Read bura-pabir Ezekiyel 43 Bible Online

Ezekiyel 43 - bura-pabir bible

Ezekiyel 43

¹Aghəla nda antə mdə ni kətə ra ka mwantə ra təbwar nyarfu na awul bwa raghəi,

²antə I wutə parakər səliyir Hyelər Israila ku səɓəla akwa raghəi. Tsuwa kuraka səyirni apa kərathla yimər thlyagha na ola. Antə parakər səliyirni ku mbəlantə duniya.

³Tsuwa wulsu ngəni ni ku dludzi ka wulsu tə I wutə sakatə Hyel si kamnyar shamta bərni ni, apa wulsu tə I wuta ata mnya Thlyagha Kebar ni. Antə I ndla ka kəmi ata di.

⁴Tsuwa sakatə parakər səliyir MTHLAKU səkwa mbwar vəngkər səli ni atar nyarfu na awul bwa raghəi,

⁵təng mambəl ni haptə ra amta, ka mwantə ra akwa kuta bəbal na avivi. Təng azi parakər səliyir MTHLAKU ni ku nghyantə mbwar vəngkər səli ni.

⁶Sakatə mdə ni tsu athləthlata adzə ra, təng I nggatə mdə laga akwa gari ali akwa kutambwar vəngkər səli ni.

⁷Tsa pəla ali, “Ɓzər mda, vəi ngəni an dəkəl kuthlikurərna, ka vəi tə I ata pwi kutasəli ata, vəi tə I ata ndzəndzi akwa nca mjir Israila ba saka madi. Mjir Israila aɗi ata jaktə hilantə thləmi na ɓɗakkarkara ni wa, wala da wala kuthlyayeri arɗa, atar vəngkər səli aka haptayeri wala atar namtə dludzər kuthlyayeri arɗa na ku mti, ka ncigəi akwa vəi vəngkər səli arɗa ata kəra garayeri wa.

⁸Da ku həntə bagaɗi nyarmbwar ɗa awul bagaɗi nyarmbwarna, ka vəi nyarmbwar ɗa awul nyarmbwarna, təng katangga laga daci an akwa daɓwa yeru. Da ku hilantə thləmi na ɓɗakkarkara atar surcikayeri tə da hara. Antə apani I ku kurəmta ɗa kamnyar ɗəffi na ɓza ata kəra ɗa.

⁹Kulini, ka da pumta haptayeri arɗa ka dludzər kuthlyayeri na ku mtə ni kazhar vəi tə I ata, antə I ata ndzəndzi akwa nca ɗa ba saka madi.”

¹⁰“Antə ar nga, gə na ɓzər mda, ka gə ngkərɓəla aka mjir Israila ata kəra mbwar vəngkər səli, laku tə tsa ata ndzi akwa, ka laku tə mda ata hən ni akwa, ka da ləkwa səli kamnyar bikər ɗa.

¹¹Ma sakatə da ku ləkwa səli kamnyar shanga su tə da hara, antə ga ata ngkərɓəla ala ɗa laku tə mbwar vəngkər səli ni ata sə ndzi akwa, vəi tə kalkal ka bwayeri ni ndzi ata, nyarmbwayeri ar ləɓəla ka nyarmbwayeri ar ləmbwa, ka halamar laku tə tsa ata sə ndzi akwa ata kəma duku. Tsuwa ka gə ngkərɓəla ala ɗa shanga tsawayeri na ata kər, kəga suayeri tə mdə thlamta abbər ka mdə hara. Tsuwa ka gə rəbutə suayeri ngəni akəma ɗa, kamnyar ka da ɓəlatə shanga tsawayeri kəga suayeri tə mdə thlamta ni, ka haratə ɗa.

¹²Ngəni an tsawu na ata kəra mbwar vəngkər səli ni. Shanga vəyayeri na kalaktə kər gar ni ata ndzi ɓɗakkarkara ta shang.”

¹³Nayeri ni an laku tə mda ata ngkərtə olkurər bagaɗi ni akwa, tsuwa ka mdə kəthlər tsu ka sur ngkər su tə saɓəlkurərni dzartsi pal ka mandaɓa pal ni. Antə saɓəlkurər kirari ata ndzi dzartsi pal, ka baukurari ndzi dzartsi pal, ka baukurər mnyari tsuwa ndzi mandaɓa pal har ka kalakta. Antə ngəni an saɓəlkurər bagaɗi ni.

¹⁴Baɗita ata kirari na ata di har ka ləmta akwa vəi dethla na aghəi ata ndzi dzartsi suɗa, ka baukurari ndzi dzartsi pal. Antə baɗita ata dethla na raka ni ka mwanta adzə dethla na olari ni ata ndzi dzartsi nfwar, ka baukurari dzartsi pal.

¹⁵Olkurər vəi mba su na ata kəra bagaɗi ni ata ndzi dzartsi nfwar. Tsuwa baɗita ata vəi mba saɗaka ni təmbəlayeri aɗi nfwar na thlentə thlentari amta, kəlara pal akwa nca ɗa nalkurari dzartsi pal.

¹⁶Baukur ka saɓəlkurər kəra bagaɗi ni ata ndzi kalkal, watau saɓəlkurari dzartsi kumnya suɗa, baukurari dzartsi kumnya suɗa.

¹⁷Tsuwa baukur ka saɓəlkur vəi dethlə ni ata ndzi kalkal, watau saɓəlkurari dzartsi kumnya nfwar ka baukurari dzartsi kumnya nfwar, ka baukurər mnyari ni dzartsi pal ka reta har ka kalakta, ka baukurər kirari tsuwa dzartsi pal har ka kalakta. Vəi mwa ka ləmta ata bagaɗi ni ata ndzi ka kəmari atəbwar raghəi.

¹⁸Antə tsa pəla ali, “Ɓzər mda, I na MTHLAKU na ka Duna ta shang akwa pəla, nayeri ni an tsawayeri na ata kəra bagaɗi ni. Ma vir tə mdə həntə bagaɗi ar hamta saɗaka mbamba ka tsuwa ɓucə mamshi ata ni,

¹⁹ka gə hamta aka pristayeri na mjir Lawi na akwa nyarmbwar Zadok, na ana si akəmi kamnyar hara kəthlər ali, gyal pal kamnyar saɗakar kəcimta biku. I na MTHLAKU na ka Duna ta Shang an pəla.

²⁰Ga ata kətsə bwadukwa mamshari, ka gə ɗata ata kəra təmbəlayeri na nfwar akwa kuɗəmayeri ar bagaɗi ni, ka ata vəi dethla na nfwar akwa kuɗəma ni, ka tsuwa ata mnyari na har ka kalakta. Apani antə ga ata kəcimta bagaɗi ni ka kələmta watsəɓər biku kamnyar ni.

²¹Tsuwa ga ata kətə gyal kamnyar saɗakar kəcimta biku ni, ka gə mbamta ni ata vəi tə mda ɗəmha alari akwa kuta bəbalər mbwar vəngkər səli ni, aɓəla ta vəi na ɓɗakkarkara ni.

²²Akwa vir na suɗkurari ga ata hamta nciwu na kula nangka, kamnyar saɗakar kəcimta biku. Apani antə ga ata kəcimta bagaɗi ni ka tsa ndzi kəcəkəcari apatə gə kəcimta akwa saka na təramta ka mamshir gyal ni

²³Ma sakatə ga ku kuri kəcimta ni, ga ata carɓəla gyal na kula nangka ka gam na kula nangka akwa ciɓa ka gə hamta saɗaka ka da.

²⁴Ga ata səntə ɗa akəmi, I na MTHLAKU, antə prist ata kuktəngkər una ata kəra ɗa, ka hamta ɗa apa saɗaka mbamba ali.

²⁵Ga ata hara vir pal pal murfa akwa hamta kwi pal, ka gyal pal, ka gam pal tədək viri kamnyar saɗakar kəcimta biku. Tsuwa tar ka shanga ɗa ndzi kula nangka.

²⁶Vir pal pal murfa antə pristayeri ni ata harari akwa kələmta watsəɓər biku kamnyar bagaɗi ni, ka kəcimta ni, ka hamta ni aka Hyel.

²⁷Ma sakatə virayeri ngəni ku təramta, akwa vir na nciskur har ka ləkəma antə pristayeri ni ata hamta saɗaka mbamba, ka saɗakar jakə mwardzi ata bagaɗi ni. Antə I ata dlu giri. I na MTHLAKU na ka Duna ta Shang an pəla.”