Read bura-pabir Daniyel 8 Bible Online

Daniyel 8 - bura-pabir bible

Daniyel 8

¹Saka laga aɗi tə Kuthli Belshazza ku hara məva makər akwa kuthlikur. Antə akwa saka na ndaga I ku wulsu ka damwa.

²Akwa wulsu ni, I wutə kərna akwa Shushan di kuthlikur, na akwa lardər Elam. I wutə I athləthlata ata mnya Thlyagha Ulai.

³Tə I ha nci, təng I wutə gam laga ka təmbəlari saɓəl saɓəl suɗa ata mnya thlyagha ni. Təmbəl na palari saɓəl ka bilən ta nvwani.

⁴Təng I wutə gam ni akwa dlər su təbwar ramta, ka yala, ka təbwar anəm. Mwaɓi aɗi wala duku na amzhi nggyari ni wala msəra akəmari wa. Antə tsa ku hara ka da apatə ɗəffari hira, ka ndzi ola.

⁵Sakatə I tsu akwa dzama ata kəra su ngəni təng təkəma nciwa laga si akwa bwar ramta akwa tərəmta ka ɓəɓatəkur ka duna apa ka səlari tsəkwar di wa. Nciwu ni ka təmbəl laga ola akwa daɓwa ncayerari.

⁶Tsa si təbwar gam natə I wuta ata mnya thlyagha ni, ka mwari adzə ni ka ɗəffari bwarbwar ka duna.

⁷Təng I wutə tsa mwari ka mpa ka gam ni. Antə akwa kuta ɗəffə bwarbwarkur tsa dlər gam ni ka ɓələmta təmbəlayerari ni japu. Gam ni aɗi nggyari ni wa, antə nciwu ni ku ngkamta ni ata di ka ntsarəmta ni ka səlari. Mda aɗi na amzhi mbuli ni akəlari wa.

⁸Antə nciwu ni ku vərvər ndzi ɓəɓal ka duna. Amma sakatə dzari ku təli akwa mpa ni antə təmbəlari ku ɓələmtadzi. Antə akwa vəyari təmbəlayeri na ol'ola nfwar ku ptsa, kəlara pal akwa nca kuɗəmar duniya zumzum nfwar.

⁹Akwa nca təmbəlayeri na ol'ol ni, təmbəl laga raka ku ptsi ka kəla ka ndzi ka duna təbwar anəm, təbwar raghəi ka təbwar Tsəɗi na Ɓɗaku na an Israila.

¹⁰Tsa kəla ka ndzi ka duna ka mzhitə vəi na amtazi, har tə tsa ata mzhi mpa ka sojayeri ar vəi na amtazi, ka sasəlkayeri. Antə tsa pumta ɗa ata di, ka ghəighəirəmta ɗa ka səlari.

¹¹Antə nciwu ni ku kəlantə kərari har ka mzhi pəlangkər aka olər dlamar sojayeri na amtazi, ka thləthlatə ka hamta saɗaka mbamba tə mda ana hara tədək viri, ka ɓzamtə vəi vəngkər səli.

¹²Antə Hyel ku zhar tə tsa mula aka sojayeri ni har tə da ku hara biku atar zhar ta hamta saɗaka mbamba. Antə jirkur ku mti. Antə təmbəl ni ku wutə su tə tsa akwa barari.

¹³Antə I nggatə mdərthlentərhyel laga akwa yu nvwani abbər, “Tar nawa antə mda sə jaktə baɗitə hamta saɗaka ri? Nawa antə biku na ɗimi ata sə kur ri? Nawa antə mda ata sə zhar ɓzamtə mbwar vəngkər səli ka zhar bwani aka sojayeri na amtazi ri?”

¹⁴Antə tsa shinau abbər, “Tsa ata ləkəma ar ɗəɗəpayeri ka tahakayeri dəpu suɗa ka aru makər, antə mda ata sə jaktə ngka kəgari apa na hwatu.”

¹⁵Sakatə I akwa dzama ata kəra su tə I wutə ni, tə I akwa bara nggaɓəla karapwari, təng təkəma mdə laga dludzər mdə sal wutədzi ka thləthlata akəmi.

¹⁶Antə I nggatə kuraka mda akwa kəga su ata kəra Thlyagha Ulai abbər, “Jibrailu, ngkərɓəla karapur wulsu ngəni aka mdə ni.”

¹⁷Antə Jibrailu ku si ka thləthlata adzə ra, antə I ku thlivəra ka ndla ka kəmi ata di. Antə tsa pəla ali, “Ɓzər mda, kara sənda abbər suayeri tə ga akwa wulari ni an su na ata sə hara akwa kurər duniya.”

¹⁸Tsu tə Jibrailu akwa gari antə heni ku fatə ra ka kəmi tsu ata di. Amma tsa ku kəsi ra ka thlentə ra ata səli,

¹⁹Antə tsa pəla, “I ata ncanta ala gə su na ata sə hara akəmazi, akwa sakar ɗəffə bwarbwarkur ar Hyel. Kamnyar wulsu ngəni an ata kəra kurər saka natə Hyel ku thlamta.

²⁰Gam na ka təmbəlayerari suɗa tə gə wutə ni akwa ncantə kuthlikurayeri suɗa ar Mediya ka Parsiya.

²¹Nciwu ni an kuthlir tsəɗi Gris, antə təmbəl na ola akwa daɓwa ncari ni an kuthli na ntangkəma.

²²Təmbəlayeri na nfwar na ptsi akwa vəi tə təmbəl na ntangkəma ku ɓələmtadzi akwa ni an abbər tsəɗiyir Gris ata sə ndəkəudzi ka bwa nfwar, ka kuthlyayeri nfwar, amma mda aɗi akwa nca ɗa na ata wutə duna apa kuthli na ntangkəma ni wa.

²³Ma sakatə ɗimikur kuthlyayeri ni ku nghyi ka vədza aka vəyari, kuthlikurər ɗa ata kura, antə kuthli laga na mwavər, kəmanggar ka kula jiri ata sə thlata.

²⁴Tsa ata sə ndzi ka duna, amma aɗi atar dunar kərari wa. Tsa ata sə sənta asar na ɗimi, ka ləkəma akwa su tə tsa akwa harari. Tsa ata sə tsəgəi mji na ka duna ka mjir Hyel.

²⁵Atar kwasherikurərni, tsa ata ləkəma akwa lakwayeri arni na ɗimi. Tsa ata kəlantə kərari ka shamta mji hang kula səndər ɗa. Har ma tsa ata sə bara mpar kuthli na olta shang, amma Hyel ata sə tsi ni kula bara dlarər mda.

²⁶Su tə mdə pəla akwa wulsu na ata kəra hamta saɗaka na tahaku ka na ɗəɗəpa ni ata sə hara jiri. Amma ga aɗiya kəlar su ngəni aka mdə wa, kamnyar ata ɗar pi kwabə su ni ahara.”

²⁷Antə su ngəni ku tsi dzi, tə I ku hara nggawa ar virayeri laga. Aghəla nda antə I ku thlatə ka ləkəma ka kəthlərərna aka kuthli apa na hwatu. Amma su ngəni ku ndatə ra, tsuwa I aɗi səndə karapwari wa.