Read bura-pabir Ezekiyel 45 Bible Online

Ezekiyel 45 - bura-pabir bible

Ezekiyel 45

¹“Ma sakatə giri ata ndəkə tsəɗi ni ka tsa ndzi kifa, ka giri vəi bwa laga akwa tsəɗi ni aka MTHLAKU, ka tsa ndzi bwa na ɓɗakkarkara, saɓəlkurərni ata ndzi dzartsi dəpu sərkumari ka ntəfu, ka baukurərni dzartsi dəpu sərkumari. Bwa ngəni swakti ata ndzi ɓɗakkarkara.

²Akwa kuta vəi ngəni mda ata thlaɓəla bəbal kamnyar mbwar vəngkər səli, natə bwa saɓəlkurərni ka baukurərni ata ndzi kalkal dzartsi aru ntəfu ntəfu. Tsuwa ata ɗəffa vəi ngəni tə mdə thlaɓəla ni, mda ata thlaɓəla bəbal laga natə olkurərni ata ndzi dzartsi ntəfkumari.

³Tsuwa akwa bwa na ɓɗakkarkara ni ga ata ngkərɓəla vəi laga natə saɓəlkurərni ata ndzi dzartsi dəpu sərkumari ka ntəfu ka baukurərni dzartsi dəpu kuma. Akwa bwa ngəni antə mda ata namtə Vəi na Ɓɗakkarkara, vəi tə Vəi na Ɓɗakkarkara ta shang ata ndzi akwa.

⁴Bwa ngəni an ata ndzi bwa na ɓɗakkarkara akwa tsəɗi ni. Antə bwa ngəni ata ndzi aka pristayeri na ana si adzə MTHLAKU akwa mbwar vəngkər səli kamnyar hara kəthlər alari. Vəi ni ata ndzi kamnyar kəyir ɗa ka tsuwa vəi na ɓɗakkarkara kamnyar mbwar vəngkər səli.

⁵Tsuwa bwa damwa natə saɓəlkurari ata ndzi dzartsi dəpu sərkumari ka ntəfu ka baukurari dzartsi dəpu kuma, ata ndzi aka mjir Lawi na ana hara kəthlər akwa mbwar vəngkər səli, vəi ni ata ndzi bwar kifər ɗa tə da ata ndzəndzi akwa.”

⁶“Tsuwa adzə bwa tə mdə thlaɓəla ɓɗakkarkara ni, ga ata thladzə bəbal laga natə saɓəlkurari ata ndzi dzartsi dəpu sərkumari ka ntəfu, ka baukurari dzartsi dəpu ntəfu, ka tsa ndzi aka bərni ni. Tsuwa bəbal ni ata ndzi aka shanga mjir Israila.”

⁷“Mda ata thlaɓəla bwayeri laga zumzum suɗa aka kuthli. Bwa na pal ata ndzi ata kəla bwar raghəi ar bwa na ɓɗakkarkara tə mdə thli aka pristayeri ka mjir Lawi, ni ka tsuwa bərni ni. Bwa na palari tsuwa ata ndzi ata kəla bwar ramta ar bwa na ɓɗakkarkara ni. Kəla bwa na pal ata təra har ka tsadza aka tsikəra tsəɗi na təbwar raghəi, antə kəla bwar ramta tsuwa ata təra har kara tsangkər aka Manda Meditereniya. Tsuwa saɓəlkurərni ata ndzi kalkal ka saɓəlkurər bwayeri tə mdə thli aka nyarmbwa pal ar Israila.

⁸Apani bwayeri ngəni suɗa akwa Israila ni ata ndzi alari. Antə kuthlyayeri natə I ku pwi ata kəra mjirna ni aɗi ata jaktə hara bwani ala ɗa kəra wa. Amma da ata zhar mjir Israila ka da wutə bwar tsəɗi kalkal ka nyarmbwayeri arɗa.”

⁹I na MTHLAKU na ka Duna ta Shang akwa pəla, “Ku mzhi apani, mjir Israila! Zhar giri haptə hangkal ka bwani aka mjirna, ka giri ncantə jirkur ka hara su na kalkal. Giri aɗiya jaktə kədləɓəla mjirna kazhar vəi ɗa wa. I na MTHLAKU na ka Duna ta Shang an pəla.”

¹⁰“Ka giri hara kəthlər ka sur ngkərtə su na kalkalari, watau balang na kalkalari ka bwakti na kalkalari.

¹¹Ka olkur kuta balang ni ndzi kalkal ka kuta bwakti ni, ka kuta balang kuma nghyantə duram pal, tsuwa ka kuta bwakti kuma nghyantə duram pal, duram an sur ngkər su na olari arɗa.

¹²Kəgəɓkurər shekel pal ata ndzi kalkal ka kəgəɓkurər gera pal pal sərkumari. Apani shekel pal pal ngkwakumari ata ndzi kalkal ka kəgəɓkur mina pal ala giri.”

¹³“Ngəni an hamta su tə giri ata harari. Giri ata hamta pal akwa kuta ngkwa ar kəlara auna na akwa duramər alkama, ka auna pal akwa kuta kəlara duramər barli.

¹⁴Ngəni an hamta su na ar mal zaitun tə giri ata harari. Giri ata hamta pal akwa kuta kuma ar kəlara bwakti na akwa kuta duram ar mal, kamnyar bwakti kuma an kalkal ka duram pal.

¹⁵Tsuwa giri ata hamta təma pal akwa kəlara ciɓa na ka təma aru suɗa, kəlara ciɓa na akwa Israila. Ngəni an hamta su na ar mthli, ka na ar saɗaka mbamba, ka na ar jakə mwardzi, kamnyar kələmta watsəɓər bikər ɗa. I na MTHLAKU na ka Duna ta Shang an pəla.

¹⁶Shanga mjir tsəɗi ni an ata hamta su ngəni aka kuthlir Israila.

¹⁷Amma kuthli ni an ata hamta mwaɓiyayeri tə mda ata hara saɗaka mbamba kəgari, ka mthlir saɗakar mpwa, ar yimər anap kamnyar saɗakar sur sa, akwa sakayeri ar kucali, ka kucalər thliya bilən, ka na Vir Ghərəmtaghəra, ka na ar shanga sakar kucali tə mdə ku thlamta aka mjir Israila. Tsa an ata hamta saɗakar kəcimta biku, ka na ar saɗakar mthli, ka saɗaka mbamba, ka na ar jakə mwardzi, kamnyar kələmta watsəɓər bikər mjir Israila.”

¹⁸I na MTHLAKU na ka Duna ta Shang akwa pəla, “Akwa vir na ntangkəma ar thliya na ntangkəma ga ata hamta ɓzər gyal na kula nangka kamnyar kəcimta mbwar vəngkər səli.

¹⁹Prist ata kətsə bwadukwa mamshi na ar saɗakar kəcimta biku ni, ka tsa ɗata ata udzəm nyarmbwar vəngkər səli, ka ata kuɗəmayeri na nfwar na akwa dethlər bagaɗi saɗaka ni, ka ata udzəmər nyarfur kuta bəbal na avivi.

²⁰Tsuwa tsu apani antə ga ata harari akwa vir na murfəkur ar thliya, ata vəya kəlara mdə na ku hara biku karkara wala atar tur sənda. Atar apani antə ga ata kələmta watsəɓər bikər mbwar vəngkər səli.”

²¹“Akwa vir na kumnya nfwarkur ar thliya na ntangkəma antə giri ata baɗitə hara kucali ar Fəlɓəla Kəi. Antə akwa kuta vir murfə ni giri ata kwasə buradi na kula yist.

²²Vir nda kuthli ata hamta ɓzər gyal kamnyar saɗakar kəcimta bikər kərari ka na ar shanga mji na akwa tsəɗi ni.

²³Akwa virayeri ngəni murfa ar kucali ni, tsa ata hamta maɗa' gyal murfa ka gam murfa na kula nangka, kamnyar hara saɗaka mbamba aka MTHLAKU. Tədəku viri tsa ata hamta nciwa kamnyar saɗakar kəcimta biku.

²⁴Tsa ata hamta mthli kamnyar saɗakar mpwa, balang pal kamnyar kəlara thla pal, balang pal kamnyar kəlara gam pal, ka galan ar mal kamnyar kəlara balangər mpwa.”

²⁵“Akwa vir na kumnya ntəfkur ar thliya na murfəkur, tsa ata baɗitə hamta mwaɓiyayeri ni kamnyar saɗakar kəcimta biku, ka saɗaka mbamba, ka saɗakar mpwa, ka mal, tədəku har vir murfa.”