Read bura-pabir Ezekiyel 6 Bible Online

Ezekiyel 6 - bura-pabir bible

Ezekiyel 6

¹Antə MTHLAKU gari ali ka pəla,

²“Ɓzər mda, shinar kəma ga təbwar garayeri ar Israila, ka gə hara naɓikur ata kəra ɗa.

³Pəla aka garayeri ar Israila ndər tə MTHLAKU na ka Duna ta Shang pəla. Nggədza su tə MTHLAKU na ka Duna ta Shang akwa pəla aka garayeri ka ɗəɗəgəlayeri, ka aka mularayeri na raka raka ka na ol'ola. Nggədza kulini I ka kərna an ata səntə mpa ata kəra giri, kəi huzamta vəyayeri tə giri ana vəngkər səli aka haptu.

⁴Mda ata huzamta bagaɗiyayeri ar giri, ka pukthləmta bagaɗiyayeri ar sur shiwura. Tsuwa I ata tsəgəi mji akwa nca giri, kəi pumta ɗa akəma haptayeri ar giri ni.

⁵I ata pumta mshiyir mjir Israila akəma haptayeri arɗa, kəi titiləmta ɗethlər ɗa shang ka tsa kalaktə bagaɗiyayeri ni.

⁶Akwa kəlara bərni tə giri ka ndzi akwa, bərniyari ata ndzi fya, tsuwa kəlara vəi vəngkər səli ar giri ata ndzi hilhilari, kamnyar ka bagaɗiyayeri ar giri higəlantədzi ka ndzi kula ampani. Mda ata ɓəgələmta haptayeri ar giri ka hilantə ɗa, ka mdə pukthləmta kəlara bagaɗi sur shiwura ar giri, ka mdə famta shanga suayeri tə giri nam ka tsiya giri.

⁷Mda ata tsəgəi mji laga akwa nca giri, antə giri ata sə nggaɓəla abbər I an MTHLAKU.”

⁸“Amma wala apani, I ata zhar mji laga akwa nca giri ka mpika. Kamnyar mji laga akwa nca giri ata msərəmta mtər katsakar, ka titiləmtadzi akwa tsəɗiyayeri damwa.

⁹Antə mji na akwa nca giri na ku msər ka mpikə ni ata sə ɗangtə ra akwa tsəɗi tə mdə mwantə ɗa akwa mafakur ni. Da ata nggaɓəla abbər ɗəffi an ɓzi adzə ɗa kamnyar kula jirkur tə da kəgari atar nu nggukər ɗəffa ɗa na ɗimi ni, har tə da shinadzə bwahili ali, ka nu nggukər nca ɗa ka ra vəngkər səli aka haptayeri arɗa. Aghəla nda, da ata sə kyarəmta kərɗa kamnyar suayeri na ɗimi ɗimi tə da hara ni, kamnyar shanga suayeri tə da hara ni an sur cika.

¹⁰Antə da ata sə nggaɓəla abbər I an MTHLAKU, tsuwa I aɗi pəla abbər I ata sənta asar ata kəra ɗa ni kula suari aɗi wa.”

¹¹Antə MTHLAKU na ka Duna ta Shang pəla, “Putə tsiya ga ata mnya ga, ka gə tsa səla ga ata di, ka gə tsa rara, ka pəla, ‘Aiyi.’ Ka gə hara apani kamnyar shanga ɗimikur ka sur cika tə mjir Israila ku hara. Kamnyar tə da ata kurəmtadzi akwa mpa, wala atar mi, wala atar shilkayeri.

¹²Mji na ciju ata mta atar nggawakur, mji na kudzəha ata mta akwa mpa, antə mji na ku mbil ka mpika ata mtər mi. Apani antə I ata pumta bwarbwarkurər ɗəffi na thlatə ni ata da.

¹³Antə da ata sə nggaɓəla abbər I an MTHLAKU, ma sakatə da ku wutə mshiyir ɗa apumta akwa nca haptayeri arɗa har ka kalaktə bagaɗiyayeri arɗa, ka ata kəra kəlara ɗəɗəgəl, ka ata kəra shanga garayeri, ka akira kəlara nfwa na ola, ka kəlara nfur ok na ol'ola, ka akwa kəlara vəi tə da ana mba sur shiwura aka haptayeri arɗa.

¹⁴I ata ndərar tsi təbwar ɗa, kəi hara ka tsəɗiyir ɗa ndzi fya kula ampani, akwa shanga vəi ndzəndziyir ɗa, su na baɗita akwa mtaku ni har ka mwanta adzə Dibla. Antə da ata sə nggaɓəla abbər I an MTHLAKU.”