Read bura-pabir Ezekiyel 48 Bible Online

Ezekiyel 48 - bura-pabir bible

Ezekiyel 48

¹“Nggədza thləma nyarmbwayeri ar Israila ka bwar tsəɗi tə mdə hamta aka waskəi. Atar kəla bwar yala, Dan ata wutə bwa pal. Bwar tsəɗi na ar Dan an akwa tsikəra bwar yala. Kəla tsəɗiyirni baɗitə ka lakur Hethlon na ata mwari ahar Lebo Hamath, ka ləghəi ahar Hazar Enan na ata kəla Damaska təbwar yala kudzəhə ka Hamath. Antə Hazar Enan na ata kəla Damaska na akwa yala kudzəhə ka Hamath, an ata ndzi kəlari akwa bwa raghəi har ka mwanta akwa bwar ramta.

²Baɗita adzə bwar tsəɗiyir Dan, baɗitə təbwar raghəi har ka mwanta akwa ramta, an tsəɗi Asher, tsa ata wutə bwa pal.

³Baɗita adzə bwar tsəɗi Asher, baɗitə təbwar raghəi har ka mwanta akwa ramta, an tsəɗiyir Naftali, tsa ata wutə bwa pal.

⁴Baɗita adzə bwar tsəɗiyir Naftali, baɗitə təbwar raghəi har ka mwanta akwa ramta, an tsəɗiyir Manasse, tsa ata wutə bwa pal.

⁵Baɗita adzə bwar tsəɗiyir Manasse, baɗitə təbwar raghəi har ka mwanta akwa ramta, an tsəɗiyir Ifrayim, tsa ata wutə bwa pal.

⁶Baɗita adzə bwar tsəɗiyir Ifrayim, baɗitə təbwar raghəi har ka mwanta akwa ramta, an tsəɗiyir Ruben, tsa ata wutə bwa pal.

⁷Baɗita adzə bwar tsəɗiyir Ruben, baɗitə təbwar raghəi har ka mwanta akwa ramta, an tsəɗiyir Yahuda, tsa ata wutə bwa pal.”

⁸“Baɗita adzə bwar tsəɗi Asher, baɗitə təbwar raghəi har ka mwanta akwa ramta, an bwa tə giri ata zhar ni zum. Saɓəlkurərni ka baukurərni ata ndzi dzartsi dəpu sərkumari ka ntəfu, kalkal ka bwayeri tə mdə hamta aka bwadukwa nyarmbwayeri, baɗita akwa bwa raghəi ka mwanta akwa bwar ramta, antə mbwar vəngkər səli ata ndzi ata ɗəffa bəbal ngəni.

⁹Bwa tə giri ata zhari aka MTHLAKU ni ata ndzi dzartsi saɓəlkurari dəpu sərkumari ka ntəfu, ka baukurari dzartsi dəpu sərkumari.

¹⁰Bwa ngəni ɓɗakkarkar ni ata ndzi kamnyar pristayeri. Saɓəlkurərni təbwar yala ata ndzi dzartsi dəpu sərkumari ka ntəfu, ka baukurərni na təbwar ramta ata ndzi dzartsi dəpu kuma, ka baukurərni təbwar raghəi dzartsi dəpu kuma, ka saɓəlkurərni təbwar anəm dzartsi dəpu sərkumari ka ntəfu, ka mbwar vəngkər səli aka MTHLAKU ni ata ɗəffari.

¹¹Bwa ngəni ata ndzi aka pristayeri tə mdə hamta aka Hyel, watau pristayeri na akwa nyarmbwar Zadok, kamnyar da ku ɓəlatə tsawurna. Da aɗi təra kazhar ra sakatə mjir Israila təra kazhar ra apatə mjir Lawi hara ni wa.

¹²Antə vəi ngəni ata ndzi ala ɗa vəi na zum akwa kuta bwa na ɓɗakkarkara ni, antə tsa ata ndzi vəi na ɓɗakkarkara ta shang, na adzə bwar mjir Lawi ni.

¹³Tsuwa adzə bwar pristayeri ni, mjir Lawi ata wutə bwar ɗa, natə saɓəlkurərni ata ndzi dzartsi dəpu sərkumari ka ntəfu, ka baukurərni dzartsi dəpu kuma. Saɓəlkurər vəi ni ata kəma duku ata ndzi dzartsi sərkumari ka ntəfu, ka baukurərni dzartsi kuma.

¹⁴Tsuwa da aɗiya ɗələmta bwa ngəni wa, wala palɓəla vəi laga wa, wala kətə ka na aka mdə laga tsu wa, kamnyar tsa an ɓɗakkarkara antə tsa an ar MTHLAKU.

¹⁵Bwadukwari na mbila, natə saɓəlkurərni dzartsi dəpu sərkumari ka ntəfu, ka baukurərni dzartsi dəpu ntəfu ni, ata ndzi kamnyar kəthlərayeri na ndzang ar bərni ni, vəi tə mda ata həntə kəyayeri ka tsuwa mtaku kamnyar ɓəla. Antə bərni ni ata ndzi ata ɗəffari.

¹⁶Tsuwa nggədza laku tə olkurərni ata ndzi akwa. Atəbwar yala dzartsi dəpu nfwar ka aru ntəfu, atəbwar anəm dzartsi dəpu nfwar ka aru ntəfu, atəbwar raghəi dzartsi dəpu nfwar ka aru ntəfu, ka tsuwa atəbwar ramta dzartsi dəpu nfwar ka aru ntəfu.

¹⁷Tsuwa bərni ni ata ndzi ka bəbal. Atəbwar yala dzartsi aru suɗa ka ntəfkumari, atəbwar anəm dzartsi aru suɗa ka ntəfkumari, atəbwar raghəi dzartsi aru suɗa ka ntəfkumari, ka tsuwa atəbwar ramta dzartsi aru suɗa ka ntəfkumari.

¹⁸Bwadukwa bwar saɓəlkurərni na mbiləmta ata mnya bwa na ɓɗakkarkara ni ata ndzi dzartsi dəpu kuma təbwar raghəi, ka dzartsi dəpu kuma təbwar ramta, antə tsa ata ndzi adzə bwa na ɓɗakkarkara ni. Sur fakəu tə mda ata wutari akwa vəi ni ata ndzi susəmər mjir kəthlər akwa kuta bərni ni.

¹⁹Antə mjir kəthlər na akwa bərni ni na ata tsuhwari vəi ni an shanga nyarmbwayeri na akwa Israila.

²⁰Shanga vəi tə mda ata thlaɓəla ni zum ni ata ndzi dzartsi dəpu sərkumari ka ntəfu akwa kəlara bwa, watau bwa na ɓɗakkarkara ni ata kəma duku ka bwar bərni ni.

²¹Antə bwayeri na mbiləmta athlimbəla bwa na ɓɗakkarkara ni ka bwar bərni ni, ata ndzi aka kuthli. Bwarni ni ata baɗita adzə bwa na ɓɗakkarkara natə saɓəlkurərni dzartsi dəpu sərkumari ka ntəfu ni ka ləɓəla təbwar raghəi har pudza tsikəra bwa raghəi. Atəbwar ramta tsuwa kəla bwa ni ata baɗita adzə bwa na ɓɗakkarkara natə saɓəlkurari dzartsi sərkumari ka ntəfu ni ka ləɓəla təbwar ramta har ka pudza aka tsikəra bwar ramta. Shanga bwa ngəni na ndzi ret ka bwayeri tə mdə hamta aka nyarmbwayeri ni ata ndzi ar kuthli. Antə bwa ngəni ɓɗakkarkara ni na ka mbwar vəngkər səli ni ata ndzi ata ɗəffu.

²²Antə bwar mjir Lawi, ka bwa tə mdə thlaɓəla aka bərni ni, ata ndzi ata ɗəffa bwa tə mdə zhari aka kuthli ni. Apani bwar kuthli ni ata ndzi akwa daɓwa tsəɗi Yahuda ka tsəɗi Benjamin.”

²³“Bwadukwa nyarmbwayeri na mbiləmta ni tsuwa ata wutə bwar ɗa. Baɗita abwar raghəi ka mwanta akwa ramta, nyarmbwar Benjamin ata wutə bwa pal.

²⁴Baɗita adzə bwar tsəɗiyir Benjamin, baɗitə təbwar raghəi har ka mwanta akwa ramta, an tsəɗiyir Simeyon, tsa ata wutə bwa pal.

²⁵Baɗita adzə bwar tsəɗiyir Simeyon, baɗitə təbwar raghəi har ka mwanta akwa ramta, an tsəɗiyir Issakar, tsa ata wutə bwa pal.

²⁶Baɗita adzə bwar tsəɗiyir Issakar, baɗitə təbwar raghəi har ka mwanta akwa ramta, an tsəɗiyir Zebulun, tsa ata wutə bwa pal.

²⁷Baɗita adzə bwar tsəɗiyir Zebulun, baɗitə təbwar raghəi har ka mwanta akwa ramta, an tsəɗiyir Gad, tsa ata wutə bwa pal.

²⁸Baɗita adzə bwar tsəɗiyir Gad na akwa bwar anəm, kəl ni ata thlata akwa Tamar ka ləghəi akwa yimayeri ar Meriba Kadesh, anda kəl ni ata nu mnya zərkər Masar har ka tsa ləghəi akwa Manda Meditereniya.

²⁹Ngəni an tsəɗi tə giri ata ndəkəmta aka nyarmbwayeri ar Israila ka tsa ndzi kifər ɗa, tsuwa nayeri ni an ata ndzi bwayeri tə mdə ndəkəmta ala ɗa. I na MTHLAKU na ka Duna ta Shang an pəla.”

³⁰“Nayeri ni an ata ndzi nyarfayeri ar ləɓəla akwa bərni ni. Atəbwar yala natə saɓəlkurər katanggarni dzartsi dəpu nfwar ka aru ntəfu ni,

³¹mda ata vətə nyarfayeri makər, nyarfur Ruben, ka nyarfur Yahuda, ka nyarfur Lawi. Mda ata vətə thləma nyarfayeri ar bərni ni ka thləma nyarmbwayeri ar Israila.

³²Atəbwar raghəi natə saɓəlkurər katanggarni dzartsi dəpu nfwar ka aru ntəfu ni, mda ata vətə nyarfayeri makər, nyarfur Yusuf, ka nyarfur Benjamin, ka nyarfur Dan.

³³Atəbwar anəm natə saɓəlkurər katanggarni dzartsi dəpu nfwar ka aru ntəfu ni, mda ata vətə nyarfayeri makər, nyarfur Simeyon, ka nyarfur Issakar, ka nyarfur Zebulun.

³⁴Atəbwar ramta natə saɓəlkurər katanggarni dzartsi dəpu nfwar ka aru ntəfu ni, mda ata vətə nyarfayeri makər, nyarfur Gad, ka nyarfur Asher, ka nyarfur Naftali.

³⁵Saɓəlkurər katangga na kalaktə bərni ni an dzartsi dəpu kumnya ncisu. Tsuwa baɗitə ka kulini thləma bərni ni ata ndzi, ‘MTHLAKU AZI!’ ”