Read bura-pabir Daniyel 12 Bible Online

Daniyel 12 - bura-pabir bible

Daniyel 12

¹Mdərthlentərhyel na ka ləptər lilin ni pəla, “Akwa saka ndaga Mikayel, watau mdərthlentərhyel na ola, na ana ɓəla lapiyakur mjir nga ata sə wutədzi. Antə sakar bwani laga ata hara, bwani na mwavər ta shang, na aɗi ɗar hara təng tə mdə nthlə tsəɗi ni wa. Amma akwa saka na ndaga shanga mji na ka thləma ɗa akwa kakaɗər Hyel ata sə mbantədzi.

²Antə hang akwa nca mji na ku mti ata sə thlatə ka mpika, bwa duku ata nggatə msərakur mpikə na akur wa, bwadukwa ɗa ata ləkwa səli na ɗimi har ba saka madi.

³Mji ol'ola arɗa na ɗəɗu ata sə mbəlmbəla karara apa kutahyel. Tsuwa mji na ku thlipə su na kalkal aka mji ata sə mbəlmbəla apa sasəlkayeri har har ba saka madi.

⁴Amma ar nga, Daniyel, hartə kakaɗə ni ka gə dləɓta har ka vədza aka sakar datər duniya. Akwa saka ngəni mji ata sə mwari azi ka anda, kamnyar jakə səndər su.”

⁵Aghəla nda antə I wutə mdərthlentərhyel damwa suɗa athləthlata ata mnya thlyagha, pal ata mnya maghəm ngəni, ka palari ata mnya maghəm ndaga.

⁶Antə pal akwa nca ɗa yu mdərthlentərhyel na hatə ləptər lilin ka thləthlata amta thlyagha ni abbər, “Nawa antə sur ndatə nayeri ni ata sə kur ri?”

⁷Mdərthlentərhyel na ka lilin ni haptə tsiyari japu ahar hyel ka hara alkawal akwa thləma Hyel na ba saka madi. Tə I nggatə ni pəla, “Ata hara məva makər ka reta. Ma sakatə bwaniyir mjir Hyel ni ku thləthlata antə su nayeri ni ata kura.”

⁸I ku nggatə su tə tsa pəla, amma I aɗi nggaɓəla suari wa. Antə I yuwa abbər, “Apa madi tə su ngəni ata sə kur ri, zanuwa?”

⁹Antə tsa shinau abbər, “Peri hangkala ga, Daniyel, kamnyar mdə ku hartə ndərayeri ni ka dləɓta tar vir tə su ni ku kuri.

¹⁰Mji hang ata sə kəcimtadzi ka ndzi kəcəkəcari. Atar ngkərtədzə nayeri ni antə mda ata kətərɓəla ɗa ka da ndzi ɓɗaku. Amma mji na ɗimi ata ləkəma ka hara ɗimikur, antə da aɗi ata nggaɓəla su wa, tar mji ol'ola arɗa na ɗəɗu an ata səndə karapwari.

¹¹Antə baɗitə ka sakatə mda ata ngkatə hamta saɗaka ni, sakatə mdə ku vəi haptu na ɗimi ni har ka datari, ata ndzi vir dəpu pal ka aru suɗa ka əmdləkumari.

¹²Da ka kucali mji na ku nggitə ka ndzi ka jirkur har ka vədza aka tsikərari virayeri na dəpu pal, aru makər ka makkumari ka ntəfu.

¹³“Amma peri ɗəffa ga, Daniyel har ka gə mwanta aka datari, antə ga ata sə ghərəmtaghəra, ka gə ndzi akwa vəi tə mdə ku ɗəmha ala ga.”