Read bura-pabir Hoseya 12 Bible Online

Hoseya 12 - bura-pabir bible

Hoseya 12

¹Susəmər mjir Israila an shambar, antə da ana ɓukci akwa ngka shambar. Thlandər ka mpa akwa jakjaka akwa kəlara bwa. Da ana paktə kər ka mjir Assiriya, ka pəli fəli mal zaitun kəga mjir Masar.

²Kulini tsuwa MTHLAKU akwa pəla aka mjir Yahuda abbər da ka biku. Tsa ata ɗi mjir Israila kamnyar suayeri tə da hara. Tsa ata ɗi ɗa kalkal ka su tə da hara.

³Kəkar ɗa Yakub ku ɓuji ka ɓzərma'ni Isuwa akwa kuta mama' ɗa. Sakatə Yakub ku kəla tsa ku hara gawa ka Hyel.

⁴Tsa ku mpa ka mdərthlentərhyel ka səma. Tsa tuwa ka kiɗa abbər ka mdə ni vədza alari barka. Antə ahar Bethlel Yakub ku kəɓa ka Hyel, antə Hyel ku gari alari.

⁵Tsa an MTHLAKU Hyel na ka Duna, MTHLAKU an thləmari

⁶Antə kulini giri na kəkar Yakub, ka giri ngka adzə ni. Ka giri mbərsa ka Hyelər giri, ka giri hirdzi ka hara su na kalkal aka nvwa giri.

⁷MTHLAKU akwa pəla, “Mjir Israila aɗi ka jiri wa. Da hir fəi mjir masər ɗa ka sur ngkərtə su na aɗi kalkal wa.

⁸Da ana gaya ka pəla, ‘Yeru ka gəna, tsuwa yeru wutə gəna ngəni ka dunar ɗəvər yeru. Antə mdər mzhi pəla abbər yeru wutə gənar yeru akwa dlərpəkur aɗi wa.’

⁹I an MTHLAKU na Hyelər giri na fwaɓəla giri akwa mafakur ahar Masar. I ata hara ka giri jaktə ndzi akwa tentayeri apatə giri ana tsaptədzər kucali ar giri akwa sakayeri na təramta.”

¹⁰I ku gari aka naɓiyayeri arna abbər ka da tsaktə mjirna ka suayeri tə I ncanta ala ɗa kəga suayeri tə I pəla akwa karapu.

¹¹Ma mji aɗi na akwa hara ɗimikur akwa Gileyad, mji nda ata mta. Tsuwa ma mji akwa hamta saɗaka ka thlayeri na ol'ola, mda ata sə huzamta bagaɗiyayeri ar hamta saɗaka ni, antə da ata ndzi apa pela tsaptsaɓa ata mnya faku.

¹²Yakub na Kəkar mburu ku hwi ləhar Aram, vəi tə tar tə tsa kəthlər ka ɓəla təma kambəla mdə na alari mwala ni.

¹³MTHLAKU ku thlentə naɓi ka tsa msərantə mjir Israila akwa mafakur akwa Masar, ka tsa wulwul kəra ɗa.

¹⁴Amma mjir Israila ku ɓzamtə ɗəffa MTHLAKU ka duna, antə MTHLAKU ata vu ka da ɗar bwani kamnyar ɗimikur tə da hara ni. Tsa ata ɗi ɗa kamnyar nggəl tə da hara alari.