Read bura-pabir Ezekiyel 8 Bible Online

Ezekiyel 8 - bura-pabir bible

Ezekiyel 8

¹Akwa vir na ntəfkur ar thliya ngkwa ar məva na ngkwakur tə yeru akwa mafakur, sakatə I andzəndzi aharngkəya ka mji ol'olər Yahuda andzəndzi akəmi, antə dunar MTHLAKU na ka Duna ta Shang ku si ata kəri.

²Sakatə I wul su, təng I wutə su laga apa dludzər mda. Baɗita ata su na dludzi ka kusarari har ka ləghəi an apa u'u. Tsuwa su na baɗita ata kusarari har ka ləmta akwa mbəlmbəla apa liyar əmza tə mdə fwavumta.

³Antə tsa ndəraɓəla su laga na dludzi ka tsi, ka kətə ra ata shishir kəri. Antə akwa wulsu na ar Hyel, mambəl si ka haptə ra amta akwa daɓwa hyel ka di, ka mwantə ra ahar Urushalima. Tsa mwantə ra akwa nyarfur yala na ata ləvəi akwa kuta bəbalər mbwar Hyel na avivi ni, akwa vəi tə mdə vəi haptu na sur cika ka sur thlentə hangkal ni.

⁴Təkəma təng I wutə parakər səliyir Hyelər Israila ni anda, tsu apa tə I wuta akwa saka na təramta akwa mular nda.

⁵Antə Hyel pəla ali, “Ɓzər mda, haptə nca ga kara wul su təbwar yala.” Antə I haptə nci ka wul bwar yala ni, ka wutə haptər thlentə hangkala Hyel ni anda akwa anyarmbwar nyarfur mwari adzə bagaɗi na abwar yala ni.

⁶Antə tsa pəla ali, “Ɓzər mda, ga ku wutə sur cika na ol'ola tə mjir Israila akwa harari azi ni ya? Da akwa hara apani ni kamnyar ka da kədləmta ra kazhar Vəi Ndzəndziyirna na Ɓɗakkarkara ni. Ndzi tsu ga ata wutə sur cika damwa na ol'ola ta ni!”

⁷Antə tsa mwantə ra anyarfur ləvəi akwa bəbalər kutakəyir Hyel ni. Sakatə I ha nci, təng I wutə gula laga ata dza banggwa.

⁸Antə tsa pəla ali, “Ɓzər mda, ntuli ku ata dza banggwa ni.” Sakatə I ku ntuli ku ata dza banggwa ni təng I wutə nyarmbwa laga.

⁹Antə tsa pəla ali, “Ləmbwa, ka gə wutə ɗimikur sur cika tə da akwa harari akwa vəi ngəni ni.”

¹⁰Antə I ləmbwa, ka wutə ɗahayeri na dludzi ka suayeri na ana mwa ka yimər kuta ɗa ata di, ka shanga mwaɓiyayeri na sur cika, ka dludzər shanga haptayeri na akwa Israila ata dza mbwa ni har ka kalakta.

¹¹Tsuwa akəma ɗa an mji ol'olər Israila murfəkumari na athləthlata akəma ɗa, ka Yaazaniya na ɓzər Shafan akwa nca ɗa. Kəlara mda akwa nca ɗa ka hahəi mba sur shiwura akwa tsiyari, ka dlambar ɗerər sur shiwur ni akwa ləmta.

¹²Antə tsa pəla ali, “Ɓzər mda, ga ku wutə su tə mji na ol'olər Israila akwa harari akwa kuthlu ni ya? Waskəi ka dludzər haptu ambwar ngkiɗa. Kamnyar da pəla, ‘MTHLAKU aɗi akwa wutə yeru wa, MTHLAKU ku fwari ata kəra tsəɗi ni.’ ”

¹³Antə tsa jaktə pəla ali, “Ba kulini ga ata wutə sur cika damwa na ol'ola ta ngəni!”

¹⁴Antə tsa səntə ra akwa nyarfur bwar yala ar ləvəi akwa mbwar MTHLAKU. Təng anda tsuwa I wutə mwanki laga andzəndzi akwa tuwa mtər haptu Tammuz.

¹⁵Antə tsa pəla ali, “Ɓzər mda, ga ku wutə su ngəni ya? Ga ata wutə sur cika damwa na ol'ola ta nayeri ni.”

¹⁶Antə tsa mwantə ra akwa kutambwa na avivi ar mbwar MTHLAKU ni. Təng nggədza anyarmbwar vəngkər səli aka MTHLAKU ni, akwa daɓwa galahəu ka bagaɗi ni, mji shili sərkumari ka ntəfu, ka bwahila ɗa awul mbwar vəngkər səli aka MTHLAKU ni, azuzuri ka bwakəma ɗa abwar raghəi, akwa vəngkər səli aka pci.

¹⁷Antə tsa pəla ali, “Ɓzər mda, ga ku wutə su ngəni ya? Akwa wutər nga tsa su na raka ya, tə ka mjir Yahuda hara sur cika ngəni azi ni? Har su ngəni ku vu tə da thlentə hangkala shanga mji na akwa tsəɗi, ka jaktə mbwantə ɗəffi ka damwa. Wul, har da akwa hara sur ɓzamtə ɗəffi akwa laku na ɗimi ta shang!

¹⁸Antə akwa ɗəffə bwarbwarkurərna I ata ɗi ɗa kula kətadza. Antə wala da an kəga ka kuraku na ol'ola akwa adduwa, I aɗi ata psi thləm ala ɗa wa.”