Read bura-pabir Daniyel 5 Bible Online

Daniyel 5 - bura-pabir bible

Daniyel 5

¹Aghəla məvayeri laga akwa sakatə Belshazza an kuthli, antə tsa ku ɗəmhə susəmər kucali na ola ka kəga mji ol'olərni na ku mwantə mji dəpu pal, ka da sa yimər anap kəga tsa.

²Sakatə Belshazza ku satə yimər anap ni antə tsa tsawa abbər ka mdə səntə kapayeri ar dinar ka adzərfa natə Kuthli Nebukadnezzar na akəmata tsa, ku fwaɓəla akwa mbwar vəngkər səli na akwa Urushalima. Kuthli ni thlenta abbər ka da si kamnyar ka tsa, ka mji ol'olərni, ka mwankirni, ka mwanki tə tsa fatə ka pwi adzə ni ni, sa yimər anap ni akwa da.

³Antə da ku səntə kapayeri ar dinar tə mdə fwaɓəla akwa mbwar vəngkər səli aka Hyel na akwa Urushalima ni, antə kuthli ka mji ol'olərni, mwankirni kəga mwanki tə tsa pwi ni ku sa akwa da.

⁴Sakatə da ku sa ka ləkwa wika antə da fwal haptayeri arɗa natə mdə nam ka dinar, ka adzərfa, ka əmza, ka liya mənggəl, ka pela.

⁵Təng təkəma kuleng tsiya mdə laga wutədzi, ka rəbuta ata banggwa ar kəi kuthlikur, ata vəi tə mdə ku fəi, vəi tə parakər pitəlayeri ni akwa mbəla ka duna. Sakatə kuthli ni ka ncari ku wutə tsiya mda akwa rəbuta,

⁶antə kəmari ku palidzi ka ndzi fauwa. Tsa ku thlivər ka duna, tə dzari ku mti, antə ɓunjari ku baɗitə kədza.

⁷Antə tsa kəga ka kuraku abbər ka kwakunayeri arni sənta alari ɗeaghayeri ka mjir tsadi. Sakatə da ku si antə tsa pəla ala ɗa abbər, “Kəlara mdə na ku mzhi karatə rəbutə ni ka ngkərɓəla karapwari, I ata vu ka mdə hadza alari ləptər olkur ka mbwau gənar dinar akwa wulyari, kəi vəi ni mdə na makərkur akwa olkur akwa kuthlikur ni.”

⁸Shanga mjir nar sauri aka kuthli ku kuri səmbwa amma mda aɗi akwa nca ɗa na ku mzhi karatə rəbutə ni wala ngkərɓəla karapwari wa.

⁹Antə kuthli ni ku vərvər thlivəra ka duna, tə kəmari ku vərvər palidzi, tə mji ol'olərni ku ndəndatədzi ka duna.

¹⁰Amma sakatə kuthli mwala na mama' kuthli ni ku nggatə su na akwa hara, tsa ləkwa mbwar ɓukci ni ka pəla, “Ka far ngə fəi! Ga aɗiya thlivər wa, wala zhar ka kəma ga palidzi wa.

¹¹Akwa tsəɗi kuthlikurər nga mdə laga aɗi na ka mambələr haptayeri na ɓɗakɓɗaku. Akwa sakar Kuthli Nebukadnezzar mdə ku wutə mdə ngəni ka sənda, ka nggaɓəla su ka ɗəɗukur ka duna apa Hyel. Antə Kuthli Nebukadnezzar na akəmata ga ku vəi ni ola ata kəra shanga ɗeaghayeri ka mjir tsadi ar Babila.

¹²Tsa ka jili anggar laga zum ta ar mji, tsa ka ɗəɗukur ar ngkərɓəla suniyayeri, ka dzatə suayeri na mwavər, ka ngkərɓəla suayeri na akwa ashir. Antə kara thlentə ka Daniyel si ka tsa pəla ala gə karapur rəbutə ngəni.”

¹³Antə da səntə Daniyel akəma kuthli. Tə kuthli ni yu ni, “Ga an Daniyel na pal akwa nca mji tə Kuthli Nebukadnezzar na akəmata iya ku fata ahar Yahuda ni ya?

¹⁴I ku nggata abbər gə ka mambələr haptayeri na ɓɗakkarkara, ka tsuwa abbər gə ka sənda, ka nggaɓəla su ka ɗəɗukur.

¹⁵I haɗa kəgambwa mjirni sauri ka ɗeaghayeri ka da karatə rəbutə ni ka ngkərɓəla ali karapwari, amma da aɗi mzhi wa.

¹⁶Amma I nggata abbər ga ana mzhi nggaɓəla karapur su ka ngkərɓəla suayeri na mwavər mwavər. Antə kulini ma ga ku mzhi karatə rəbutə ni ka ngkərɓəla ali karapwari, I ata vu ka mdə hadza ala gə ləptər olkur, ka mbwau gənar dinar akwa wulya ga. Antə ga ata ndzi mdə na makərkur atar olkur akwa kuthlikurərna.”

¹⁷Antə Daniyel shinau aka kuthli abbər, “Ga ata mzhi kəsi cautayeri ar nga aka kəra ga, wala hamta ɗa aka mdə damwa. Wala apani I ata karatə rəbutə ni ala ga, ka barkar nga, ka ngkərɓəla karapwari.

¹⁸Zanuwa, Hyel na ka Səli ta Shang ku hamta dəkəl kuthlikur, ka olkur ka səli aka Nebukadnezzar, kuthli na akəmata ga.

¹⁹Hyel ku na alari olkur natə har shanga mji, ka tsəɗiyayeri, ka mnyayeri, ku thlivər ka yakata akəmari. Kamnyar tsa ku tsi mji natə tsa ku bara ka tsa tsi, ka zhar mji tə tsa ku bara zhar ɗa ka mpika. Tsa putə mji natə tsa bara putə ɗa ata olkur, ka fəi mji natə tsa ku bara fəyari.

²⁰Amma kamnyar tə tsa mdər gaya, ka kər ɓəɓalkur, mdə na kəmanggar, antə Hyel ku kəli ni kazhar dəkəl kuthlikur ni, tə mdəkurərni ku təri.

²¹Halari ku ngka apa hala mwaɓi mtakəu, antə mdə ku kədləɓəla ni akwa nca mji. Antə tsa ku ra ndzi kəga kwaramtaku ka ɓɗə kusar apa gyal ka pi aɓəla akwa kəlangkəu. Aghəla nda antə tsa nggaɓəla abbər Hyel na ka Duna ta Shang an ka duna ata kəra shanga kuthlikurayeri ar mda, tsa an ka dunar vətə mdə tə tsa carɓəla.”

²²“Bundi! Ga an ku dlu tsiyari, antə ga asəndə su nayeri ni karkar, amma ga aɗi tərghəi kəra gə wa.

²³Ga ku hara su ka ɗəffər olkur ka ɓzamtə ɗəffa MTHLAKU na amtazi. Ga ku fatə kapayeri na akwa mbwar vəngkər səli aka MTHLAKU ka sənta avəyarngkiri. Ga, kəga mji ol'olər nga, ka mwankir nga, ka mwanki tə gə pwi ni, ku sa yimər anap akwa da, ka fwal haptayeri ar nga natə mdə nam ka dinar, ka adzərfa, ka əmza, ka liya mənggəl, ka udzəm, ka pela, haptayeri na amzhi wutə su wa, wala nggatə su wa, wala səndə su wa. Amma ga aɗi nar səli aka Hyel na ka dunar zhar nga wala dlu mpika gə wa, tsa na ka duna ata kəra shanga su tə ga ana hara.

²⁴Ngəni an su na hara tə Hyel ku thlentə tsiya mda ka tsa rəbutə ndərayeri ni.”

²⁵Antə ngəni an rəbutə ni: Mdə ku jikata, mdə ku ngkərta, mdə ku ndəkəuwa.

²⁶Antə nggədza ndərayeri ni ka karapur ɗa: “MENE, natə karapwari an ‘Jikata’, Hyel ku jikatə virayeri ar kuthlikurər nga ka vədza aka datari.

²⁷TEKEL, natə karapwari an ‘Ngkərta’, Tsa ku ngkərtə kəgəɓkurər nga ata səkel ka wuta abbər gə ku hara kəkaf kamta.

²⁸PARSIN, natə karapwari an ‘Ndəkəuwa’, Tsa ku ndəkəuwa kuthlikurər nga ka hamta aka mjir Medeya ka mjir Parsiya.”

²⁹Antə Belshazza tsawa aka buɗayeri arni ka da hadzə ləptər olkur aka Daniyel, ka mbwau gənar dinar akwa wulyari, ka psəmnya aka mji abbər Daniyel ku ndzi mdə na makərkur atar olkur akwa kuthlikur.

³⁰Tsu vir nda aviri antə mdə ku tsi Belshazza na kuthlir Babila.

³¹Antə Dariyus na mdər Medeya, natə ata saka nda məvari ngkwakumari ka suɗa, ku ndzi kuthlir Babila.