Read bura-pabir Daniyel 11 Bible Online

Daniyel 11 - bura-pabir bible

Daniyel 11

¹Antə I na Jibrailu ka kəri I ku dlar ni Mikayel ka dunautə ni akwa məva na ntangkəma ar Dariyus na mdər Mediya.

²Antə su tə I ata pəla ala gə ni an jiri. Mdərthlentərhyel ni pəla, “Kuthlyayeri damwa makər ata sə thlatə ka hara kuthlikur akwa Parsiya. Na nfwarkur, na ata nu ɗa ata sə təramta ɗa ciju ka gəna. Sakatə tsa ku sə ndzi ka duna atar gənarni antə tsa ata sə thlentə hangkala kuthlikur ar Gris.

³Aghəla nda kuthli laga na katsala ata sə thlatə ka kuthlikur na ola, tə tsa ata hara kəlara su tə ɗəffari hira.

⁴Amma sakatə kuthlikurərni ku ncidzi ka duna antə kuthlikur ni ata huza ka ndəkəmtadzi ka bwa nfwar. Antə kuthlyayeri na aɗi maɗa'ni wa an ata hara kuthlikur ata vəyari. Amma da aɗi ata wutə dunarni wa.

⁵Kuthlir Masar ata sə ndzi ka duna amma pal akwa nca olər sojayeri arni ata sə təra ni duna, ka hara kuthlikur ata kəra bwar ola kuthlikurərni.

⁶Aghəla məvayeri laga kuthli ata sə mbwi alkawal ar pazhikur ka Siriya, tə tsa ata hamta ngkwarni aka kuthlir Siriya ka tsa kəla. Amma pazhikurari aɗi fəi wa. Mda ata sə tsi mwala ni ka salngkiɗa, ka ngkyarərni, ka buɗayeri arni na paktə mwari kəga tsa.

⁷Aghəla nda pal akwa nca yangkura mwala ni ata sə ndzi kuthli. Tsa ata sə dlər sojayeri ar kuthlir Siriya, ka ləkwa katanggar ɗa, ka mula ala ɗa.

⁸Tsa ata ngka ahar Masar ka haptayeri arɗa, ka kariyayeri ar dinar ka adzərfa natə da hamta aka haptayeri ni. Antə kuthli ni ata sə zhar mpa ka kuthlir Siriya mnyar məvayeri laga.

⁹Aghəla nda kuthlir Siriya kəga sojayeri arni ata sə dlər Masar, amma da ata sə ngka ka dwali ka hwi səvəi akwa tsəɗiyir ɗa.

¹⁰Maɗa' kuthlir Siriya ata sə ɗəmhədzi kamnyar mpa, antə da ata tsaptə sojayeri dlama dlama. Tsa ka sojayeri arni ata sə fadzi apa pərtu kara dlər dawayeri arni ba akwa katanggar ɗa.

¹¹Ɗəffa kuthli ata ɓza ka duna, antə tsa ata dlər sojayeri ar kuthlir Siriya na dlama dlama ni ka ngkəi ɗa.

¹²Ma sakatə kuthli ku fatə ɗa, tsa ata sə gaya ka duna kamnyar mji dlama dlama tə tsa kurəmta ni, amma tsa aɗi ata ləkəma ka nggyari su wa.

¹³Kamnyar kuthlir Siriya ni ata ngka avəi ka jaktə ɗəmhə sojayeri na hang ta na ntangkəma ni. Aghəla məvayeri laga antə kuthli ni ata ngka ka dlər Masar. Tsa ata si ka sojayeri arni ɗəmhəɗəmhari ka kari mpar ɗa hang.”

¹⁴Ata saka nda mji hang ata sə thlentə hangkala kuthli. Tsuwa sojayeri laga ata sə thlata akwa tsəɗiyir nga kamnyar ka da haratə su tə mdə wuta akwa wulsu ni, amma da aɗi ata səm wa.

¹⁵Antə kuthlir Siriya ata si ka sojayeri arni ka kalaktə bərni laga na ka duna akwa tsəɗi Masar ka dlutsə ni. Sojayeri ar Masar aɗi ata mzhi mpa ka da wa. Wala sojayeri arɗa na masəku ka katsala aɗi ka dunar ndər ala ɗa wa.

¹⁶Kuthlir Siriya ata hara su tə tsa hir ka da, mdər ngkatə ni aɗi wa. Tsa ata thləthlata akwa di na ɓɗak ta shang ka ngkəi ni.

¹⁷Kuthlir Siriya ata ɗəmhədzi ka si ka shanga mjirni ka bara hara pazhikur ka kuthli. Tsa ata na ngkwarni aka kuthli ka tsa kəla kamnyar ka tsa wutə lakur dlutsə kuthlikurərni. Amma su tə tsa akwa barari ni aɗi ata wutə ləkwa wa.

¹⁸Aghəla nda tsa ata mpa tsəɗiyayeri na ata mnya yimi ka nggyari hang akwa nca ɗa. Amma olər sojayeri ar tsəɗi laga ata sə nggyari ni ka hartə mnyari. Antə tsa ata nggatə vəi ɗimikurər gaya arni ni.

¹⁹Apani tsa ata sə ngka avəi akwa tsəɗiyirni ka ɗuwardzi akwa bərniyayeri na ka duna. Amma mji ata mula alari ka kuri ka tsa, antə mda aɗi ata jaktə wutə ni kəra wa.

²⁰Antə kuthli damwa na ata nu ni ata sə thlentə olər kəthlər arni ka tsa dlu tsəma kamnyar jakə gənar kuthlikurərni. Amma akwa kuta virayeri laga raka, tsa ata mta, aɗi ata bəbal wa, wala akwa mpa wa.

²¹Kuthlir Siriya na ata nu na ndaga ata ndzi mdə hilhila natə mji aɗi ata nar səliyir kuthlikur wa. Tsa ata si kula səndər mda ka tsa dlutsə kuthlikur atar zwalitə mda ka zamba.

²²Tsa ata sə kurəmta sojayeri ka kəli prist na ola ar Hyel na ku kampikə ka tsa.

²³Tsu ata vir tə tsa mbwi alkawal ar pazhikur ka tsəɗiyayeri antə tsa ata baɗitə hara shimnyakur. Antə tsa ata ndzi ka duna wala tə tsa aɗi ka mji hang wa.

²⁴Tsa ata ləkwa tsəɗi na ka gəna kula səndər mda ka tsa hara su tə wala pal akwa nca kəkayeri arni aɗi ɗar harari wa. Tsa ata ndəkəmta shanga su tə mdə fata akwa mpa aka mjirni. Tsa ata ɗəmhədzi kamnyar dlutsə bərniyayeri na ka duna akwa katangga, amma shang su nayeri ni ata kura akwa saka laga raka.

²⁵Tsa ata tsaptə sojayeri arni hang ka duna ka da ra dlər kuthli. Antə kuthli ata ləɓəla ka sojayeri arni na hang ka mwavər ta ar kuthlir Siriya ka dlu ɗa ka mpa, amma kuthli aɗi ata səm wa, kamnyar mda ata ɓəli ni.

²⁶Wala mjir nar sauri na kudzəhə ka tsa ata ɓəli ni. Antə dawayeri ata kurəmta sojayeri arni hang ka tsarɓəla ɗa.

²⁷Kuthlyayeri na suɗə ni ata ndzəndzi ka da səm susəma ata vəi duku amma kəlara pal akwa nca ɗa ka kəmanggarkur akwa ɗəffari aka nvwani. Antə da ata thlandər aka nvwa ɗa, tə da aɗi ata wutə su tə da akwa barari wa, kamnyar Hyel an ɗəmhə sakatə da ata sə kura.

²⁸Antə kuthlir Siriya ata ngka akwa tsəɗiyirni ka shanga su tə tsa fata akwa mpa. Amma ata lakur ləha tsa ata mpa addinər mjir Hyel, ka hara su apatə tsa hira kambəla ngka akwa tsəɗiyirni.

²⁹Aghəla nda akwa saka natə Hyel ku ɗəmhə tsa ata sə ra jaktə dlər Masar, amma akwa saka ngəni su ata palidzi.

³⁰Kamnyar mjir Rom ata sə si akwa sharər yimi ka ngkatə ni, antə tsa ata thlivəra. Antə tsa ata ngka avəi ka pumta ɗəffari ata kəra mjir nu Hyel. Tsa ata psi thləm ka hara ɓɗakkur aka mji na pumta addinər ɗa.

³¹Tsa ata thlentə sojayeri arni ka da ra diɓərantə mbwar vəngkər səli aka Hyel na an duna mburu, ka ngkatə hamta saɗaka ar tədək viri. Da ata vu ka mji hara sur cika na ɗimi, watau ka mji vəngkər səli aka haptayeri akwa vəi tə mburu hamta aka Hyel.

³²Ka thlandər ka mnya msəra antə tsa ata ndəkərtə hangkala mji na ku nggəlar addinər ɗa, amma mji na ku kəsi Hyel ka jirkur ata mula ala ɗa.

³³Mjir pwar tsəɗi na ɗəɗu ata sə thlipə su aka mji hang. Amma akwa saka laga antə hang akwa nca mjir thlipə ni mda ata tsi ɗa akwa mpa, wala ngkəi ɗa ka pu ɗa akwa kəi pərsəna.

³⁴Akwa sakar bwani ngəni mjir Hyel aɗi ata wutə dlara hang wa, tsuwa mji hang na shimnya ata sə ləkwa nca ɗa atar thlandəra.

³⁵Mda ata sə tsi bwadukwa mji na ɗəɗu ni, amma atar ngəni antə Hyel ata kətərɓəla mji na pwa, ka kəcimta ɗa ka da ndzi pau mwapu. Su ngəni ata ləkəma ka vədza aka tsikərari, saka natə Hyel ku ɗəmha.

³⁶Kuthlir Siriya ata sə hara su apatə tsa hira. Tsa ata gaya ka namtə kərni apa tsa olta shanga haptayeri, har ka pəla ndərayeri na ɗimi ata kəra Hyel na olta shang. Kuthlir Siriya ata ləkəma ka hara su ngəni har ka vədza aka vir tə Hyel ata pungkər ɗəffə bwarbwarkurərni ata kərari. Kamnyar jiri Hyel ata haratə su tə tsa ku thlamta.

³⁷Kuthli ni aɗi ata nu Hyelər kəkayeri arni wa, wala natə mwanki hir wa. Tsa ata nggəlar kəlara hyel ka namtə kərni olta da.

³⁸Ata vəyari, tsa ata vəngkər səli aka haptər ngkamta asar ar bərniyayeri na akwa katangga. Tsa ata hamta dinar, ka adzərfa, ka pelayeri ar dəɓa, ka cautayeri damwa na ol'ola, aka hyel natə kəkayeri arni aɗi sənda ampaniyir ɗa wa.

³⁹Tsa ata kəthlər ka mji na ana vəngkər səli aka haptu ka da ngkamta asar ata kəra bərni na akwa katangga. Tsa ata nar olkur aka mji na ana kələngkər alari, ka hamta ala ɗa olkur ata kəra dlamar mji. Tsa ata thli ala ɗa vəi ka ndzi watsəɓər ɗa.

⁴⁰Akwa tsikərari kuthli ata sə dlər kuthlir Siriya. Amma kuthlir Siriya ni ata ləɓəla ka wagənayeri ar taku, ka takwayeri, ka sharayeri ar yimi ka dlu ɗa ka mpa. Tsa ata dlər tsəɗiyayeri ka tsarəmta ɗa apa pərtu.

⁴¹Tsa ata sə ra dlər tsəɗi na ɓɗak ta shang ka kurəmta mji dlama dlama. Amma tsəɗiyayeri ar Edom, ka Mowab, ka mji na mbiləmta akwa Ammon ata sə msərəmta.

⁴²Tsa ata sə dlər tsəɗiyayeri ka jakəngkər olkur kuthlikurərni, antə Masar aɗi ata msərəmta wa.

⁴³Tsa ata ndzi mthlakər gənar dinar, ka adzərfa, ka shanga suayeri na ɓɗakɓɗaku akwa Masar. Tsa ata ngkəi Libiya ka Ithliyopiya.

⁴⁴Amma labar na ata sə thlata akwa ramta ka yala ata sə thlivərantə ni antə tsa ata sə ləɓəla ka ɗəffu ka kurəmta mji hang.

⁴⁵Tsa ata sə nci tentər kuthlikurərni akwa daɓwa yimi ka garər tsəɗi na ɓɗak ta shang. Amma wala apani tsu tsa ata mta, kula mdər dlar ni.