famnya sur ɗa. I na MTHLAKU na ka duna ta shang an pəla.”

¹¹“Vir nda I ata hamta bəbal laga natə mda ata harəmta Gog kəga mjirni akwa Israila, akwa Mularər Mjir Lənggu, təbwar raghəi ka Manda Mtəmta. Vəi kula ndaga ata ngkatə vəi təramta aka mjir lənggu, kamnyar anda antə mda ata harəmta Gog ka shanga mjirni na dlama dlama ni. Mda ata kəga vəi ni abbər Mular ar Hammon Gog, watau Mular ar Mjir Gog na Dlama Dlama.

¹²Mjir Israila ata hara thliya murfa akwa harəmta mshiyir sojayeri ar Gog na dlama dlama ni, kamnyar ka da namtə tsəɗi ni kəcəkəcari.

¹³Shanga mjir tsəɗi an ata harəmta mshiyir ɗa. Antə vir tə I ku ncantə səliyirna, vir nda ata ndzi vir na ola ar nggyari su aka mjir Israila. I na MTHLAKU na ka Duna ta Shang an pəla.

¹⁴Akwa tsikərari mda ata carɓəla mji shili damwa na ata hara thliya murfa akwa mwa ka dlarhə shanga vəi na akwa tsəɗi ni, kamnyar harəmta mshiyir sojayeri na sə dlər tsəɗi ni, natə mshiyir ɗa ku mbila aɓəla ata kəra di, kamnyar ka da namtə tsəɗi ni kəcəkəcari ka damwa.

¹⁵Sakatə mji ngəni akwa dlarhə tsəɗi ni, ma da ku wutə kəlara ɗethlər mda, tsa ata ncidzə seɗa athlimbəlari, kamnyar ka mjir har mshi ni mzhi wutari, ka da kətə ka harəmta ni akwa Mular sojayeri ar Gog na dlama dlama.

¹⁶Tsuwa bərni laga aɗi anda na ka thləmari Hanoma, watau Dlama dlama. Apani antə da ata namtə di ni kəcəkəcari ka damwa.”

¹⁷I na MTHLAKU na ka Duna ta Shang akwa pəla, “Ar nga, gə na ɓzər mda, ndəra aka shanga ɗikayeri ka shanga mwaɓiyayeri na akwa mtaku, kara pəla, ‘Tsaptə girdzi ata kəma duku, ka giri si. Ka giri thlata akwa kəlara bwa, ka giri si akwa saɗakar kucali natə I akwa ɗəmhari kamnyar giri, tsa an saɗakar kucali na ola tə mda ata harari ata kəra garayeri ar Israila. Antə giri ata ɓɗə kum ka sa mamshi.

¹⁸Giri ata ɓɗə kumər dza sojayeri na gurjam gurjam, ka sa mamshir kuthlyayeri ar duniya, natə mdə tsəgəi apatə mda ana thlamta wulya gamayeri, maɗa' gam, wala kwi, wala gyalayeri, shanga ɗa mwaɓi na təksətəksari ar Bashan.

¹⁹Antə giri ata səm malkum har ka giri ndla, ka sa mamshi har ka kəl kəra giri, akwa saɗakar kucali tə I akwa ɗəmha ala giri ni.

²⁰Tsuwa giri ata ndlə ka kumər takwayeri, ka ar mjir fəl taku, ka kumər dza sojayeri na gurjam gurjam, ka shanga sojayeri na katsala.’ I na MTHLAKU na ka Duna ta Shang an pəla.”

²¹“I ata ncantə səliyirna akwa nca mji. Antə shanga mji ata wutə ɗya tə I ata hara aka mji, ka dunarna tə I ncanta ata kəra ɗa.

²²Baɗitə ka vir nda har ka ləkəma, mjir Israila ata sənda abbər I an MTHLAKU na Hyelər ɗa.

²³Antə mji ata sənda abbər mjir Israila mwari akwa mafakur ni kamnyar bikər ɗa, kamnyar da ku səm mdəkurərna. Apani antə I ku shinadzə bwahili ala ɗa, ka hamta ɗa akwa tsiya dawayeri arɗa, antə mdə ku kurəmta ɗa akwa mpa.

²⁴I ɗi ɗa kalkal ka adiyakur ka bikayeri tə da hara, ka shinadzə bwahili ala ɗa.”

²⁵Antə apani, I na MTHLAKU na ka Duna ta Shang akwa pəla, “Kulini I ata fwaɓəla durər Yakub akwa mafakur kəi ngka ka da akwa tsəɗiyir ɗa. I ata kətadzə shanga mjir Israila, tsuwa I ata ɓəlatə ɓɗakkarkarkurər thləmi.

²⁶Da ata fwari ata kəra sur səli na wutə ɗa, ka shanga kula jirkur tə da hara ali, ma sakatə da ku ndzəndzi akwa lapiya akwa tsəɗiyir ɗa, kula mdər thlivərantə ɗa.

²⁷Ma sakatə I ku fwaɓəla ɗa akwa tsəɗiyayeri ar dawar ɗa, ka ngka ka da ka tsaptə ɗa, atar ɗa antə I ata ncanta aka mji hang abbər jiri thləmi ni ɓɗakkarkara.

²⁸Apani antə mjirna ata sənda abbər I an MTHLAKU na Hyelər ɗa, kamnyar I an kədləmta ɗa tə da mwari akwa tsəɗiyir mafakur akwa nca durayeri damwa, ka jaktə tsaptə ɗa akwa tsəɗiyir kəra ɗa. Apani I aɗi ata zhar wala pal akwa nca ɗa ka tsa ndzi akwa tsəɗiyayeri ni kəra wa.

²⁹Tsuwa ma sakatə I ku pungkər mambələrna ata kəra mjir Israila, I aɗi ata jaktə shinadzə bwahili ala ɗa kəra wa. I na MTHLAKU na ka Duna ta Shang an pəla.”