Read bura-pabir Ezekiyel 42 Bible Online

Ezekiyel 42 - bura-pabir bible

Ezekiyel 42

¹Antə mdə ni kətə ra ka mwantə ra akwa kuta bəbal na aɓəlaɓəla atəbwar yala ni, ka mwantə ra akwa mbwayeri laga na awul bəbalər mbwar vəngkər səli, tsuwa na awul mbwa na abwar yala ni.

²Saɓəlkurər mbwa ngəni na abwar yala ni an dzartsi aru pal, ka baukurari tsuwa dzartsi ntəfkumari.

³Akəma bəbal natə olkurari dzartsi sərkumari na akwa kuta bəbal na avivi ni, ka na awul bəbal na akwa kuta bəbal na aɓəlaɓəla ni, mbwayeri aɗi ata kəra nvwani jikə mamakər na akwa wuldzi ka nvwani.

⁴Abwar yala ka mbwayeri ngəni, vəi təramta laga aɗi avivi natə baukurari dzartsi kuma, ka saɓəlkurari dzartsi aru pal, ka nyarmbwar ɗa akwa yala.

⁵Mbwayeri tə mdə tsa akwa vəi na amta ar mbwa ni ter ta na ata ɗəffu ka na aghəighəyari ni, kamnyar tə mdə ku zəmwi ɗa ka bwahili.

⁶Kamnyar mbwayeri na amta ata kər ni jikə mamakər, tsuwa da aɗi ka zhimbwalayeri apa zhimbwalayeri na akwa kuta bəbal na aɓəlaɓəla ni wa. Antə apani mbwayeri na amta ni olkurər ɗa aɗi mzhitə na ata di ni wala na ata ɗəffu ni wa.

⁷Tsuwa katangga aɗi aɓəla na ret ka mbwayeri ni, təbwar bəbal na aɓəla ni. Antə katangga na awul mbwayeri ni saɓəlkurərni an dzartsi ntəfkumari.

⁸Kamnyar mbwayeri na akwa kuta bəbal na aɓəlaɓəla ni saɓəlkurər ɗa an dzartsi ntəfkumari, antə na mbwayeri na akwa wuldzi ka da ni saɓəlkurər ɗa an dzartsi aru pal.

⁹Aghəighəya mbwayeri ngəni nyarmbwa aɗi təbwar raghəi, natə mdə na ku thlata akwa bəbal na aɓəla ni ata mzhi ləkwari.

¹⁰Ata vəi tə katanggar kuta bəbal na atəbwar anəm ni baɗita, awul kuta bəbal ni ka mbwar vəngkər səli ni, mbwayeri laga aɗi

¹¹na ka lakur təramta akəma. Mbwayeri dludludzi ka mbwayeri na abwar yala ni, saɓəlkurər ɗa ka baukurər ɗa shang duku, tsuwa nyarmbwar ləmbwa, ka nyarmbwar ləɓəla, ka laku tə mdə nam ɗa shang jili duku.

¹²Tsuwa aghəya mbwayeri na abwar anəm ni lakur ləmbwa aɗi na akwa təbwar raghəi, tsuwa awul mbwayeri an katangga laga na ndəkəmta daɓwa ɗa.

¹³Antə mdə ni pəla ali, “Mbwayeri na abwar yala ka na abwar anəm awul bəbal kutakəi ni, shanga ɗa mbwa na ɓɗakkarkara. Akwa da antə pristayeri na ana si akəma MTHLAKU ata səm saɗakayeri na ɓɗakkarkara ta shang. Anda antə da pwi saɗakayeri na ɓɗakkarkara ta shang, apa saɗakar mthli, ka saɗakar kəcimta biku, ka saɗakar ntə biku, kamnyar vəi ni an ɓɗakkarkara.

¹⁴Ma sakatə pristayeri ku ləkwa mbwar vəngkər səli, da aɗi ata ləɓəla akwa bəbal kutakəi na aɓəla ni, kula da pwi ləptayeri tə da hara kəthlər kəgari wa, kamnyar ləptayeri ni ɓɗakkarkara. Da ata hatə ləptayeri damwa akəmata da aləɓəla ata bəbal ata vəi tə mji ata.”

¹⁵Aghəla tə mdə ni ku kuri ngkərɓəla kutambwar vəngkər səli ni, antə tsa ləɓəla ka iya təbwar nyarfu na awul bwar raghəi, ka ngkərtə shanga kuta bəbal na kalaktə mbwar vəngkər səli ni.

¹⁶Tsa ngkərtə bwa na abwar raghəi ka zwal ar ngkər su, ka wuta abbər olkurərni an dzartsi aru ntəfu, apatə tsa ngkərtə ka zwal ni.

¹⁷Antə tsa shinardzi ka ngkərtə bwa na abwar yala, ka wuta abbər olkurari an dzartsi aru ntəfu, apatə tsa ngkərtə ka zwal ni.

¹⁸Antə tsa shinardzi ka ngkərtə bwa na abwar anəm, ka wuta abbər olkurari an dzartsi aru ntəfu, apatə tsa ngkərtə ka zwal ni.

¹⁹Antə tsa shinardzi təbwar ramta ka ngkərta, ka wuta abbər olkurari an dzartsi aru ntəfu, apatə tsa ngkərtə ka zwal ni.

²⁰Tsa ngkərtə shanga bwayeri ngəni nfwar ni. Bəbal ni ka katangga na kalaktə ni, natə saɓəlkurari dzartsi aru ntəfu, ka baukurari dzartsi aru ntəfu, kamnyar ndəkəmta daɓwa Vəi na Ɓɗakkarkara ka vəi na ndzang.