Read bura-pabir Daniyel 4 Bible Online

Daniyel 4 - bura-pabir bible

Daniyel 4

¹Kuthli Nebukadnezzar ku thlentə labar ngəni aka shanga mji, tsəɗiyayeri ka mnyayeri na akwa duniya: Ka msərakur ka ləkəma ndzi ar giri!

²I wuta abbər kalkal kəi ngkərɓəla ala giri surndatayeri na ol'ola tə Hyel na ka Səli ta Shang ku ncanta ali.

³Halamayeri arni an ol'ol ka duna Surndatayeri arni ana thlivərantə mda. Kuthlikurərni an kula vəi data, Kuthlikurərni an ba saka madi.

⁴I na Nebukadnezzar, andzəndzi avəyarngkəya akwa ngga msərakur kamnyar shanga su akwa ləkəma ka duna.

⁵Amma vir laga aviri sakatə I apəpəi ambwa, təng suni laga wutədzi ali na ku thlivərantə ra, su tə I wutə ni ku nthlə hyali ka ndatə ra kamta.

⁶Apani antə I ku tsawa ka mdə kəga ali shanga mjir hamta sauri na ku paktə ka ɗeaghayeri ka da ngkərɓəla ali karapur suni ni.

⁷Antə shanga mji yaya, ka mjir dlər jisəku, ka mjir tsadi, ka shanga ɗeaghayeri ku si antə I ngkər ala ɗa suni ni amma da aɗi mzhi ngkərɓəla ali karapwari wa.

⁸Antə aghəl ta shang Daniyel ku səmbwa. Tsa an mdə tə mdə vəta alari thləm Belteshazza, takwara hyelər na. Haptayeri na ol'ola ku hamta alari jili duna laga zum, antə I pəla alari suni ni abbər,

⁹“Belteshazza, olər mji na ka sənda, I asənda abbər haptayeri na ol'ola ku hamta ala gə jili duna laga zum ta ar mji, antə sur ashir aɗi na ata mula ala gə wa. Antə kulini psi thləma ga aka suni tə I hara ni, kara ngkər ali karapwari.

¹⁰Nggədza su tə I wutə sakatə I akwa heni ata vəi piyirna. Tə I ha nci təng nggədza nfu laga saɓəl ola ata ɗəffa duniya.

¹¹Nfu ni ku ləkəma ka kəla ka ndzi ka duna har tə kərari ku tsəkwar hyel, tə wala mji na akwa datər duniya ata mzhi wutari.

¹²Thlaliyirni an mirakəu ɓɗaku, tsuwa yarni hang ka duna ata mzhi səmər shanga mji. Mwaɓi mtakəu ana thlir shanggurərni, ɗikayeri ana la mbwar ɗa ata tsiyayerari, antə shanga su na ka mpika ana səm ka ndla ata yarni ni.”

¹³Sakatə I apəpəi akwa heni ata vəi piyirna, antə I ku wutə mdərthlentərhyel laga natə tsa mdər səka akwa səghəi ahar hyel.

¹⁴Mdərthlentə ni haptə kurakari ka pəla aka hwada, “Kədləmta giri mwaɓiyayeri na akira nfu ni ka ɗikayeri na ata. Nthləmta giri nfu ni ka giri tadərəmta tsiyayerari. Ɗəməmta giri thlaliyirni ka giri titiləmta yarni.

¹⁵Amma ka giri zhar gwagwarni ka nggilangari akwa di, ka giri mbwamta ni ka məsəsal ar liya mənggəl ka əmza. Ka giri təra ka zhar ni akwa kusar mirakəu ka kəlangkə ləɓantə ni. Ka tsa ɓɗə kusar ata di ata kəma duku kəga mwaɓiyayeri akwa mtakəu.

¹⁶Mda ata paltə halər mda tə tsa kəgari ni ka halər mwaɓi mtakəu, antə tsa ata ndzi apani har məva murfa.”

¹⁷Mjir səka na ɓɗakkarkara na ana heni wa an si ka psəmnyar ɗya ngəni. Apani ka shanga mji na ka mpika sənda abbər Hyel na ka Duna ta Shang an ka duna ata kəra kuthlikurayeri ar mda. Tsa ana hamta kuthlikur ni aka mdə tə tsa carɓəla, wala mdə na aɗi su ma wa.

¹⁸“Ngəni an su tə I wuta akwa suniyirna, Belteshazza, ndə Kuthli Nebukadnezzar. Antə kulini pəla ali karapwari, kamnyar mda aɗi akwa nca mjir hamta ali sauri na amzhi ngkərɓəlari wa. Amma ar nga, ga ata mzhari kamnyar Hyel ku na gə dunar harari.”

¹⁹Antə hyala Daniyel ku nthlə ni, Daniyel natə mda ana kəga ni Belteshazza. Antə tsa ku dləɓ səri ar saka laga raka. Kuthli ni pəla alari, “Ga aɗiya zhar ka suni ni wala karapwari nthlə hyala gə wa.” Belteshazza shinau ka pəla, “Ka barkar nga, I bara abbər ka suni ngəni ka karapwari ni hara aka dawayeri ar nga, aɗi gə wa.”

²⁰Ga ku wutə nfu na ku kəla ka ndzi ka duna tə kərari ku tsəkwar hyel, har tə shanga mji na akwa duniya ata mzhi wutari.

²¹Thlaliyari an mirakəu ka yarni nggərəɓu na ata mzhi səmər shanga mji. Mwaɓi mtakəu ana thlir shanggurərni, ɗikayeri tsuwa ana la mbwar ɗa akwa tsiyayerari.

²²Ka barkar nga, nfu nda an ga, gurjam ka duna. Ga ku kəli ka mzhitə hyel, tə kuthlikurər nga ku ndlətə shanga duniya.

²³“Tsuwa ga ku wutə mdər sək laga na thlata amtazi akwa səghəi akwa duniya, na akwa pəla, ‘Nthləmta giri nfu ni ka giri tadərəmta ni. Amma ka giri mbilar gwagwarni ka nggilangari akwa di, mbwambwari ka məsəsal ar liya mənggəl ka əmza. Ka giri təra kazhar ni akwa kusar mirakəu ka kəlangkə ləɓantə ni. Tsa ata ɓɗə kusar ata vəi duku kəga mwaɓi mtakəu mnyar məva murfa.’ ”

²⁴“Ngəni an karapur suni ni, ka barkar nga, su tə Hyel na ka Səli ta Shang ku ɗəmhə ka tsa wutə nga.

²⁵Mda ata sə kədləmta nga akwa nca mji, antə ga ata sə ndzi kəga mwaɓi mtakəu. Ga ata sə ɓɗə kusar har məva murfa apa gyal, ka heni aɓəla ata bəbal, ka kəlangkə ləɓantə nga. Aghəla nda ga ata sə nggaɓəla abbər Hyel na ka Duna ta Shang an ka duna ata kəra kuthlikurayeri ar mda. Tsa ana hamta kuthlikur aka mdə natə tsa carɓəla.

²⁶Mdər səkə ni ku tsawa abbər ka mdə zhar gwagwa ni ka nggilangari akwa di. Karapwari an abbər ga ata sə jaktə ndzi kuthli, sakatə ga ku nggaɓəla abbər Hyel an ka kuthlikur ata kəra duniya.

²⁷Antə ka barkar nga, usa nggatə sauriyirna, zhar hara biku kara hara su na kalkal, kara ndzi ka kətadza aka mji na akwa ɗar bwani akira ga, nuhum ga aləkəma akwa msərakur.”

²⁸Shanga su nayeri ni ku wutə Kuthli Nebukadnezzar.

²⁹Aghəla nda ka thliya kumnya suɗa, sakatə tsa akwa ɗar kadla ata bəbal na ata kəra mbwarni na ola ahar Babila,

³⁰antə tsa pəla, “Wul olkur Babila! I həntə ni di kuthlikur kamnyar ka tsa ncantə olkur arna, ka dunarna, ka səliyirna.”

³¹Kwabə ndər ni akura akwa mnyari, Hyel ku ndəra akwar amtazi ka pəla, “Kuthli Nebukadnezzar, psi thləm aka su tə I ata pəlari ala ga. I ku kələmta dunar kuthlikurər nga ka zhar nga.

³²Antə mda ata kədləmta nga akwa nca mji, ka gə ndzi kəga mwaɓi mtakəu, ka ɓɗə kusar ar məva murfa apa gyal. Aghəla nda ga ata nggaɓəla abbər Hyel na ka Duna ta Shang ka duna ata kəra kuthlikurayeri ar mda, tə tsa ana hamta aka kəlara mdə natə tsa ku carɓəla.”

³³Təng tsu anda təkəma ndərayeri ni ku nghyaɓəladzi ata kəra Nebukadnezzar. Mdə ku kədləmta ni akwa nca mji, antə tsa ku ɓɗə kusar apa gyal. Kəlangku ku təri ata kərari, antə shishirni ku kəla saɓəl saɓəl apa shishir duku, ka mpəlari saɓəl saɓəl apa mpəla ɗika.

³⁴Sakatə məva murfə ni ku təramta antə I na Nebukadnezzar ni haptə nci ahar hyel, antə hangkali ku ngka adzə ra. Antə I hu Hyel na ka Duna ta Shang, ka fwal ni, ka nar səli ka olkur alari, tsa na ba saka madi. Kamnyar dunarni kula vəi data, ka kuthlikurərni ba saka madi.

³⁵Shanga mji na akwa duniya ni aɗi su laga adzə ni wa, mjirthlentərhyel na amtazi, ka dlamar mji na akwa duniya shang akirari. Mda aɗi wala duku na amzhi ngkatə ni wala yu mnyari ata kəra su tə tsa akwa harari wa.

³⁶Sakatə hangkali ku ngka adzə ra, antə Hyel ku ngka ali ka səliyirna, ka olkurərna, ka dunar kuthlikurərna. Kwakunayeri arna kəga mjir barkər arna ku paktə ra ka jaktə ni kuthlikur na ka duna ka səli ta na ntangkəma.

³⁷Antə kulini, I na Nebukadnezzar, akwa hu Hyel, Kuthlir vəi na amtazi, ka nar səli ka olkur. Tsa ana hara shanga surni kalkal ka jirkur, tsuwa tsa ka dunar kəlghəi mji na ka ɗəffər olkur.