Read bura-pabir Hoseya 11 Bible Online

Hoseya 11 - bura-pabir bible

Hoseya 11

¹MTHLAKU akwa pəla, “Sakatə Israila ɓzəngkyar, I hir ni, antə I ku kəgaɓəla ni akwa Masar apa ɓzərna.

²Amma kəlara sakatə I akwa kəga ni, an sakatə tsa ana təra kazhar ra. Mjirna aɗi zhar hamta saɗaka aka haptu Baal wa, wala zhar mba sur shiwur na msəra aka haptayeri wa.

³I an kəsi tsiya mjir Israila, ka thlipta ala ɗa mwa. Amma da aɗi kələngkər abbər I an mbantə ɗa wa.

⁴I ku shahə ɗa adzə ra ka fəfaha ɗa ka hirkur, I ku famta bwaniyayeri na ata kəra ɗa, ka nggyarghəidzi ka hamnya ala ɗa susəma.”

⁵“Amma təng tə da ku nggəlar ngka adzə ra, da ata ngka ahar Masar, ka hara kəthlər mafakur aka mjir Assiriya.

⁶Mji ata lətə kəra bərniyayeri arɗa ka mpa, ka ɓəgələmta nyarfayeri arɗa. Da ata ləvəi ka kurəmta ɗa akwa ɗimikur tə da akwa ɗəmhari.

⁷Mjirna ku pəla da ata nggəlar ra. Da ana pəla I an Olta Shang, amma da aɗi ana ni olkur jiri wa.”

⁸“Apa madi tə I ata mzhi zhar ngə ri, Israila? Apa madi tə I ata mzhi zhar nga aka dawar ngə ri? I aɗi ata hir shamta nga apatə I ku shamta Adma wa, wala na gə bwani apatə I hara aka Zeboyim wa. Ɗəffi ahira ali kəi hara wa, kamnyar ga akwa hara kətadzə ra ka duna.

⁹I aɗi ata ɗi nga akwa sakatə ɗəffi ku ɓzi ka duna wa, kamnyar I aɗi hir shamta Israila ka damwa wa. Kamnyar I an Hyel, I aɗi apa mdə wa. I an Ɓɗakkarkara na akwa ndzi akwa nca giri, antə I aɗi ata si adzə nga ka ɗəffə ɓzəɓzə wa.”

¹⁰“Vir laga mjirna ata sə nu ra. I ata sə ndər ka kuraku apa tsəngi ka thlivərantə dawayeri arɗa, antə mjirna ata səɓəla təbwar ramta ka huva, ka ngka adzə ra.

¹¹Da ata səɓəla ka huva akwa Masar apa bəri ɗikayeri, tə mji bwaduku ata thlata ahar Assiriya ka si ka hwi apa bukəlayeri. Antə I ata jaktə ngka ka da akwa kəyayeri arɗa. I na MTHLAKU an pəla.”

¹²MTHLAKU akwa pəla, “Mjir Israila ku kalaktə ra ka thlandərayeri, da akwa pwaktə ra. Amma mjir Yahuda tsu akwa nu ra, da akwa kələngkər ali akwa shanga su.”