Read bura-pabir Daniyel 3 Bible Online

Daniyel 3 - bura-pabir bible

Daniyel 3

¹Kuthli Nebukadnezzar ku vu tə mdə hənta alari dludzər mda ka dinar, saɓəlkurər ni dzarsəl əmdləkumari, baukurari dzarsəl əmdla. Tsa vu tə mdə nci ni akwa bəbal laga tə mda ana kəga Dura, kudzəhə ka bərni Babila.

²Antə kuthli thlentə ka mdə kəga alari shanga gwamnayeri, ka mjir nar sauri, ka kuthlyayeri na raka raka, ka ajiyayeri, ka mjir kəsi kwaba, ka alkaliyayeri, ka dakwaliyayeri na ol'ola, watau shanga mji na ol'ola akwa tsəɗi ni. Tsa kəga ɗa ka da si akwa vir baɗitə vəngkər səli aka dludzər mdə natə Kuthli Nebukadnezzar ku vəi ni.

³Antə shanga mji nayeri ni ku tsaptədzi ka thləthlata akəma dludzər mdə ni.

⁴Antə mdər psəmnyar kuthli ku haptə kurakari ka pəla, “Shanga mjir tsəɗiyayeri, ka durayeri, ka mnyayeri, psi giri thləm aka tsawur kuthli!

⁵Ma sakatə giri ku nggatə kuraka təmbəl, ka shwala, ka guləm, ka yakandi, ka mambila su tsatsa, ka giri zuzuri ka vəngkər səli aka dludzər mdə natə Kuthli Nebukadnezzar ku vəi ni.

⁶Kəlara mdə na aɗi zuzuri ka vəngkər səli alari wa, mda ata psu ni akwa mbwar u'u na mwavər kula shamta saka.”

⁷Antə təkəma tə shanga mji ni nggatə kuraka təmbəl, shwala, guləm, yakandi ka mambila su tsatsa, təng shanga mjir tsəɗiyayeri, ka durayeri, ka mnyayeri zuzuri ka vəngkər səli aka dludzər mdə natə Kuthli Nebukadnezzar ku vəi ni.

⁸Atar ngəni antə mjir Babila laga ku wutə sur vətə ka pəla ndər na ɗimi ata kəra mjir Yahudi aka kuthli.

⁹Da pəla aka Kuthli Nebukadnezzar, “Ka barkar nga, ka far ngə fəi!

¹⁰Ka barkar nga, ga ku psəmnya abbər ma sakatə mdə ku nggatə kuraka təmbəl, ka shwala, ka yakandi, ka mambila su tsatsa, antə ka shanga mji zuzuri ka vəngkər səli aka dludzər mdə natə mdə nam ka dinarni.

¹¹Antə kəlara mdə na aɗi zuzuri ka vəngkər səli wa, mda ata psu ni akwa mbwar u'u na mwavər ka duna.

¹²Kulini mjir Yahudi laga, na an Shadrak, ka Meshak, ka Abenego natə ga ku pungkər ɗa ata kəra lardayeri ar Babila ni ku nggəlar ta kələngkər ala ga. Da aɗi akwa vəngkər səli aka haptər ngə ni wa, wala zuzuri akəma dludzər mdə tə gə nam ka dinar ni wa.

¹³Antə ɗəffa kuthli ku mbwi, tə tsa tsawa ka mdə səntə ɗa akəmari. Antə mdə ku səntə ɗa.

¹⁴Antə kuthli ni yu ɗa, “Shadrak, ka Meshak, ka Abenego, jirjiri ya abbər giri aɗi ana vəngkər səli aka haptərna wala zuzuri aka dludzər mdə tə I nci wa ni?

¹⁵Ndaga ku kurtə ka təramta. Amma ma giri ku jaktə nggatə kuraka təmbəl, ka shwala, yakandi, ka mambila su tsatsa, ka giri zuzuri ka vəngkər səli aka dludzər mdə natə I namtə ni. Ma giri ku nggəlari, mda ata pu giri akwa mbwar u'u na mwavər kula shamta saka, kəi wutə hyel na ata sə msərantə giri akwa tsi ni.”

¹⁶Da shinau aka Kuthli Nebukadnezzar ka pəla, “Ka barkar nga, yeru aɗi ata bara ka yeru mbuli kəra yeru wa.

¹⁷Ma Hyel natə yeru ana vəngkər səli alari hir ka tsa mbuli yeru akwa u'u ka akwa tsiya ga, tsa ata mbuli yeru.

¹⁸Amma wala tsa aɗi hir wa, ka barkarni sənda abbər yeru aɗi ata vəngkər səli aka haptər ngə wa. Tsuwa yeru aɗi ata zuzuri aka dludzər mdə tə gə namtə ka dinar ka nci ni wa.”

¹⁹Antə ɗəffa Nebukadnezzar ku ɓzi ka duna adzə Shadrak, ka Meshak, ka Abenego har tə kəmari ku palidzi. Tə tsa vu ka mdə təlantə kutambwar u'u ni ka gərgərkurari hara ka bwa murfa ta na hwatu.

²⁰Antə tsa tsawa ka gurjamayeri laga akwa nca sojayeri arni ka da pərtə Shadrak, ka Meshak, ka Abenego, ka da pu ɗa akwa mbwar u'u na ata mba vəlvəl ni.

²¹Antə da ku pərtə ɗa akwa ləptər ɗa, ka hwandauwur ɗa, alkyabar ɗa, ka shanga kari na ata dza ɗa, ka pu ɗa akwa mbwar u'u ni.

²²Kamnyar tə kuthli ku hamta tsawa abbər dwali ka mdə namtə u'u na mwavərari, antə u'u ni ku ndzi mwavər kamta. Tə kyanggyara u'u ni ku tamtə mji na akwa mwantə Shadrak, ka Meshak, ka Abenego akwa mbwar u'u ni ka mbagamta ɗa.

²³Amma Shadrak, ka Meshak, ka Abenego na mbwahəmbwahari ku tətəri akwa mbwar u'u na akwa mba vəlvəl ni.

²⁴Antə Kuthli Nebukadnezzar ku ndatədzi ka duna tə tsa thlatə mwat ka yu kwakunayeri arni abbər, “Aɗi mji makər antə mburu pərtə ka pu akwa mbwar u'u ni pwa?” Da shinau alari abbər, “Apani ka barkar nga.”

²⁵Tsa jaktə yuɗa, “Ka apa madi tə I akwa wul mji nfwar akwa kadla akwa u'u nə ri? Da aɗi mbwahəmbwahari wa, tsuwa da aɗi ncantə halər dəkəidzi wa. Nggədza na nfwarkurari ni dludzi ka mdərthlentərhyel.”

²⁶Nebukadnezzar ku shahədzi kudzəhə ka nyarmbwar u'u na akwa mba vəlvəl ni, ka kəga ka kuraku abbər, “Shadrak, ka Meshak, ka Abenego, buɗayeri ar Hyel na ka Səli ta Shang, səɓəla giri!” Antə da ku səɓəla kula shamta saka.

²⁷Antə gwamnayeri, ka mjir hamta sauri, ka kuthlyayeri ka kwakunayeri ku tsaptədzi ka da wul mji ngəni makər natə u'u aɗi dəkəi ɗa wa ni. Shishir kəra ɗa aɗi takurumnyadzi wa, tsuwa wala shiwur ɗer aɗi adzə ɗa wa.

²⁸Antə kuthli pəla, “Ka mburu hu Hyelər Shadrak, ka Meshak, ka Abenego! Tsa ku thlentə mdərthlentərni na amtazi, ka mbuli buɗayeri arni na ana vəngkər səli alari ka mbərsa ka tsa. Da zhar ta kələngkər aka tsawurna ka psəmta mpika ɗa, ata vəya ka da zuzuri ka vəngkər səli aka hyel damwa, tar Hyelər ɗa.

²⁹Kamnyar ngəni, I na kuthli, akwa tsawa abbər ma kəlara mdər tsəɗi, ka dur, wala mnya, na ku mnya ɗimi ata kəra Hyelər Shadrak, ka Meshak, ka Abenego, mda ata tadərwa ni pal pal.”

³⁰Aghəla nda antə kuthli ni ku jakə olkur aka Shadrak, ka Meshak, ka Abenego akwa tsəɗi Babila.