Read bura-pabir Daniyel 6 Bible Online

Daniyel 6 - bura-pabir bible

Daniyel 6

¹Aghəla tə Dariyus ku ndzi kuthli antə tsa wuta abbər kalkal ka tsa ndəkəi tsəɗi ni ka bwa aru ka sərkumari, ka vəngkər ajiya ata kəra kəlara pal akwa nca ɗa.

²Tsuwa kuthli ni ku carɓəla Daniyel ka mji damwa suɗa ka da ndzi mji na ol'ola ata kəra kəthlər, ka da wul kəthlər ajiyayeri, ka wuta abbər shanga su ku mwa kalkal apatə kuthli akwa barari.

³Təng akwa saka laga raka Daniyel ncanta abbər tsa asəndə kəthlər ɓɗakta shanga mambila mji na ol'olər kəthlər ka ajiyayeri. Antə kamnyar masəkukurərni kuthli ku dzama abbər kalkal ka tsa vətə ni ata kəra shanga tsəɗi ni.

⁴Antə mambila mji na ol'olər kəthlər ka ajiyayeri ku bara ngkəi vəi shar Daniyel akwa kəthlərərni na akwa tsəɗi ni, amma su aɗi tə da wutə wa. Kamnyar Daniyel ku hara kəthlərərni ka jirkur kula shimnyakur, tsa aɗi ɓzamtə su wa.

⁵Antə mji nayeri ni pəla aka nvwa ɗa, “Mbura aɗi ata wutə sur vətə na amzhi ngkəi vəi shar Daniyel wa, tar ma mburu paktə ka su na ku tsəkwar addinərni.”

⁶Antə da paktə kəra ɗa ka mwari adzə Kuthli Dariyus, ka pəla alari, “Bundi! Ka far ngə fəi!

⁷Shanga yeru na akwa kəthlər akira ga, watau mji na ol'olər kəthlər, ajiyayeri, mjir hamta sauri, ka mambila kwakunayeri ku thlamta abbər ka barkar nga səɓəla ka tsawu na ata ndzi dwali ka shanga mji ɓəlata. Hamta tsawa abbər mda aɗiya kiɗə su akəla hyel damwa wa, wala mdə damwa akwa kuta vir makkumari wa, tar akəla barkar nga. Antə kəlara mdə na ku ɓəli tsawu ngəni ka mdə psu ni akwa kur tsəngiyayeri.

⁸Antə kulini ka barkar nga səɓəla ka tsawu ngəni, ka gə vu tsiya ga, antə tsawu ni ata ndzi ɓəɓal apa tsawayeri ar mjir Mediya ka Parsiya na ana palidzi wa.

⁹Apani antə Kuthli Dariyus ku vu tsiyari akwa kakaɗər tsawu ni.”

¹⁰Amma sakatə Daniyel nggaɓəla abbər kuthli ku vu tsiyari akwa kakaɗər tsawu ni, tsa ngka avəi ka ləkwa mbwarni na amta, na ka windauwari awul Urushalima. Tə tsa zuzuri ka hara adduwar gwaɗita aka Hyel ka makər akwa pci apatə tsa tsəli ka harari.

¹¹Antə dawayeri ar Daniyel ku paktə mnya ka si ka wutə ni akwa hara adduwa ka kiɗa akəla Hyel.

¹²Antə da ngka akəma kuthli kamnyar ka da burkatə Daniyel. Tə da pəla, “Ka barkar nga, ga aɗi vu tsiya ga akwa kakaɗər tsawa abbər kəlara mdə na ku kiɗə su akəla hyel damwa wala mdə damwa ta ga, mda ata ndzəhəuwa ni akwa kur tsəngiyayeri wa ya?” Antə kuthli shinau abbər, “I, apani. Tsuwa tsawu ni ku ndzəndzi ka duna tsu apa tsawayeri ar mjir Mediya ka Parsiya na ana palidzi wa.”

¹³Antə da pəla aka kuthli, “Mdə ngəni Daniyel ni, na pal akwa nca mji tə mdə fata ahar Yahuda ni aɗi akwa kələngkər ala gə wa, wala aka tsawur ngə wa. Kamnyar tsa tsu ana hara adduwa aka Hyel ka makər akwa pci.”

¹⁴Sakatə kuthli nggatə su ngəni antə ɗəffari ku ɓzi ka duna, antə har tə pci təri tsa ɓukci akwa dzam laku tə tsa ata mzhi msərantə Daniyel akwa su ngəni mwavər ni.

¹⁵Antə dawayeri ar Daniyel ni jaktə ngka akəma kuthli ka pəla alari, “Ka barkar dəkəl, ga sənda abbər ma mda ata nu tsawur mjir Mediya ka Parsiya mda aɗi na amzhi pali tsawu tə kuthli hamta wa.”

¹⁶Antə kuthli tsawa abbər ka buɗayeri arni kətə Daniyel ka da ndzəhəuwa ni akwa ku na ka tsəngiyayeri akwa. Tə kuthli ni pəla aka Daniyel, “Ndzi ka Hyelər nga tə ga ana vəngkər səli alari ka jirkur ni msərantə nga.”

¹⁷Antə mdə ku si ka pela laga ola ka dzəɓtə mnya ku ni kəgari. Antə kuthli ni ku tsatə seɗar thləmari ka seɗar thləma mjirni na ol'ola ata pela ni, ta mdə laga asə msərantə Daniyel.

¹⁸Antə kuthli ni ku ngka avəi ka pi kula səm susəma ka kula heni har tə viri kura. Tsa nggəlar shanga suayeri na msəra msəra tə mdə tsəli ka hara alari.

¹⁹Sakatə viri abaka kura antə kuthli ku nghyi mwari akwa kur tsəngiyayeri ni.

²⁰Sakatə tsa ku mzhitə ku ni antə tsa kəga ka kurakər ɗəffə ɓzəɓza abbər, “Daniyel, buɗar Hyel na ka mpika, Hyelər nga natə ga ana nu ni ka jirkur ni ku mzhi mbantə ngə ya?”

²¹Antə Daniyel shinau abbər, “Ka barkar nga, ka far ngə fəi!”

²²Hyel na arna ku thlentə mdərthlentərni ka tsa hartə mnya tsəngiyayeri ni, antə da aɗi dəkəi ra wa, kamnyar tə Hyel ku wuta abbər I kula biku. Tsuwa, ka barkar nga, su aɗi tə I ɓzamta ala gə wa.

²³Antə kuthli ku hara kucali hang ka duna, tə tsa tsawa aka buɗayeri arni abbər ka da kəɓəla Daniyel akwa ku ni. Antə da ku kəɓəla ni ka wuta abbər halamar dəkəidzi aɗi ata dzari wala raka wa, kamnyar tə tsa ku mbərsa ka Hyelərni.

²⁴Antə kuthli ku tsawa aka buɗayeri arni ka da ngkəgəi shanga mji na burkatə Daniyel ni. Antə mdə ku pu ɗa kəga mwankir ɗa, kəga maɗa' ɗa akwa nca tsəngiyayeri na akwa ku ni. Antə tsəngiyayeri ni ku kikyathləmnya ɗa tsu ahar hyel kwabə səla ɗa atsəkwar di, ka ɓɗəmnya ɗa purəm kəga ɗethlər ɗa.

²⁵Aghəla nda antə kuthli Dariyus ku rəbuta aka shanga mnyayeri zumzum ka tsəɗiyayeri. “I akwa thlawar giri.

²⁶I akwa hamta tsawa abbər ka shang mji na akwa tsəɗiyirna nar səli ka olkur aka Hyelər Daniyel. “Kamnyar tsa an Hyel na ka mpika na ata ləkəma ka ndzi har ba saka madi. Kuthlikurərni aɗi ata nthlə wa, tsa ata hara kuthlikur ka duna ba saka madi.

²⁷Tsa ana mbantə ka msəranta tsa ana hara surndatayeri ka sur thlivəra akwa vəi na amtazi ka akwa duniya. Tsa ku mbantə Daniyel ta mta akwa mnya tsəngiyayeri.”

²⁸Antə Daniyel ku wutə ləkəma akwa sakar kuthlikur ar Dariyus ka kuthlikur ar Sairus na mdər Parsiya.