Read bura-pabir Ezekiyel 40 Bible Online

Ezekiyel 40 - bura-pabir bible

Ezekiyel 40

¹Akwa vir na kumkur ar thliya na ntangkəma akwa məva na sərkumari ka ntəfkur ka mwarər yeru akwa mafakur, akwa məva na kumnya nfwarkur aghəla tə mdə səm Urushalima akwa mpa, vir nda antə dunar MTHLAKU si ata kəri, ka kətə ra ka mwantə ra anda akwa bərni ni.

²Akwa wulsu ni antə Hyel kətə ra ka mwantə ra akwa tsəɗi Israila, ka vəi ra ata kəra gar laga na nal ka duna. Anda antə I wutə kəyayeri laga ata kəma duku apa bərni təbwar anəm.

³Sakatə tsa mwantə ra anda, təng I wutə mdə laga ka kəmari akwa mbəlmbəla apa əmza, ka səwur lilin ka zwalər ngkər su akwa tsiyari, athləthlata anyarfur bərni ni.

⁴Antə mdə ni pəla ali, “Ɓzər mda, wul su ɓɗaku ka gə psi thləma ga ka hangkal, ka gə vədzə hangkala ga aka shanga su tə I ata ncanta ala ga, kamnyar mdə səntə nga azi ni kamnyar kəi ncanta ala gə su. Antə ka gə psəmnya shanga su tə ga ku wuta aka mjir Israila.”

⁵Su tə I wuta an katangga na kawartə bəbal ar mbwar vəngkər səli ni. Saɓəlkur ar zwalər ngkər su na akwa tsiya mdə ni an dzartsi na saɓəl ngkwa. Tsuwa kəlara dzartsi pal ni ka jakər saɓəlkur ar mandaɓa tsi pal. Antə tsa ngkərtə baukur katangga ni, baukurari zwal pal, ka nalkurari tsuwa zwal pal.

⁶Antə tsa təra mwari akwa nyarfu na awul bwar raghəi ni, ka ləmta ata stepayeri ni, ka ngkərtə bagaɗi nyarmbwar nyarfu ni, zurangkurari zwal pal.

⁷Tsuwa kutambwayeri aɗi na raka raka ar mjir gadi athlimbəli, kəlara mbwa saɓəlkurərni zwal pal, ka baukurərni zwal pal. Tsuwa baukur daɓwa mbwayeri ni an dzartsi ntəfu. Antə bagaɗi nyarmbwar nyarfu na kudzəhə ka galahəu na awul mbwar vəngkər səli ni, zurangkurari zwal pal.

⁸Antə tsa ngkərtə galahəu na akwa nyarfu ni ka wuta abbər zurangkurari dzartsi ncisu.

⁹Tsa ngkərtə zhimbwalər galahəu na anyarmbwa ni, zurangkurari dzartsi ncisu, kəkəskur su tə mdə fəi dzari kəgari dzartsi suɗa. Tsuwa galahər nyarfur ləvəi ni an akwa tsikərari kudzəhə ka mbwar vəngkər səli ni.

¹⁰Tsuwa mbwayeri aɗi makər makər athlimbəlari abwani ka abwanda. Na makər ni olkurər ɗa shang jili duku. Tsuwa olkur zhimbwalayeri arɗa na abwani ka na abwanda shang jili duku.

¹¹Antə mdə ni ngkərtə baukurər nyarfur ləvəi ni ka wuta abbər tsa dzartsi kuma, antə saɓəlkurari dzartsi kumnya makər.

¹²Banggwa laga aɗi kwadang akəma kəlara mbwar gadi natə nalkurərni dzartsi pal akwa kəlara bwa, antə mbwar səkə dzartsi ngkwa ngkwa akwa kəlara bwa.

¹³Antə tsa ngkərtə nyarfu ni baɗitə ka kəra mbwar gadi na pal ka mwanta aka kəra mbwar gadi damwa, antə daɓwa ɗa ni dzartsi sərkumari ka ntəfu, baɗita adzə nyarmbwa ka mwanta adzə nyarmbwa.

¹⁴Tsuwa tsa ku ngkərtə zhimbwalər nyarfu ni, dzartsi ngkwakumari, tsuwa mbwayeri aɗi athlimbəlayerari har ka kalaktə kuta bəbal na anyarmbwa ni.

¹⁵Baɗita adzə nyarfur ləvəi ni har ka mwanta adzə galahər nyarfu na avivi ni dzartsi ntəfkumari.

¹⁶Mbwayeri ar səka ni kəga galahayeri arɗa shang ka windauwayeri kəga nyarmbwayeri. Kəlara bwa mdə ku kalaktə ka nyarmbwayeri, tsuwa shanga nyarmbwayeri ni ka windauwayeri na raka raka ata. Tsuwa kəlara bwakəma zhimbwal ni mdə ku dəɓata ka dludzər nfur dipənau hang.

¹⁷Antə mdə ni kətə ra ka səntə ra akwa kuta bəbal na aɓəlaɓəla, antə I wutə mbwayeri ka laku laga tə mdə hənta apa bagaɗi ka thlirtə kərari, na kalaktə kuta bəbal ni. Mbwa pal pal makkumari an abwakəma laku ngəni ni.

¹⁸Antə laku ni təramta har datərni ata vəi tə nyarfu ni thləthlata, kalkal ka saɓəlkurər nyarfu ni. Ngəni an laku na aghəi.

¹⁹Antə tsa ngkərtə cijukur vəi na akwa daɓwa nyarfu na avivi na aghəi ni har ka mwanta adzə nyarfu na aɓəlaɓəla na akwa wuldzi ka bəbal na təbwar raghəi ni, ka wuta abbər daɓwa nyarfayeri ni dzartsi aru pal.

²⁰Tsuwa nyarfu laga aɗi na aɓəlaɓəla awul bəbal na təbwar yala ni. Antə tsa ngkərtə saɓəlkurari ka baukurari.

²¹Tsa ka mbwayeri ar mjir gadi athlimbəlayerari, makər abwani ka makər abwanda, antə olkur zhimbwalayerari ka galahərni shang kalkal ka na ar nyarfu na ntangkəma ni. Saɓəlkurərni dzartsi ntəfkumari, baukurərni tsuwa dzartsi sərkumari ka ntəfu.

²²Tsuwa olkur windauwayerari, ka ar galahari, ka nfwayeri ar dipənauwayerari, shang kalkal ka ar nyarfu na ka kəmari təbwar raghəi ni. Tsa ka vəi fəltari pal pal murfa na ata ləmta akwa nyarfu ni, tsuwa galahərni ni avivi akəma ɗa.

²³Tsuwa awul nyarfu na təbwar yala ni, tsu apa na təbwar raghəi ni, nyarfu laga aɗi na ata mwari akwa kuta bəbal na avivi ni. Antə tsa ngkərtə daɓwa nyarfayeri ngəni suɗə ni, an dzartsi aru pal.

²⁴Aghəla nda antə mdə ni kətə ra ka mwantə ra təbwar anəm, antə anda I wutə nyarfu damwa təbwar anəm. Antə tsa ngkərtə zhimbwalayerari ka galahərni, olkurər ɗa shang kalkal ka na bwaduku.

²⁵Tsuwa ata mbwayeri ar nyarfu ni windauwayeri aɗi har ka kalaktə nyarfu ni, ka tsuwa ata galahəu ni, tsu apa bwadukwa windauwur nyarfayeri damwa. Saɓəlkura nyarfu ni an dzartsi ntəfkumari, ka baukurərni dzartsi sərkumari ka ntəfu.

²⁶Nyarfu ni a vəi vətə səl pal pal murfa kamnyar ndlətari, ka galahari avivi. Tsuwa mdə ku dəɓatə dza zhimbwalayeri ni ka dludzər nfur dipənauwayeri, kəlara thlimbəlari ka dludzər dipənau pal.

²⁷Tsuwa nyarfu laga aɗi təbwar anəm ka kuta bəbal na avivi ni. Antə tsa ngkərtə daɓwa nyarfu ka nyarfu təbwar anəm ni, an dzartsi aru pal.

²⁸Antə mdə ni kətə ra ka mwantə ra akwa kuta bəbal na avivi ar nyarfu na abwar anəm, ka ngkərtə nyarfu ni. Olkurərni an kalkal ka shanga bwadukwa ɗa.

²⁹Apani tsuwa olkurər mbwayeri ar mjir gadi na athlimbəlari ni, kəga zhimbwalayerari, kəga galahərni, shang kalkal ka shanga bwadukwa ɗa. Tsuwa tsa ka windauwayeri na kalaktə ni, ka tsuwa ata galahərni ni. Saɓəlkurərni dzartsi ntəfkumari, ka baukurərni dzartsi sərkumari ka ntəfu.

³⁰Tsuwa galahayeri aɗi na kalaktə ni, kəlara pal akwa nca ɗa, saɓəlkurari dzartsi sərkumari ka ntəfu, baukurari dzartsi ntəfu.

³¹Kəma galahəu ni akwa wuldzi ka kuta bəbal na aɓəlaɓəla ni, tsuwa mdə ku dəɓatə dza zhimbwalayeri arni ka dludzər nfur dipənauwayeri. Lakur ləmta akwa mbwa ni ka vəi vətə səl pal pal ncisu.

³²Antə mdə ni kətə ra ka mwantə ra akwa kuta bəbal na avivi na təbwar raghəi. Antə tsa ngkərtə nyarfu, ka wuta abbər olkurərni kalkal ka shanga bwadukwa ɗa.

³³Tsuwa olkurər mbwayeri ar səka na athlimbəlayerari, ka zhimbwalayerari, ka galahərni, shang kalkal ka mambila ɗa. Tsuwa tsa ka windauwayeri akwa kəlara bwa har ka kalakta, ka tsuwa ata galahərni. Saɓəlkurərni an dzartsi ntəfkumari, ka baukurərni dzartsi sərkumari ka ntəfu.

³⁴Kəma galahəu ni akwa wuldzi ka kuta bəbal na aɓəlaɓəla ni, tsuwa mdə ku dəɓatə dza zhimbwalayeri arni ka dludzər nfur dipənauwayeri, kəlara thlimbəlari ka dipənau pal pal ata. Lakur ləmta akwa mbwa ni ka vəi vətə səl pal pal ncisu.

³⁵Antə mdə ni kətə ra ka mwantə ra akwa nyarfu na abwar yala, ka ngkərtə nyarfu ni, təng olkurərni kalkal ka shanga bwadukwa ɗa.

³⁶Tsuwa olkurər mbwayeri na ata tengayerari ni, ka zhimbwalayerari ni, ka galahərni ni shang kalkal ka hwada. Tsuwa nyarfu ni ka windauwayeri akwa kəlara bwa har ka kalakta. Saɓəlkurərni an dzartsi ntəfkumari, ka baukurərni dzartsi sərkumari ka ntəfu.

³⁷Kəma galahəu ni akwa wuldzi ka kuta bəbal na aɓəlaɓəla ni, tsuwa mdə ku dəɓatə dza zhimbwalayeri arni ka dludzər nfur dipənauwayeri, kəlara thlimbəlari ka dipənau pal pal ata. Lakur ləmta akwa mbwa ni ka vəi vətə səl pal pal ncisu.

³⁸Mbwa laga aɗi na ka nyarmbwarni təbwar galahər nyarfu ni. Anda antə mda ana kəcimta mwaɓiyir hara saɗaka mbamba.

³⁹Tsuwa akwa galahər nyarfu ni tebərayeri laga aɗi suɗa ata kəlara thlimbəlari. Ata antə mda ana thlamta wulya kəlara mwaɓiyir saɗaka mbamba, ka saɗakar kəcimta biku, ka saɗakar ntə biku.

⁴⁰Aɓəla ata bwahila galahəu ni, akwa lakur ləvəi akwa nyarfu na abwar yala ni, tebərayeri aɗi suɗa. Tsuwa aɓəla bwanda akwa wul galahər nyarfu ni tebərayeri damwa aɗi suɗa.

⁴¹Tebərayeri nfwar an avivi, ka tebərayeri nfwar an aɓəlaɓəla nyarfu ni, shang ata kəma duku da tebər ncisu, natə mda ata thlamta wulya mwaɓiyir saɗaka ata da.

⁴²Tsuwa tebərayeri aɗi nfwar tə mdə nam ka pela marmara kamnyar hamta saɗaka mbamba. Kəlara pal akwa nca ɗa saɓəlkurari dzartsi pal ka reta, baukurari dzartsi pal ka reta, ka nalkurari dzartsi pal. Ata tebərayeri ngəni antə mda ata pwi kari tə mda ata kəthlər kəgari akwa thlamta wulya mwaɓiyayeri ar hara saɗaka ni.

⁴³Tsuwa kusayeri aɗi na nggwami nggwamiyari kamnyar hahəi su, kəlara pal akwa nca ɗa saɓəlkurari mandaɓa pal, tə mdə kawartə kutari kəgari. Tsuwa ata kəra tebərayeri ni mda ata putə kumər hara saɗaka ni.

⁴⁴Antə tsa səɓəla ka iya akwa kuta bəbal na avivi ni, antə I wutə mbwayeri laga suɗa akwa bəbal ni. Pal abwar nyarfu na abwar yala ka bwakəmari awul bwar anəm, palari tsuwa abwar nyarfu na abwar anəm ka bwakəmari awul bwar yala.

⁴⁵Antə tsa pəla ali, “Mbwa ngəni na ka bwakəmari awul bwar anəm ni kamnyar pristayeri na ana kəthlər akwa mbwar vəngkər səli.

⁴⁶Tsuwa mbwa na ka bwakəmari awul bwar yala ni an kamnyar pristayeri na ana kəthlər ata bagaɗi. Shanga pristayeri ngəni thlata akwa nyarmbwar Zadok, natə təng da shiɗa akwa nyarmbwar Lawi an ata mzhi si adzə MTHLAKU ka hara kəthlər alari.”

⁴⁷Antə tsa ngkərtə kuta bəbal ni, ka wuta abbər saɓəlkurari dzartsi aru pal, ka baukurari tsuwa dzartsi aru pal, shanga bwayeri ni kalkal. Tsuwa bagaɗi ni akəma mbwar vəngkər səli ni.

⁴⁸Antə tsa kətə ra ka mwantə ra akwa galahər mbwar vəngkər səli ni, ka ngkərtə olkurər zhimbwalayeri ar galahəu ni, ka wuta abbər dzartsi ntəfu ntəfu abwani ka abwanda. Tsuwa baukur nyarfu ni an dzartsi kumnya nfwar, saɓəlkur banggwar nyarfu ni an dzartsi makər wala abwani wala abwanda.

⁴⁹Saɓəlkurər galahəu ni an dzartsi sərkumari, baukurari dzartsi kumnya suɗa. Tsuwa vəi vətə səl aɗi pal pal kuma kamnyar ləmta akwa nyarfu ni. Tsuwa zhimbwalayeri aɗi ata tenga lakur ləmbwa ni, pal abwani ka tsuwa pal abwanda.