Read bura-pabir Ezekiyel 46 Bible Online

Ezekiyel 46 - bura-pabir bible

Ezekiyel 46

¹I na MTHLAKU na ka Duna ta Shang akwa pəla, “Nyarfur kuta bəbal na avivi na ka kəmari abwar raghəi ni mda ata hartə ni mnyar vir ngkwa na ar kəthlər. Amma mda ata kəlarari Vir Ghərəmtaghəra, ka tsuwa vir kucalər Thliya Bilən.

²Ma kuthli thlata aɓəla, tsa ata ləkwari atar galahər nyarfu na aɓəlaɓəla, ka tsa thləthlata adzə udzəm nyarmbwar nyarfu ni. Antə pristayeri ata hamta saɗakarni ar saɗaka mbamba ka saɗakar jakə mwardzi, arni tsa ata nggyarghəidzi adzə bagaɗi nyarmbwar nyarfu ni ka vəngkər səli aka Hyel. Aghəla nda tsa ata ləɓəla, amma mda aɗi ata hartə nyarfu wa tar ma tahaku ku hara.

³Mjir tsəɗi ni ata nggyarghəidzi akwa lakur ləvəi akwa nyarfu ndaga ka vəngkər səli aka MTHLAKU akwa Vir Ghərəmtaghəra, ka vir kucalər Thliya Bilən.

⁴Saɗaka mbamba tə kuthli ata hamta aka MTHLAKU Vir Ghərəmtaghəra ni ata ndzi maɗa' təma ngkwa na kula nangka, ka gam pal na kula nangka.

⁵Tsuwa hangkurər saɗakar mpwa natə mda ata paktə hamtari ka gam ni ata ndzi balang pal, antə saɗakar mpwa natə mda ata paktə hamtari ka maɗa' gam ni ata ndzi kalkal ka su tə tsa amzhi wutari. Tsa ata hamta mal galan pal kamnyar kəlara balang ar mpwa.

⁶Akwa vir kucalər Thliya Bilən ni, tsa ata hamta ɓzər gyal na kula nangka, ka maɗa' təma ngkwa, ka gam pal, na kula nangka.

⁷Ar saɗakar mpwa, tsa ata hamta balang pal ata kəma duku ka gyal, tsuwa ka maɗa' gam apatə tsa amzhi wutari. Tsa ata hamta mal galan pal kamnyar kəlara balangər mpwa.

⁸Ma sakatə kuthli ni ata ləkwari, tsa ata ləkwari atar galahər nyarfu ni, tsuwa tsa ata ləɓəla tsu ata laku nda.

⁹Ma sakatə mjir tsəɗi ni ku si akəma MTHLAKU akwa kəlara sakar kucali tə mdə thlamta, mdə na ku ləvəi ata nyarfur yala kamnyar ra vəngkər səli, tsa ata sə ləɓəla ata nyarfur anəm. Tsuwa mdə na ku ləvəi ata nyarfur anəm, tsa ata sə ləɓəla ata nyarfur yala. Mda aɗi na ata ləɓəla ata nyarfu tə tsa ləvəi akwa wa, amma kəlara mda ata mwa tsək ka bwakəmari har ka tsa ləɓəla akwa nyarfu damwa.

¹⁰Ma sakatə da ata ləvəi, kuthli ni ata ləvəi ata kəma duku ka da. Tsuwa ma sakatə da ata ləɓəla tsa ata ləɓəla ata kəma duku ka da.

¹¹Akwa sakar kucalayeri ka sakayeri tə mdə thlamta akwa məva ni, saɗakar mpwa tə mda ata harari ka gyal ni, mda ata paktə hamtari ka mthli balang pal, tsuwa mda ata hara saɗakar gam ka mthli balang pal. Tsuwa mda ata hara saɗakar maɗa' gam ka su tə duna mda amzhi wutari, ka mdə paktə hamtari ka mal galan pal kamnyar kəlara mpwa balang pal.

¹²Tsuwa kəlara sakatə kuthli ata hamta sur hamta arni na ar hirər ɗəffu, wala an saɗaka mbamba, wala saɗakar jakə mwardzi abbər tsa an saɗakar hirər ɗəffu aka MTHLAKU, ka mdə kəlar alari nyarfu na ka kəmari awul raghəi ni. Antə tsa ata ləvəi ka hamta saɗaka mbamba wala saɗakar mpu ni tsu apatə tsa ana hara akwa Vir Ghərəmtaghəra. Aghəla nda antə tsa ata ləɓəla, antə ma sakatə tsa ku ləɓəla, mda ata hartə nyarfu ni.”

¹³“Kuthli ni ata hamta ɓzər gam na ka məvari pal, tsuwa na kula nangka kamnyar saɗaka mbamba aka MTHLAKU, apani antə tsa ata harari ɗəɗəp ɗəɗəpa.

¹⁴Tsuwa tsa ata paktə hamtari ka saɗakar mpwa ɗəɗəp ɗəɗəpa, pal akwa kuta ngkwa ar kəlara balang, ka tsuwa pal akwa kuta makər ar galanər mal, kamnyar ka mdə hərtə mpu ni kəgari, antə ngəni an saɗakar mpwa tə mda ata hamtari aka MTHLAKU. Ngəni an su tə mdə thlamta ata kəra hamta saɗaka mbamba tə mda ata ləkəma ka harari.

¹⁵Antə apani mda ata ləkəma ka hamta saɗaka ɓzər gam ka na ar mthli, ka na ar mal ɗəɗəp ɗəɗəpa, kamnyar hamta saɗaka mbamba ni tədəku.”

¹⁶“I na MTHLAKU na ka Duna ta Shang akwa pəla, ma kuthli ku hamta cauta na ar fakərni laga aka pal akwa nca maɗa'ni, to fakəu ndaga ni ata ndzi aka ɓzərni nda kəga maɗa'ni apa sur kifa ba saka madi.

¹⁷Amma ma kuthli hamta cauta na ar fakərni laga aka pal akwa nca buɗayeri arni, to fakə ni ata ndzi ar buɗarni har ka vədza aka məvar Kucalər Msərmsərkur. Aghəla nda tsa ata ngka ka fakə ni aka kuthli ni. Tar ɓzərni kəga maɗa'ni an ata kəsi cautər fakəu ka tsa ndzi kifər arɗa ba saka madi.

¹⁸Kuthli aɗi ata dlutsə su na ku ndzi kifa ar mji wa, ka tsa titiləmta ɗa kazhar kifər ɗa wa. Tar akwa nca su na arni ka kərari antə tsa ata mzhi kətari ka hamta aka maɗa'ni apa sur kifa, antə apani mda aɗi wala pal akwa nca mjirna tə mda ata dlutsə surni wa.”

¹⁹Antə mdə ni kətə ra kara ləvəi ka iya akwa lakur ləvəi na athlimbəla nyarfu ni, təbwar yala ka layir mbwayeri na ɓɗakkarkara ar pristayeri ni. Anda antə I wutə vəi laga akwa tsikəra mbwayeri ni na təbwar ramta.

²⁰Antə tsa pəla ali, “Ngəni an vəi tə pristayeri ata ɓwa kum na ar saɗakar kəcimta biku, ka saɗakar ntə biku, vəi tə da ata ɓwa saɗakar mthli, kamnyar ta da asə mwantə ɗa akwa kuta bəbal na aɓəlaɓəla, ka dunar ɓɗakkarkarkur ni sə tsəkwar mambila mji ka dəkəi mji ni.”

²¹Antə tsa kətə ra ka mwantə ra akwa bəbal na aɓəlaɓəla ni, ka mwantə ra akwa kuɗəmayeri na nfwar ar kuta bəbal ni. Antə I wuta akwa kəlara kuɗəma ni bəbal aɗi na raka raka.

²²Olkurər kəlara bəbal na raka raka akwa kuɗəmayeri ngəni nfwar ni an apani, saɓəlkurari dzartsi nfwarkumari ka baukurari dzartsi makkumari, shanga ɗa nfwar ni olkurər ɗa jili duku.

²³Tsuwa kəlara bəbal na akwa kuɗəmayeri ngəni nfwar ni, mdə ku kalaktə ka umdla, ka nci lindayeri ata kusara umdlə ni har ka kalakta.

²⁴Antə mdə ni pəla ali, “Nayeri ni an mbwar ta susəma natə mjir kəthlər akwa mbwar vəngkər səli ni ata ɓwatə saɗakayeri tə mji sənta.”