Read bura-pabir Daniyel 10 Bible Online

Daniyel 10 - bura-pabir bible

Daniyel 10

¹Akwa məva na makərkur sakatə Sairus an kuthlir Parsiya, antə ndər laga ku kəlardzi aka Daniyel natə mda ana kəga Belshazza. Ndər ni an jiri amma mwavər ka mdə nggaɓəla, tsuwa ndər ni ata kəra mpa. Tsa ku vədzə hangkalari aka ndər ni, antə mdə ku ngkərɓəla alari karapur su tə tsa wuta akwa wulsu ni.

²Akwa virayeri nda, I na Daniyel akwa tuwa ar sati makər swakti.

³I aɗi səm susəma na lapiya wa, wala ɓɗə kum, wala sa yimər anap wa. Tsuwa I aɗi kəkər mal wa, tar tə sati makər ni kura.

⁴Akwa vir na sərkumari ka nfwarkur ar thliya ntang ar məva ni, I ku thləthlata ata mnya gagəma ar Thlyagha Tigris.

⁵Sakatə I ha nci, təng I wutə mdə laga na hatə ləptər lilin, ka mbwi kusarari ka byaltu ar dinar na ɓɗaku,

⁶dzari akwa mbəlmbəla apa pelar dəɓa. Kəmari parakəu apa wurka, ncari akwa mba apa u'u, tsiyari ka nggilangari akwa hamta parakəu apa əmza tə mdə fwavumta, ka kurakari apa kuraka dlamar mji.

⁷Antə təng I shira an wutə su ni. Mji na adzə ra aɗi wutə wa, amma da ku thlivəra ka hwi ka ɗuwardzi.

⁸Antə da ku zhar ra shira anda akwa wul su ngəni. Duni ku kuri, kəmi ku palidzi har tə mda amzhi nggaɓəla ra kəra wa.

⁹Sakatə I nggatə kurakari təng təkəma I thləvamtadzi ka ndla ka murkəmi ata di ka fəi anda.

¹⁰Aghəla nda təng tsiya mdə laga kəsi ra ka thlentə ra ata tsi ka ɓunji, I tsu akwa kədza.

¹¹Mdərthlentərhyel ni pəla ali, “Daniyel, Hyel hir nga. Thlatə kara nggatə su tə I ata pəla ala ga, kamnyar mdə ku thlentə ra adzə nga.” Təkəma tə tsa kuri gari ni antə I thlatə ka dzi tsu akwa kədza.

¹²Antə tsa pəla ali, “Daniyel, ga aɗiya thlivər wa, kamnyar Hyel ku nggatə adduwar nga təng vir tə gə tərghəi kəra ga ka bara nggaɓəla ndər ni. Antə su na səntə ra an kəi hamta ala ga amsa.

¹³Mdərthlentərhyel na ana ɓəla tsəɗiyir Parsiya ku ngkatə ra ar vir sərkumari ka ntang. Aghəla nda, Mikayel, pal akwa nca mjirthlentərhyel na ol'ola ku si ka dlar ra, kamnyar tə I ku ndzi shira ahar Parsiya.

¹⁴I ku si kəi ngkərɓəla ala gə su na ata sə wutə mjir nga akwa virayeri na ata sə si. Ngəni an wulsu na ata kəra su na ata hara akəmazi.”

¹⁵Sakatə tsa ku gari ali apani, antə I ku haghəi kəri ka ndzi səri ata wul di.

¹⁶Təkəma təng mdərthlentərhyel na dludzi ka mdə ni tsəkwar mnyi, antə I baɗitə gari. I pəla alari, “Zanuwa wulsu ngəni ku tsi dzi, tə I amzhi zhar yakatə wa.”

¹⁷I aɗi suma akəma gə wa, antə apa madi tə I ata mzhi gari ka gə ri? Kamnyar kulini I aɗi ka duna kəra wa, apa I mtəmtari.

¹⁸Antə tsa jaktə kəsi ra, antə I ku wutə duna.

¹⁹Tsa pəla, “Hyel hir nga, apani ga aɗiya thlivər wala damitədzi wa. Peri ɗəffa ga, kara ndzi katsala.” Sakatə tsa gari ngəni ali, antə I wutə duna ka pəla, “Zanuwa, pəla ali su tə ga akwa bara pəlari ni, kamnyar ndərər ngə ni ku dunautə ra.”

²⁰Tə tsa pəla, “Ga asəndə su na səntə ra adzə ngə ya? Kulini tar kəi ngka kamnyar mpa ka mambələr ngkamta asar ar tsəɗi Parsiya. Aghəla tə I ku kuri ka tsa I ata mpa ka mambələr ngkamta asar ar tsəɗi Gris.

²¹Amma kwabə ya təra mwari, ndzi kəi ngkərɓəla ala gə su tə mdə rəbuta akwa Kakaɗər Jirkur. Mda aɗi na ata dlar ra wa, tar mdərthlentərhyel na ka thləmari Mikayel, na olər mjir nga Israila.”