Read bura-pabir Ezekiyel 7 Bible Online

Ezekiyel 7 - bura-pabir bible

Ezekiyel 7

¹Antə MTHLAKU ku si adzə ra ka gari ali abbər,

²“Gə na ɓzər mda, pəla aka mjir Israila su tə I na MTHLAKU na ka Duna ta Shang akwa pəlari ni, abbər, Ngəni an Datari! Datər su ku si ata kəra kuɗəma na nfwar ar tsəɗi ni!

³Kulini shanga su na ata kəra ga ku si akwa datari, antə I ata pumta ɗəffi na bwarbwar ni ata kəra ga. I ata hara ala gə shariya ata kəra halər nga, kəi ɗi nga kamnyar shanga sur cika tə gə hara.

⁴I aɗi ata zhar giri wa, tsuwa I aɗi ata kətadzə giri wa. Jiri, I ata ɗi giri kamnyar hala giri na ɗimi ni, ka tsuwa kamnyar sur cika tə giri hara ni. Antə giri ata sə sənda abbər I an MTHLAKU.”

⁵Ngəni an su tə MTHLAKU na ka Duna ta Shang pəla, “Asar ata si ata kəra giri ata kər ata kər!

⁶Datari ku si! Datari ku si! Su ni ku si ata kəra giri ashina! Virari ku si!

⁷Mənggəla ku si ata kəra giri, giri na ka dzi akwa tsəɗi ni. Saka ni ku hara, virari ku hara kudzəha. Aɗi ata fəi wa mji ata hara kurakər damitədzi, ata kəra garayeri ni, aɗi kurakər kucali wa.

⁸Kula shamta saka I ata pumta ɗəffi na bwarbwar ni ata kəra giri, ka ɗəffi pwi ata kəra giri. I ata hara ala gə shariya ata kəra halər nga, kəi ɗi nga kamnyar shanga sur cika tə gə hara.

⁹I aɗi ata zhar giri wa, tsuwa I aɗi ata kətadzə giri wa. I ata ɗi giri kamnyar hala giri na ɗimi ni, ka tsuwa kamnyar sur cika tə giri hara ni. Antə giri ata sənda abbər I na MTHLAKU ni an ɗi giri ni.”

¹⁰“Vir ni ku si! Tsa ku si! Asar ku bəzəkəi kərni, zwalər hirkər ku thləla, kula jirkur ku pukdla!

¹¹Thlentər hangkal ku yatədzi hang, ka ndzi zwalər kəmanggarkur. Mda aɗi na ata mbila akwa nca ɗa ngəni dlama dlama ni wala duku wa, wala gənar ɗa, wala kariyir ɗa na ka daraja, aɗi na ata mbil wa.

¹²Saka ni ku hara, vir ni ku si. Antə mdər masə su aɗiya hara kucali wa, tsuwa mdər ɗələmtari aɗiya ɓzə ɗəffu, kamnyar ɗəffə bwarbwarkur arna ni ata si ata kəra shanga ɗa.

¹³Kamnyar mdər fəli aɗi na ata jaktə ngka ata kəra su tə tsa ɗələmta wa, təng tə mdər ɗələmtari ka mdər masari ni tsu aɗi ka mpika. Kamnyar su tə mdə wuta akwa wulsu ni ata tsəkwar shanga mji, tsuwa mda aɗi ata zhar harari wa. Kamnyar bikər ɗa, mda aɗi wala pal akwa nca ɗa na ata mzhi ɓəlatə mpikari wa.”

¹⁴Wala ma da an mbur təmbəl, abbər ka waskəi ɗəmhədzi, mda aɗi na ata ləɓəla kamnyar mpa wa, kamnyar ɗəffi ku ɓzi ata kəra shanga mji.

¹⁵“Aɓəla ata hildi mpa aɗi, ata kuta di tsuwa nggawakur ka mi aɗi. Mji na aɓəla akwa mtaku ata mta akwa mpa, antə mji na akwa kuta di ata mta kamnyar mi ka shilku.

¹⁶Shanga mji na ku msər ka mpika, da ata hwi ləkwa garayeri, ka ndzəndzi anda apa bukəlayeri na hwi səɓəla akwa mularayeri kamnyar bara vəi na kula damitədzi, waskəi akwa tuwa kamnyar bikərni.

¹⁷Tsuwa tsiya waskəi ata mtə shatu, ka ɓunjari ndzi kula duna.

¹⁸Da ata hatə dasa kamnyar ncanta abbər ɗəffa ɗa ku ɓzi, ka ndzi akwa yakata ka duna. Da ata hərtə kəma ɗa kamnyar səli na akwa nca ɗa, ka da ata shimta kəra ɗa.

¹⁹Da ata pugəmta adzərfar ɗa ata mnya lakur kuta di, ka dinarər ɗa ndzi apa mzhiku. Da ata pumta dinar ka adzərfa ni kamnyar tə suayeri ngəni aɗi ata mzhi mbuli ɗa akwa vir tə ɗəffa MTHLAKU ku ɓzi wa. Suayeri ngəni aɗi ata kuri ala ɗa mi wa, wala ndlantə kuta ɗa wa, kamnyar tsu suayeri ngəni an vu ɗa akwa hara biku ni.

²⁰Da ana gaya ata kəra sur dəɓar ɗa na ɓɗakɓɗaku, ka kəthlər kəgari akwa nam haptayeri kəga suayeri na dludzər suayeri na ana hara cika aka mda. Antə apani I ata namtə suayeri ngəni ka da ndzi kula ampani ala ɗa.”

²¹“I ata hamta ɗa apa bumtər su aka mji na mətəpi, kəi vu ka kəmanggarayeri na akwa duniya famnya sur giri, ka da ɓzamtə ka diɗi.

²²I ata shinamta kəmi kazhar ɗa, antə da ata hilantə Vəi Ndzəndziyirna na ka daraja. Tsuwa dəkalayeri ata ɓəl mbwarna ka da diɓərantə kutari.

²³Namtə can, kamnyar tsəɗi ni ku nghyi ka mamshir kəmanggarkur, antə bərni ni ku nghyi ka haptər hangkal.”

²⁴“Antə apani I ata səntə mjir tsəɗi na kəmanggar ta shang ka da fatə kifər kəyayeri ar mjir Israila. I ata vu ka kər olkur ar mji na ka duna kura, kəi vu ka mdə diɓərantə vəyayeri tə da ana vəngkər səli ata.

²⁵Ma sakatə sur thlivərantə mdə ku si ata kəra ɗa, da ata sə bara ndzəndzi lapiyakur, amma da aɗi ata wutari wa.

²⁶Antə asar ata kəra asar ata sə si, ka ndər ngkərngkəra ata kəra ndər ngkərngkəra. Da ata sə bara ka da wutə labar akəla naɓiyayeri, ka bara ka pristayeri thlipa ala ɗa tsawur Hyel, ka bara sauri akəla mji ol'ola, amma su aɗi tə da ata wutari wa.

²⁷Kuthli ata sə tuwa, ka kwakunayeri ndzi kula mbərsata, antə tsiya mjir tsəɗi ni ata sə ɓathla kamnyar thlivəra. I ata ɗi ɗa kalkal ka surharar ɗa, apatə da hara aka mji antə I ata hara ala ɗa. Antə da ata sənda abbər I an MTHLAKU.”