Read bura-pabir Ezekiyel 4 Bible Online

Ezekiyel 4 - bura-pabir bible

Ezekiyel 4

¹Antə Hyel pəla, “Antə gə na ɓzər mda, kətə birku, kara vəi akəma ga, ka gə ɗahi dludzər bərni Urushalima ata.

²Ka gə kalaktə ni ka sojayeri. Ka gə həntə su laga apa bagaɗi, ka həndza alari sur fəlvi akwa katangga ni, ka latə vəi fəliyayeri ar soja adza, ka ncidzə gangayeri har ka kalaktə ni cipu.

³Ka gə kətə paranti liya kara vəi ni apa banggwa akwa daɓwa ga ka bərni ni. Kara thlentə bwakəma ga atar ni. Antə ga ata kalaktə ni ka sojayeri ar nga, antə tsa ata ndzi akira sojayeri ar nga. Ngəni ata ndzi seɗa aka mjir Israila.”

⁴“Aghəla nda ka gə pəpəi təbwar matsəkara ga, ka mdə pungkər ala gə bikər mjir Israila. Antə ga ata kətə kəgəɓkur bikər ɗa mnyar hangkur vir tə ga ata harari apəpəi ata thlimbəla gə ni.

⁵I ku hamta ala gə hangkur vir tə ga ata harari kalkal ka hangkur məvayeri ar bikər ɗa. Antə apani ga ata hara vir aru makər ka əmdləkumari akwa kəl kələr bikər mjir Israila.

⁶Aghəla tə ga ku kuri ngəni, ga ata jaktə pəpəi ka damwa, amma kulini təbwar mazəma ga, kamnyar kəl kələr bikər mjir Yahuda. Antə ga ata hara vir nfwarkumari, vir pal kamnyar kəlara məva.”

⁷“Ga ata thlentə kəma ga dwaɗu ka Urushalima natə mdə kalaktə ka mpa ni, ka tsiya gə ɗəmhəɗəmhari kamnyar mpa, ka gə hara naɓikur ata kərari abbər mda ata shamta ni.

⁸Antə I ata mbwahə nga ka səwu ta ga asə mzhi shinardzi abwa damwa, har tar ma ga ku kuri hangkur vir tə mda ata harari akwa kalaktə Urushalima ka mpa ni.”

⁹“Kətə alkama, ka barli, ka tsər, ka tsər mamza, ka yari, ka alkamar mtaku, ka gə paktə ɗa. Ka gə pu ɗa akwa tughum duku, ka gə hara buradi kəgari. An su tə ga ata səmari akwa vir ngəni aru makər ka əmdləkumari tə ga apəpəi təbwar matsəkara gə ni.

¹⁰Antə kəgəɓkur susəma tə ga ata kwasəmnyari ni tədək viri, ata ndzi shekel sərkumari, tsuwa ga ata səmari ka duku akwa kutar pci.

¹¹Tsuwa hangkur yimi tə ga ata samnyari akwa kutar pci ata ndzi apa retar kwalɓa. Tsuwa ga ata sari ka duku akwa sakatə mdə thlamta ala ga.

¹²Ga ata mbahə u'u ka civi ul'ula ar mda, ka ɓwatə buradi ni ata, ka gə kwasə ni apa kek tə mdə nam ka mpur barli, tsuwa ata nca mji.”

¹³Antə MTHLAKU pəla, “Ngəni an laku tə mjir Israila ata sə kwasə buradi arɗa na adiya akwa, akwa nca mji tə I ata mwantə ɗa akwa.”

¹⁴Antə I shinau ka pəla, “Awa MTHLAKU na ka Duna ta Shang! I aɗi ɗar ɓzamtə kərna wa. Baɗita akwa ngkyarkurərna har ka vədza aka saka ngəni, I aɗi ɗar ɓɗə kumər mwaɓi na mtə dlipa wa, wala natə mwaɓi mtaku an tsi wa, tsuwa kum na ku hili aɗi ɗar ləkwa mnyi wa.”

¹⁵Antə tsa pəla ali, “To, kalkal. I ata zhar nga ka gə ɓwatə buradi ni ata civər thla, ata vəya civər mdə ni.”

¹⁶Antə tsa jaktə pəla ali, “Ɓzər mda, I ata thlamta lakur wutə susəmər ɗa akwa Urushalima. Antə susəma aɗi ata mzhi ɗa wa, har ma tar ka mdə ngkərtə ngkərta ala hangkur susəma tə da ata səmari, tsuwa da ata səmari ka thlivəra. Tsuwa mda ata ngkərtə ngkərta ala ɗa yimi tə da ata sari, ka da sa ka shishiɓa.

¹⁷Kamnyar buradi ka yimi na ata kəta ala ɗa, har da ata wul nvwa ɗa kula mbərsata, antə dza ɗa ata thlarəmtadzi kamnyar bikər ɗa.