Read bura-pabir Ezekiyel 41 Bible Online

Ezekiyel 41 - bura-pabir bible

Ezekiyel 41

¹Aghəla nda antə mdə ni kətə ra ka mwantə ra ta ɗəffa kutambwar Hyel, ka ngkərtə olkurər zhimbwalayerari, ka wuta abbər baukurər zhimbwal ni dzartsi ngkwa akwa abwani ka abwanda.

²Tsuwa baukurər nyarmbwa ni dzartsi kuma. Tsuwa olkurər banggwar nyarmbwa ni dzartsi ntəfu abwani ka abwanda. Antə tsa ngkərtə vəi na ata ɗəffa kutambwa ni, ka wuta abbər saɓəlkurərni an dzartsi nfwarkumari, ka baukurərni dzartsi sərkumari.

³Antə tsa ləkwa kutambwa na avivi ka ngkərtə zhimbwalayeri ar nyarmbwa ni, ka wuta abbər tsa an dzartsi suɗa, tsuwa baukurər nyarmbwa an dzartsi ngkwa. Tsuwa banggwar nyarmbwa ni dzartsi murfa.

⁴Antə tsa ngkərtə kutambwa ni ka wuta abbər saɓəlkurari dzartsi sərkumari, baukurari dzartsi sərkumari, har ba abwanda ɗəffa kutambwa ni. Antə tsa pəla ali, “Ngəni an Vəi na Ɓɗakta Shang.”

⁵Antə mdə ni ngkərtə banggwa mbwar vəngkər səli, ka wuta abbər kəkəskurari dzartsi ngkwa, tsuwa baukurər kəlara pal akwa nca mbwayeri na ata tengayerari an dzartsi nfwar har ka kawartə mbwar vəngkər səli ni.

⁶Tsuwa mbwayeri na ata tenga mbwar səli ni shang jikjikari mamakər ata kəra nvwa ɗa, ka kutambwa makkumari akwa kəlara jika. Tsuwa katangga aɗi na kalaktə mbwar vəngkər səli ni kamnyar ka tsa ndzi sur rwati mbwayeri ni, kamnyar mda aɗi ata bara ka dza mbwayeri ni tsəkwar dza mbwar vəngkər səli ni wa.

⁷Tsuwa baukurər kutambwayeri na kalaktə mbwar vəngkər səli ni shang ol'ola ta na aghəya ɗa. Kamnyar mbwayeri na kalaktə mbwar vəngkər səli ni ka sur ndlətari tə mdə nam ka vəi vətə səl ar ləmta akwa kəlara mbwa tə mdə jikəngkər ata kəra nvwa ni ni. Antə apani baukurər hən ni ku ləkəma ka kəlardzi ata har ka ləmta akwa jikə na amta ta shang. Tsuwa sur ndlətari ka ləmta ni baɗita ata jikər mbwa na ata di ni har ka ləmta akwa jikər mbwa na ata ɗəffu.

⁸Tsuwa I ku wuta abbər mdə vətə mbwar vəngkər səli ni ata su laga tə mdə hənta apa bagaɗi har ka kalakta, Saɓəlkur səla mbwayeri na ata tengayerari ni dzartsi na saɓəl saɓəl ngkwa.

⁹Kəkəskura katangga na aɓəlaɓəla ar mbwayeri na ata tenga ni an dzartsi ntəfu. Tsuwa bəbal laga aɗi akwa daɓwa mbwayeri na ata tenga mbwar vəngkər səli ni.

¹⁰Baukurər bəbal na akwa daɓwa mbwayeri na kalaktə mbwar vəngkər səli ni an dzartsi sərkumari har ka kalakta akwa kəlara bwa.

¹¹Tsuwa nyarmbwayeri ar ləkwa mbwayeri na ata tenga ni aɗi, ma mdə thlata akwa kuta bəbal ni, nyarmbwa na pal awul bwar yala, nyarmbwa na palari tsuwa awul bwar anəm. Antə baukur bəbal na mbiləmta kula su akwa an dzartsi ntəfu har ka kalakta.

¹²Antə mbwa na awul bəbalər mbwar vəngkər səli na atar ramta ni an baukurari an dzartsi murfəkumari. Kəkəskurər dza mbwa ni an dzartsi ntəfu har ka kalakta, tsuwa saɓəlkurari an dzartsi əmdləkumari.

¹³Antə mdə ni ngkərtə mbwar vəngkər səli ni, ka wuta abbər saɓəlkurərni an dzartsi aru pal, antə saɓəlkurər bəbal ni, ka mbwa ni kəga katanggari an dzartsi aru pal.

¹⁴Tsuwa baukura bwakəma mbwar vəngkər səli ni atəbwar raghəi, ata kəma duku ka bəbal ni an dzartsi aru pal.

¹⁵Antə tsa ngkərtə saɓəlkurər mbwa na akwa wuldzi ka bəbal na atəbwar ramta ni, ka galahayerari na abwakəma ka abwahili, ka wuta abbər olkurari an dzartsi aru pal. Kuta mbwar vəngkər səli, ka kutambwa na avivi, ka galahər kuta bəbal ni,

¹⁶shang kəga bagaɗi nyarmbwayeri, mdə hartə ka katakowayeri na ɓɗakɓɗaku, shanga ɗa makər ni windauwayeri na ntetntetta har ka kalakta. Windauwayeri na akwa wul mnya nyarmbwar vəngkər səli ni tsuwa mdə hartə dza ɗa ka katakowayeri na ɓɗakɓɗaku. Tsuwa kutambwa ni ka dza mbwa ni, baɗita ata di har ka mzhitə windauwayeri ni, shang mdə ku hartə ka katako.

¹⁷Mdə dəɓatə vəi na amtamta nyarmbwa ni purəm kəga banggwar mbwa ni na avivi kəga na aɓəlaɓəla shang ka ɗahayeri tə mdə marɓəla. Tsuwa shanga banggwayeri na avivi ka aɓəlaɓəla mdə dəɓatə ɗa shang ka jili su duku.

¹⁸Mdə dəɓatə ɗa shang ka dludzər kerubayeri kəga nfur dipənauwayeri, nfur dipənau pal akwa kəlara daɓwa kerubayeri suɗa. Tsuwa kəlara kerub ka kəmari suɗa.

¹⁹Kəmari na pal na dludzə ka kəma mdə an atar nfur dipənau, antə kəmari na dukwari na dludzə ka kəma tsəngi ni awul bwa damwa. Mdə marɓəla dludzər ɗa ata shanga dza mbwar vəngkər səli ni har ka kalakta.

²⁰Antə baɗita ata di har ka ləmta adzə vəi na amtamta nyarmbwayeri ni, mdə dəɓatə shanga dza mbwa na aɓəlaɓəla ni ka dludzər kerubayeri kəga nfur dipənauwayeri tə mdə marɓəla.

²¹Baukur ka saɓəlkur ar kuta nyarmbwar vəngkər səli ni shanga duku. Tsuwa akəma Vəi na Ɓɗakkarkara ni su laga aɗi na dludzi ka

²²vəi hamta saɗaka natə mdə nam ka udzəm, natə nalkurari dzartsi suɗa, saɓəlkurari dzartsi suɗa, ka tsuwa baukurari dzartsi suɗa, tsuwa banggwarni shang mdə nam ka katako. Tsuwa kuɗəmayerari, ka kirari, ka shanga banggwayerari ni, mdə nam ka katako. Antə mdə ni pəla ali, “Ngəni an tebər na akəma MTHLAKU.”

²³Nyarmbwar ləkwa mbwar vəngkər səli ni ka na ləkwa Vəi na Ɓɗakkarkara ni, kəlara pal akwa nca ɗa ka tapəra suɗa ata kəma duku.

²⁴Kəlara nyarmbwa ka tapəra suɗa na kəlardzi ata ɗəffu aɓəlaɓəla ka avivi.

²⁵Tsuwa mdə ku dəɓatə nyarmbwar vəngkər səli ni ka dludzər kerubayeri kəga nfur dipənauwayeri tə mdə marɓəla, tsu apa natə mdə hara ata banggwayeri ni. Tsuwa mdə ku namtə səva laga ka udzəm akəma galahəu na aɓəla ni.

²⁶Tsuwa ata thlimbəla banggwayeri ar galahəu ni windauwayeri aɗi na raka raka kəga nfur dipənauwayeri.