Read bura-pabir Daniyel 7 Bible Online

Daniyel 7 - bura-pabir bible

Daniyel 7

¹Akwa məva na ntangkəma ar Kuthli Belshazza akwa Babila, antə I suni ka wutə su sakatə I apəpəi aviri akwa vəi pəpəyirna. Antə I rəbutəmta suni ni.

²Ngəni an su tə I wuta aviri nda: Shambarayeri ku thlata akwa bwayeri zumzum nfwar akwa fya ka thlentə kəra manda na ola.

³Antə mwaɓiyayeri ar mtakə na ol'ola nfwar ku səɓəla akwa manda ni, kəlara pal zum ta nvwani.

⁴Mwaɓi na ntangkəma ni apa tsəngi, amma tsa ka ɓəɓəkayeri apa duku. I tsu akwa wulari, təng I wutə mwaɓi ni haptədzi ka thləthlata ata səlayerari suɗa apa mda. Antə mdə ku na alari dzamər mda.

⁵Mwaɓi mtakə na suɗkur ni apa mwaɓəlmi na ola, tsa ndzəndzi ata ɓunjari, ka ɗethlər kərathlu makər akwa mnyari, akwa daɓwa thlirayerari. Antə mdə pəla alari, “Thlata, kara ɓɗə kum apatə ga amzha.”

⁶Aghəla ngəni antə I ku wutə mwaɓi mtakəu damwa apa tənvwa, amma tsa ka ɓəɓəkayeri nfwar ata hilari apa ɓəɓəka ɗika. Mwaɓi ngəni ka kərari pal pal nfwar. Antə mdə ku hamta alari dunar kuthlikur.

⁷Aghəla ngəni antə I ku wutə mwaɓi mtakə na nfwarkur. Tsa ka duna, tsuwa tsa mwavər ata mpa ka thlivərantə mda. Thlirayerari an liya mənggəl ol'ola, antə tsa ana ɓəgəlwa su tə tsa ngkəi kəgari, ka ntsarəmta na mbila ka səlari. Tsa zum ta mwaɓiyayeri na akəmata tsa kamnyar arni tsa ka təmbəlayeri kuma.

⁸I tsu akwa wul təmbəlayeri ni, təng təmbəl laga raka səɓəla, antə mdə ku ntsuɓəla təmbəlayeri na ntangkəma makər ni kamnyar ka tsa wutə bəbal. Təmbəl ni ka nca suɗa apa mda ka mnyari akwa gaya ka mnya ɗimi

⁹I tsu akwa wulari, təng I ku wutə mda akwa pwi dəkəlayeri ar kuthlikur. Antə Tsa na ba saka madi ku si ka ndzəndzi kamnyar hara shariya. Ləptərni shalak mwapu apa partauwa shishir kərari kəcəkəcari apa mpur puwa. Dəkəl kuthlikurərni apa kyanggyara u'u, səlayerari na nfwar apa garegare ni shang ka u'u akwa mba.

¹⁰Thlyaghar yimər u'u akwa səɓəla akəmari, Mji dəpu dəpu akwa hara kəthlər alari, ka mji dlama dlama athləthlata akəmari. Mdə ku baɗitə shariya, ka kəlar kakaɗayeri.

¹¹I tsu akwa wulari, təng I nggatə təmbəl na raka tsu akwa gaya ka mnya ɗimi. I tsu akwa wulari təng I wutə mdə tsi mwaɓi na nfwarkur ni, ka psu mshiyirni akwa u'u ka mbamta ni.

¹²Mambila mwaɓiyayeri ni mdə ku dlutsə kuthlikurər ɗa, amma mdə ku zhar ɗa ka mpika kamnyar saka laga raka.

¹³Akwa sakatə I akwa wulsu aviri ni, I wutə mdə laga na dludzər Ɓzər Mda akwa səghəi akwa dlamba amtazi ka mwari akəma Tsa Na Aɗi Təng Waci, Antə mdə ku səntə ni akəmari.

¹⁴Antə mdə ku hamta alari dunar kuthlikur, ka səli, ka olkur, natə shanga tsəɗiyayeri, ka durayeri, ka mnyayeri ata vəngkər səli alari. Kuthlikurərni ata ndzi ba saka madi, antə kuthlikurərni aɗi ata kur wa.

¹⁵Sakatə I, na Daniyel, ku wutə su nayeri ni antə I ku thlivəra, kamnyar su ni ku nthlə hyali ka ndatə ra.

¹⁶Antə I mwari adzə pal akwa nca ɗa na athləthlata anda ni ka yu ni karapur su ngəni. Antə tsa ngkərɓəla ali karapur suayeri ni.

¹⁷Tsa pəla abbər, “Mwaɓiyayeri na nfwar ni an kuthlyayeri nfwar na ata sə thlata akwa duniya.

¹⁸Amma aghəla kuthlyayeri na nfwar ni, antə mjir Hyel na ka Səli ta Shang ata sə dlutsə kuthlikur ni ka da kəsi har har ba saka madi.”

¹⁹Antə I bara kəi səndə jirkur karapur mwaɓi na nfwarkur ni, watau mwaɓi na zum ta hwada, na akwa thlivərantə mda kamta ni. Antə tsa kukwahəmta ɗa ka mpəlayerari na shang əmza, ka ɓɗəgəmnya ɗa ka thlirayerari na shang liya mənggəl, ka ntsəntsarəmta su na mbiləmta ka səlari.

²⁰Tsuwa I ku bara kəi səndə su ata kəra təmbəlayeri na kuma ata kərari ni, ka təmbəl na dukwari na səɓəla kwabə na makərayerari atəri ni. Ngəni an təmbəl na ndzi apa olta hwada ni, na ka ncari suɗa apa mda, ka na akwa gaya ka mnya ɗimi ni.

²¹I tsu akwa wulari, təng nggədza təmbəl ni akwa mpa ka mjir Hyel ni, ka nggyari ɗa.

²²Antə Hyel na ka Səli ta Shang, Hyel na ba saka madi ku si ka hara shariya na ku mbwa kir aka mjirni. Kamnyar ngəni an sakatə kalkal ka mjirni dlu kuthlikur.

²³Ngəni an su tə tsa ngkərɓəla ali, “Mwaɓi mtakə na nfwarkur ni an abbər mda ata sə hara kuthlikur na nfwarkur akwa duniya, na ata ndzi zum ta shanga kuthlikurayeri. Kuthlikur nda ata sə hadləmta duniya ni ka ntsarəmta shanga su ka səlari.

²⁴Təmbəlayeri na kum ni an abbər kuthlyayeri kuma ata sə thlatə ka hara kuthlikur ata kəra tsəɗi nda, ka damwa sə thlata aghəla ɗa. Tsa ata ndzi zum ta kuthlyayeri na kum nda, antə tsa ata nggyari kuthlyayeri na makər ni.

²⁵Tsa ata sə mnya ɗimi aka Hyel na ka Duna ta Shang, ka ghərantə mjir Hyel. Tsa ata sə kəɗar ka tsa pali tsawayeri arɗa ka virayeri na ol'ola ar vəngkər səli ka kucali aka Hyel. Antə da ata sə ndzi akwa tsiyari ar məva makər ka reta.

²⁶Antə mjir kuma na amtazi ata sə ndzəndzi ka hara kuma, antə da ata sə dlutsə dunarni ka shamta ni ba saka madi.

²⁷Antə Hyel na ka Duna ta Shang ata sə hamta kuthlikur, ka duna, ka olkur ar shanga kuthlikurayeri na akwa duniya ni aka mjirni na ɓɗakkarkara ni. Antə da ata sə hara kuthlikur ba saka madi, tə shanga kuthlyayeri ata sə kələngkər ka hara kəthlər ala ɗa.”

²⁸Azi antə suni ni ku kuri. Antə I na Daniyel, ku yakata, tə shishir dzi ku thlatə dukduku. Amma I aɗi kəlar su ngəni aka mdə wa.