Read bura-pabir Ezekiyel 5 Bible Online

Ezekiyel 5 - bura-pabir bible

Ezekiyel 5

¹“Antə ar nga, gə na ɓzər mda, kətə katsakar na ata səma, ka gə hara kəthlər kəgari apa reza, kara shimta kəra ga ka kumiya ga kəgari. Ka gə ngkərtə kəgəɓkur shishi ni ata səkel, ka gə ndəkəi ni ka bwa makər.

²Ma sakatə virayeri ar kalaktə bərni ka mpa ni ku kuri, ga ata kətə bwa pal, ka gə mbamta akwa u'u ata ɗəffa bərni ni. Bwa na pal ka gə thləthlamta ka katsakar ka gə titiləmta ɗa har ka kalaktə bərni ni. Antə bwa na mbil pal ni tsuwa ka gə titiləmta akwa shambar, antə I ata nu bwa ngəni pal ni ka katsakar arna.

³Tsuwa akwa kuta shishi ngəni, ga ata kətsari raka, ka gə mbwata ata mnya ləptər nga.

⁴Tsuwa har ba kulini akwa kuta shishi ngəni, ga ata kətsari raka, ka gə pu akwa u'u, ka da mbamtadzi akwa u'u ni. Antə u'u ata thlata akwa vəi ndaga, ka tsa ləkwa shanga kəyir mjir Israila.”

⁵Antə MTHLAKU na ka Duna ta Shang pəla, “Ngəni an Urushalima. I vəi ni ata ɗəffa tsəɗiyayeri na akwa duniya, tə tsəɗiyayeri damwa ku kalaktə ni.

⁶Amma kamnyar kəmanggarkur na ɗimi kamta, antə mjir Urushalima nggəlar ta kələngkər aka tsawayeri arna kəga suayeri tə I thlamta abbər ka mdə hara, nggyarɗəkurər ɗa ni ɗimi ta mjir tsəɗiyayeri na kalaktə ɗa. Da nggəlar ɓəla tsawayeri arna ka nggəlar ta nu surthlipərna.

⁷Kamnyar ngəni MTHLAKU na ka Duna ta Shang akwa pəla, təng tə giri hir thlentə hangkala mda təramta tsəɗiyayeri na kalaktə giri, tsuwa tə giri aɗi nu surthlipərna wa, wala ɓəlatə tsawayeri arna wa, amma giri nu surharar tsəɗiyayeri na kalaktə giri,

⁸to, I na MTHLAKU na ka Duna ta Shang ni akwa pəla, I ma I ata ndzi dawar giri. Antə I ata hara ala giri shariya ata nca mjir duniya.

⁹Kamnyar hangkur surcikayeri tə giri hara, I ata hara ala giri su tə I aɗi ɗar harari wa, tsuwa su tə I aɗi ata jaktə harari kəra wa.

¹⁰Kamnyar mjir ya ata sə ɓɗə maɗa' ɗa antə maɗa' tsuwa ata sə ɓɗə mjir yar ɗa. I ata ɗi giri. Antə mji na ku mbil ka mpika akwa nca giri, I ata titiləmta ɗa akwa kəlara bwa.”

¹¹“Antə I akwa kahyel abbər, apatə I na MTHLAKU na ka Duna ta Shang, aɗi ka mpika, təng tə giri ku diɓərantə Vəi Ndzəndziyirna na Ɓɗakkarkara ka shanga suayeri na adiya adiya, to I ata nggəlar giri. I aɗi ata zhar giri wa, tsuwa I aɗi ata kətadzə giri wa.

¹²Bwa na pal akwa kuta makər ar mjir giri ata mta atar shilku wala mi. Bwa na palari ata kurəmtadzi akwa mpa ata hildi. Antə bwa na palari tsuwa I ata titiləmta ɗa akwa kəlara bwa, kəi ntsuɓəla katsakarərna kəi nu dəlpa ɗa.”

¹³“Atar apani antə ɗəffi ata pwi. Antə I ata pumta ɗəffi na bwarbwar ni ata kəra ɗa, antə ɗəffi ata pəpəi. Ma sakatə I ku pumta ɗəffi ata kəra ɗa, antə da ata sə nggaɓəla abbər I na MTHLAKU gari ni kamnyar I akwa bara ka da hir ra ka ɗəffa ɗa swakti.

¹⁴Tsuwa I ata hara ka gə na Urushalima ndzi fya, ka sur rutə akwa nca mji na kalaktə nga, ka aka kəlara mdə na ata təramta adzə nga.

¹⁵Giri ata ndzi sur ruta, ka sur kumshi, ka sur ngkəra, ka sur thlivəra aka shanga tsəɗiyayeri na kalaktə giri, akwa sakatə ku hara ala giri shariya ka ɗəffə ɓzəɓza, ka mpa na mwavər, ka ɗi giri ka ɗəffu.

¹⁶Ma sakatə I ku psi afayeri ngəni na ata kurəmta mji ni ata kəra giri, afayeri ar mi, ka na ar hilantə su, tə I ata psi ɗa ata kəra giri ka da hilantə giri, I ata səntə mi na mwavərari ata kəra giri, kəi thlamta lakur wutə susəmər giri.

¹⁷I ata thlentə mi ka mwaɓiyayeri ar mtaku ata kəra giri, antə da tsəgəi maɗa' giri. Tsuwa I ata thlentə shilku, antə mji ata sə tsəgəidzi akwa tsəɗiyir giri, tsuwa I ata səntə mpa ata kəra giri. I na MTHLAKU an pəla.”