Read bura-pabir Ezekiyel 9 Bible Online

Ezekiyel 9 - bura-pabir bible

Ezekiyel 9

¹Aghəla nda, antə I nggatə MTHLAKU akwa kəga ka kuraku na ola, abbər, “Ka shanga giri shahədzi, giri na mjir ɗi mjir bərni ni, ka waskəi si ka sur mpar arni na mwavər akwa tsiyari.”

²Təkəma təng I wutə mji shili laga ngkwa akwa səɓəla təbwar Nyarfu na Amta na awul bwar yala, waskəi ka kari mpa na mwavər akəlari. Tsuwa mdə laga aɗi adzə ɗa na ka ləptər lilin, ka thləvur sur rəbutə tə tsa hahəi ata athlimbəlari. Antə da ləmbwa, ka thləthlata adzə bagaɗi saɗaka tə mdə nam ka əmza ni.

³Ata saka ndaga parakər səliyir Hyel na ar Israila ku ləmta kazhar kerubayeri tə tsa ndzəndzi ata ni, ka mwari adzə bagaɗi nyarmbwa ni. Antə tsa kəga mdə na ka ləptər lilin ni, na ka thləvur rəbutə hahari ata thlimbəlari ni.

⁴Antə MTHLAKU pəla alari, “Mwari akwa shanga bərni Urushalima ni, ka gə vətə seɗa ata murkəma kəlara mdə na akwa wahəi ka nggyinggya kamnyar shanga sur cika tə mdə harata akwa bərni ni.”

⁵Antə I nggatə ni akwa pəla aka mji bwaduku, “Nutə gir ni akwa kuta bərni ni, ka giri tsi kəlara mda. Giri aɗiya zhar wala mdə duku ka mpikə wa, tsuwa giri aɗiya kətadzə wama wa.

⁶Ka giri tsəgəi mji halhala, ka maɗadakwi kəga maɗankwi, ka mwanki kəga maɗankyar. Amma giri aɗiya tsəkwar mji na ka seɗa ata murkəma ɗa ni wa. Tsuwa ka giri baɗita akwa Vəi ndzəndziyirna na Ɓɗakkarkara ni!” Apani antə da ku baɗitə ka mji ol'ola na akəma Vəi na Ɓɗakkarkara ni.

⁷Antə Hyel pəla ala ɗa, “Ɓzamtə giri mbwar vəngkər səli ni, ka giri nghyantə kuta bəbalər mbwar Hyel ni ka mshiyayeri. Mwar gir ja!” Antə da ku təra mwari, ka tsəgəi mji na akwa kuta bərni ni.

⁸Sakatə da akwa tsəgəi mji, təng I sə mbil I shira. Antə I ndla ka murkəmi ata di, ka tuwa abbər, “MTHLAKU na ka Duna ta Shang, ga ata kurəmta shanga mjir Israila na mbil ni, sakatə ga akwa pumta ɗəffa gə na bwarbwar ata kəra Urushalima ni ya?”

⁹Antə tsa pəla ali, “Bikər mjir Israila ka Yahuda ni ku hara hang kamta. Da ku tsəgəi mji ka ɓzamtə kəlara bwa akwa tsəɗi ni ka mamshi, tsuwa jirkur aɗi akwa bərni ni wa. Kamnyar da akwa pəla, ‘MTHLAKU ku təra kazhar tsəɗi ni, tsuwa MTHLAKU aɗi ana wutə mburu wa.’

¹⁰Antə arna, I aɗi ata zhar mdə wala duku wa, tsuwa I aɗi ata kətadzə mda wala tifəmta ala ɗa wala kətadzə ɗa wa, amma I ata ntəmta ɗimikur tə da hara ni ata kəra ɗa.”

¹¹Antə mdə na ka ləptər lilin, na ka thləvur sur rəbutə hahari ata thlimbəlari ni ku ngka ka pəla, “I ku haratə su tə gə tsawa ali abbər kəi hara ni.”