Read bura-pabir Ezekiyel 44 Bible Online

Ezekiyel 44 - bura-pabir bible

Ezekiyel 44

¹Antə mdə ni mwantə ra akwa nyarfu na aɓəlaɓəla, na abwar raghəi ka mbwar vəngkər səli ni. Tsuwa nyarfu ni harharari.

²Antə MTHLAKU pəla ali, “Nyarfu ngəni ata ləkəma ka ndzi harharari. Mda aɗi ata kəlarari wa, tsuwa mda aɗi na ata ləkwari wa, kamnyar I na MTHLAKU na Hyelər Israila ku ləvəi ata tsa, antə apani tsa ata ndzi harharari.

³Tar kuthli daci an ata mzhi mwari akwa kamnyar səm susəma na akəma MTHLAKU. Tsa ata ləkwari təbwar nyarmbwa atar galahər nyarfu ni, ka ləɓəla tsu atar nyarfu nda.”

⁴Antə mdə ni kətə ra ka mwantə ra abwakəma mbwar vəngkər səli ni atar nyarfu na abwar yala. Tə I wula, təng I wutə parakər səliyir MTHLAKU ku nghyantə mbwar vəngkər səli aka MTHLAKU ni. Antə I ndla ka kəmi ata di.

⁵Antə MTHLAKU pəla ali, “Ɓzər mda, vədzə hangkala ga, kara wul su ɓɗaku, kamnyar ka gə nggaɓəla shanga su tə I pəla ala ga ata kəra shanga tsawayeri na ata kəra mbwar vəngkər səli aka MTHLAKU, ka shanga suayeri tə mdə thlamta abbər ka mdə hara. Ka gə vədzə hangkal aka lakur ləkwa mbwar vəngkər səli ni, ka shanga lakwayeri ar ləɓəla akwa mbwar vəngkər səli ni.

⁶Ka gə pəla aka mjir Israila na ka kəra ɗa ɓəɓal ni, abbər I na MTHLAKU na ka Duna ta Shang akwa pəla, ‘Mjir Israila, zhar giri hara shanga surcikayeri ni.

⁷Kamnyar giri akwa hilantə mbwar vəngkər səliyirna atar zhar ka mətəpiyayeri natə dza ɗa ka ɗəffa ɗa aɗi kəcəkəcari wa, ləkwa mbwarna na ɓɗakkarkara. Apani giri ku ɓzamtə mbwa ni sakatə giri akwa hamta ali saɗakar susəma arna, watau malkum ka mamshi. Tsuwa ata kəra surcikayeri tə giri hara ni, giri ku ɓəli alkawalərna.

⁸Giri aɗi ɓəla tsawayeri tə I hamta ala giri ata kəra kəthlərayeri arna na ɓɗakkarkara wa, kamnyar ata vəya ndaga giri ku pwi mətəpiyayeri ata kəra kəthlərayeri na akwa mbwarna na ɓɗakkarkara.’ ”

⁹Kamnyar ngəni I na MTHLAKU na ka Duna ta Shang akwa pəla, “Akwa shanga mətəpiyayeri na akwa nca giri na mjir Israila, mətəpi na kula kaciya ar ɗəffu wala ar dza aɗi na ata ləkwa mbwarna na ɓɗakkarkara ni wa.”

¹⁰“Amma mjir Lawi na ku hara ciju ka iya, ka sha, kara vəngkər səli aka haptayeri arɗa, akwa sakatə akwa mjir Israila pəramta kazhar laku na jirari ni, to, da ata sa bwani kamnyar su tə da hara ni.

¹¹Da ata hara ali kəthlər akwa vəi vəngkər səli ali na ɓɗakkarkara atar sək kəra nyarfayeri ar kuta bəbalər mbwar vəngkər səli, ka hara kəthlər akwa mbwar vəngkər səli ni. Da ata thlamta wulya mwaɓiyayeri natə mji səntə kamnyar hara saɗaka mbamba ka saɗakayeri damwa kəgari. Da ata wulwul mji ni ka hara ala ɗa kəthlər.

¹²Amma təng tə mjir Lawi ku hara kəthlər ala ɗa akəma haptayeri arɗa, ka ndzi sur tsamta səla mjir Israila, to, I na MTHLAKU na ka Duna ta Shang akwa kahyel abbər da ata sa bwani kamnyar su tə da hara ni.

¹³Da aɗi ata si kudzəhə ka iya abbər da ata hara ali kəthlər ar pristkur wa, wala shahədzi adzə suayeri na ɓɗakkarkara kəga suayeri na ɓɗakkarkara ta shang wa. Amma da ata ləkwa səli kamnyar surcikayeri tə da hara.

¹⁴Amma wala apani I ata vəi ɗa ka da ndzi mjir wul kəthlərayeri na akwa mbwar vəngkər səli, ka da hara shanga kəthlərayeri na akwa ka shanga suayeri natə kalkal ka mdə hara akwa.”

¹⁵“Amma mjir Lawi na pristayeri na akwa nyarmbwar Zadok, na ku ləkəma ka kəthlər ali akwa mbwar vəngkər səli akwa sakatə bwadukwa mjir Israila shinadzə bwahili ali ni, mji ndaga an ata sə si ka hara kəthlər ali. Da an ata hara ali kəthlər, ka hamta ali malkum ka mamshi. I na MTHLAKU na ka Duna ta Shang an pəla.

¹⁶Da an ata ləkwa mbwarna na ɓɗakkarkara, ka mwari adzə tebər arna, ka hara kəthlər ali, ka ɓəlatə tsawurna.

¹⁷Sakatə da ləkwa nyarfu na akwa kuta bəbal na avivi, da ata hatə ləptər lilin. Da aɗi ata ha ləptu natə mdə nam ka shishi sakatə da akwa kəthlər akwa nyarfayeri ar kuta bəbal na avivi wa, wala akwa kutambwar vəngkər səli wa.

¹⁸Da ata bartə kəra ɗa ka alebu ar lilin, ka da hatə hwandau ar lilin ata kusara ɗa. Da aɗiya ha su na ata sənta ala ɗa vəi gərgər wa.

¹⁹Tsuwa kəlara sakatə da ku ləɓəla akwa kuta bəbal na aɓəlaɓəla adzə mji ni, da ata fəi kari tə da hara kəthlər kəgari ni, ka da pwi ɗa akwa mbwayeri na ɓɗakkarkara ni, ka da hatə kari damwa, kamnyar ta dunar ɓɗakkarkarkur ni asə tsəkwar mambila mji ka dəkəi mji ni.

²⁰Pristayeri aɗi ata shi kəra ɗa wa, wala zhar ka shishir ɗa kəl saɓəl wa, təng ka da pamta shishir kəra ɗa daci.

²¹Prist aɗi na ata sa yimər anap sakatə tsa ata ləkwa kuta bəbal na avivi ni wa.

²²Prist aɗiya kəl mwala kughung wa, wala mwala na ku ndəka ka sal wa, amma tar ɓzərngkwa na ngkwar Israila, tsuwa na aɗi səndə sal wa, wala mwala kughung laga na ar prist.

²³Pristayeri ata thlipa aka mjirna zumzumkur na akwa daɓwa su na ɓɗakkarkara ka su na ndzang, ka mzhi ndəkɓəla zumzumkur na akwa daɓwa su na kəcəkəcari ka su na aɗi kəcəkəcari wa.

²⁴Ma sakatə beɗi ku nthləidzi akwa daɓwa mji, da an ata ndzi apa alkaliyayeri, ka hara shariya ni kalkal apatə I ku thlamta ala ɗa. Da ata ɓəlatə tsawayeri arna kəga suayeri tə I thlamta abbər ka mdə hara akwa shanga vir kucali tə I ku thlamta ala ɗa, tsuwa ka da ɓəlatə Vir Ghərəmtaghəra arna ka tsa ndzi ɓɗakkarkara.

²⁵Da aɗi ata ɓzamtə kərɗa atar mwari adzə mshi wa. Amma prist ata mzhi ɓzamtə kərni atar tsəkwar mshiyir baba'ni, wala mama'ni, wala ɓzərni, wala ngkwarni, wala ɓzərma'ni wala ngkwarma'ni na aɗi kəl sal katagu wa.

²⁶Aghəla tə tsa ku kəcimta kərni, tsa ata jikaɓəla vir murfa.

²⁷Ma vir tə tsa ku ləkwa Vəi na Ɓɗakkarkara, na akwa kuta bəbal na avivi, kamnyar hara kəthlər akwa Vəi na Ɓɗakkarkara ni, tsa ata hamta saɗakar kəcimta bikərni. I na MTHLAKU na ka Duna ta Shang an pəla.”

²⁸“Antə ngəni an ata ndzi kifər ɗa, kamnyar I an kifər ɗa. Antə giri aɗiya na ala ɗa vəi akwa Israila wa. I an kifər ɗa.

²⁹Da ata səm saɗakar mthli, ka saɗakar kəcimta biku, ka saɗakar ntə biku, tsuwa shanga su tə mdə ku hamta aka Hyel akwa Israila ata ndzi arɗa.

³⁰Tsuwa bwa na ntangkəma ar yarakəmar shanga sur faku, ka kəlara sur hamta ar shanga suayeri damwa, ata ndzi aka pristayeri. Tsuwa giri ata hamta ala ɗa mpwa natə mdə hərtə ntangkəma kamnyar ka barka wutədzi akwa kutakəyir giri.

³¹Pristayeri aɗi ata ɓɗə kəlara su na ku mtə dlipa wa, wala an ɗika, wala an mwaɓi, wala tsuwa natə mwaɓi damwa an tsi wa.”