Read bura-pabir Daniyel 9 Bible Online

Daniyel 9 - bura-pabir bible

Daniyel 9

¹Dariyus na dur Mediya, na ɓzər Ahasuwerus ku ndzi kuthlir Babila.

²Akwa məva na ntangkəma ar kuthlikurərni, I akwa karatə kakaɗayeri ar Hyel ka dzama ata kəra məva murfəkumari natə Urushalima ata sə huzamtadzi ka ndzi apa mzhiku apatə MTHLAKU ku ncanta aka naɓiyirni Irmiya.

³Antə I hatə dasa ka pungkər pənju ata kəri, ka ngka adzə MTHLAKU ka kiɗə ni akwa adduwa ka asham.

⁴I ku hara adduwa aka MTHLAKU na Hyelərna ka jikaɓəla bikər yeru kəga mjirna shang ata kəma duku, akwa pəla, “MTHLAKU, ga an Hyel na ola, na ana ndatə mda. Ga an Hyel na ana kəsi alkawal ka ncantə kuthlikurər nga na ana palidzi wa aka mji na hir nga ka ɓəla tsawayeri ar nga.

⁵“Yeru ku hara biku, yeru ku pəra ka hara ɗimikur. Yeru ku nggəlar ta kələngkər ala ga, ka shinadzə bwahili aka tsawayeri ka surthlipər nga.

⁶Yeru aɗi nu su tə naɓiyayeri na mjir kəthlər ar nga ku pəla wa. Da ku gari ata vəya ga aka kuthlyayeri, mji ol'ola ka kəkayeri, ka aka shanga mjir tsəɗiyir yeru.

⁷“MTHLAKU, parang ga ana hara su na kalkal, amma ar yeru, yeru ana səntə sur səli ata kəra yeru. Shanga yeru na akwa Yahuda, ka na akwa Urushalima, ka shanga mjir Israila na ku titiləmtadzi akwa tsəɗiyayeri, na ciju ka na kudzəha, kamnyar tə da ku ɓəli alkawalər ɗa ala ga.

⁸MTHLAKU, yeru kəga kuthlyayeri, ka mji ol'ola, ka kəkayeri ar yeru, ku hara sur səli, ka hara biku ala ga.

⁹Amma ar nga MTHLAKU na Hyelər yeru ga ana kətadzə mda ka tifəmta aka mda, wala tə yeru ku thlentə hangkala ga.

¹⁰MTHLAKU na Hyelər yeru, yeru aɗi kələngkər ka nu tsawayeri natə naɓiyayeri na buɗayeri ar nga ku hamta ala yeru wa.

¹¹Shanga mjir Israila ku ɓəli tsawayeri ar nga, ka pəra, ka nggəlar ta kələngkər ala ga. “Yeru ku hara biku ala ga, antə yeru ku kəɓa ka bwaniyayeri ar thləmnya natə mdə pəla akwa kakaɗər tsawa ar Musa na buɗar ngə ni.

¹²Ga ku nghyaɓəla su tə gə tsaktə yeru kəga mji na ol'ola ar yeru ata kər. Ga ku ɗi Urushalima ka bwani na mwavər ta shanga bwaniyayeri na ku ɗar hara akwa duniya.

¹³Shanga bwaniyayeri natə mdə ku tsaktə yeru ata kər akwa kakaɗər tsawa ar Musa ku hara jiri. Amma wala apani yeru aɗi kələngkər aka jirkur, ka zhar hara biku ka si adzə ngə MTHLAKU na Hyelər yeru, ka kiɗə kəra gə wa.

¹⁴Antə MTHLAKU na Hyelər yeru, ga ku ɗi yeru ka bwani natə ga ku thlamta, kamnyar yeru aɗi kələngkər ala gə wa. Ar ngə parang ga ana hara su na kalkal.

¹⁵“MTHLAKU na Hyelər yeru, ga ku ncantə dunar nga atar fwaɓəla mjir nga kazhar tsəɗi Masar, dunar nga na ku tuwantə thləma ga. Amma ba kulini yeru ku hara biku, ka hara su na ɗimi.

¹⁶Akwa saka na təramta MTHLAKU, ga ku ncantə jirkurər nga aka Israila. Antə kulini usa ɗəffa ga aɗiya ɓza ata kəra bərni Urushalima wa. Tsa an gar ar nga na ɓɗaku. Kamnyar bikər kəkayeri ar yeru, ka tsuwa bikayeri na ar yeru, antə Urushalima ka mjir nga ku ndzi sur kyartəkur aka shanga mji na kalaktə yeru.

¹⁷Antə kulini, Hyelər yeru, kara nggatə adduwarna, ka kiɗərna. Kara kətadzə mbwar vəngkər səli ala gə na huzahuzari ni kamnyar səliyir thləma ga na ɓɗakkarkara, MTHLAKU.

¹⁸Psi thləma ga ala yeru MTHLAKU, Ka gə wul yeru ka jili bwani tə yeru akwa, bwani tə tsəɗiyir nga akwa. Yeru aɗi akwa kiɗa abbər kara wul ɓɗakkur yeru wa, amma kamnyar tə ga ana kətadzə mda.

¹⁹Psi thləma ga ala yeru MTHLAKU, ka gə tifəmta ala yeru. Wul yeru MTHLAKU, kara dlar yeru. Kamnyar ka shanga mji sənda abbər ga an Hyel na ka duna. Kamnyar bərni ngəni ka mji nayeri ni shang an ar nga.”

²⁰I ləkəma ka hara adduwa akwa jikaɓəla bikərna, ka na ar mjirna Israila, ka kiɗa abbər ka MTHLAKU na Hyelərna jaktə namtə mbwar vəngkər səli alari ni.

²¹Sakatə I akwa hara adduwa ni antə Jibrailu, mdərthlentərhyel na dludzi ka mdə natə I wuta akwa wulsu na ntangkəma ni ku si adzə ra. Tsa si sakatə I akwa hamta saɗaka na ar tahaku.

²²Antə tsa pəla ali “Daniyel, I si kəi ngkərɓəla ala gə naɓikur ni.

²³Təng tə gə baɗitə hara adduwa aka Hyel, tsa ku hamta ala ga amsari, kamnyar tsa hir nga. Kulini, psi thləma ga ali kara nggaɓəla karapur wulsu ni.”

²⁴Məvayeri na murfə murfə vəyari murfəkumari ni an saɓəlkur saka natə Hyel ku ɗəmha aka mjir nga ka tsəɗi na ɓɗakkarkara abbər ka shanga biku ka ɗimikur sə kura. Mda ata tifəmta ala ɗa bikər ɗa ka nci jirkur gyang akwa tsəɗi ni, kamnyar ka naɓikur ni nghyaɓəladzi ka mdə jaktə hamta mbwar vəngkər səli ni aka Hyel.

²⁵Ka gə səndə ka nggaɓəla abbər baɗitə ka sakatə mda ata hamta tsawa ar jaktə latə Urushalima ka vədza aka sakatə Hyel ata sə thlentə mdər pwara tə tsa carɓəla ata ndzi məvayeri murfə murfə vəyari murfa. Aghəla nda antə Urushalima ata hara məvayeri murfə murfə vəyari ngkwakumari ka suɗa kwabə da ajaktə bara namtə ni, ka lakwayeri, ka kur ngkamta dləra na kalaktə bərni ni, amma shang akwa sakatə mjir Hyel ata sə ɗar bwani.

²⁶Aghəla tə məva murfə murfə vəyari ngkwakumari ku kuri, antə mda ata sə tsi mdər pwara natə Hyel vəi ni sakatə tsa aɗi an mthlakər tsəɗi ni kəra wa. Antə kuthli laga ata sə thlatə natə sojayeri arni ata sə shamta bərni ni ka mbwar vəngkər səli ni. Datər mdə ngəni ata sə ndzi ka bwaniyayeri kamnyar tə mpa ata sə ləkəma har ka mwanta aka datari, apatə Hyel ku ɗəmhə hwatu.

²⁷Mdə ngəni ata sə mbwi alkawal ka mji hang ar məva murfa. Amma aghəla retar saka nda tsa ata sə ngkatə hamta saɗaka ka sur hamta. Tsuwa tsa ata vəi sur thlivəra na ɗimi ata kəra mbwar vəngkər səli. Antə su ni ata ndzi anda har ka vədza aka sakatə Hyel ata sə shamta ni apatə tsa ku ɗəmha.