Read bura-pabir Hoseya 10 Bible Online

Hoseya 10 - bura-pabir bible

Hoseya 10

¹Mjir Israila ndzi apa nfur anap na akwa ya hang. Amma kəlara sakatə da ku hara gəna hang, da ana shamta akwa la bagaɗi aka haptayeri damwa. Ma da ku wutə sur fakər ɗa hang, da ana shamta akwa dəɓatə haptayeri tə da ncigəi ni.

²Mji ngəni aɗi ka jirkur wa, antə tar ka da ɗar bwani kamnyar bikayeri tə da hara. Apani MTHLAKU ata pukthləmta bagaɗiyayeri ar hamta saɗaka kəga haptayeri arɗa ni.

³Antə aɗi ata fəi wa mji ngəni ata pəla, “Yeru aɗi ka kuthli wa kamnyar yeru aɗi ana thlivər MTHLAKU wa. Amma shang kwang man su tə kuthli ata mzhi dlar yeru akwa ri?”

⁴Da ana gari gapangapani, ka kahyel akwa hara alkawalayeri na kula jirkur. Kamnyar ngəni mda ata hara ala ɗa shariya na mwavər, apa kusar gwar na kəla akwa fakə tə mdə namtə ɓɗaku.

⁵Shanga mjir Samariya ata thlivər ka tuwa kamnyar haptu kəna tə mdə pukthləmta ahar Bethlaven ni. Pristayeri arni ka shanga mji na ana vəngkər səli alari ata tuwa ni kamnyar mda ata kəli səliyir haptu ni.

⁶Mda ata kələmta haptu ni ka mwantə ni ahar Assiriya, ka hamta ni aka kuthli apa sur jaka alari olkur. Antə mjir Israila ata ləkwa səli kamnyar da ku mbərsa ka haptu ni.

⁷Mda ata təra ka kuthlir Samariya ka ra shamta ni apatə yimi ana kətə buɗər udzəm ka təra kəgari.

⁸Mda ata huzamta bagaɗiyayeri ar vəngkər səli aka haptu tə mjir Israila ana hara ɗimikur ata ni. Antə mtəhəra kəga kusar ata kəla ka hartə kəra bagaɗiyayeri ni. Antə mji ata kiɗə kəra garayeri kəga ɗəɗəgəlayeri ka da ndlangkərdzi ata kəra ɗa ka da harəmta ɗa.

⁹MTHLAKU akwa pəla, “Mjir Israila, ai təng akwa zamanər mjir Gibeya tə giri baɗitə hara ali biku, giri aɗi zhari ləkəma kəgari ba ashina wa. Apani akwa Gibeya antə dlər ata səm mjir biku ni.

¹⁰Antə kulini I ata ɗi giri tsuwa kamnyar kər ɓəɓalkur tə giri hara ali ni. I ata vu ka sojayeri ar tsəɗiyayeri damwa pwa ata kəra giri ka mpa. I ata ɗi giri kamnyar bikər giri ku vərvər hara hang.”

¹¹“Waci mjir Israila ana kələngkər ali. Da ndzi apa mbəkəl thla na tsəli ka dəkə mthli ka kucali kamnyar an kəthlər tə tsa hir harari. Amma kulini I ata mbwatə udzəm na kəgəɓu ata wulya Israila. Antə Israila japu ka Yahuda ata ndəkər garma ka kukula.

¹²I pəla, ‘Ka giri kukula vəi bilən aka kəra giri, ka giri thləka hwulfər ɓɗakkur, antə giri ata wutə barkayeri kamnyar I ata hir giri ba saka madi. Kamnyar kalkal ka giri ngka adzə ra, I na MTHLAKU kulini, antə I ata pungkər ala giri barkayeri hang apa yimərhyel.’

¹³Amma ata vəya ngəni, giri ku thləka ɗimikur antə giri ku thləi ɗimikur. Giri ku wutə watsəɓər thlandərayeri tə giri hara.” “Kamnyar tə giri ku mbərsa ka wagən takwayeri ka dlamar sojayeri tə giri kəgari,

¹⁴antə mpa ata si ata kəra mjir giri. Antə mda ata huzamta katanggayeri apatə Kuthli Shalman ku ɓdləmta bərni ar Bethlarbel akwa mpa. Wala mwanki kəga maɗa' ɗa vir nda mdə ku kurəmta ɗa.

¹⁵Antə mjir Bethlel, an su na ata wutə giri vir nda, kamnyar ɗimikurər giri ku təra vəyari. Vir nda tsu ɗəɗəpa antə mda ata tsi kuthlir Israila akwa mpa ni.”