Read bura-pabir Hoseya 13 Bible Online

Hoseya 13 - bura-pabir bible

Hoseya 13

¹Waci ma sakatə nyarmbwar Ifrayim ku gari, mambila nyarmbwayeri ar Israila ana yakata. Kamnyar waci kəlara su tə Ifrayim ku pəla ku ndzi kalkal, amma sakatə da hara biku atar vəngkər səli aka Baal, antə da ku mtəgəi.

²Da ku ləkəma ka hara biku atar nam haptayeri ar adzərfa ka vəngkər səli. Mdə na masəkur nam su ka tsi an namtə ɗa shang ka tsiyari. Amma da ata pəla, “Ka giri hamta ala ɗa saɗaka, har ma ka da tsəkwar haptu kənayeri ni ka mnya ɗa!”

³Apani mji ngəni ata sha ata kəra duniya apatə ɗuza ana sha ɗəɗəpa, apa kəlangkə na ana ɓumta tsu ata balti. Da ata ndzi apa ɓaɓiya natə shambar ana fimta akwa vəi dəka, apa ɗer na akwa ləɓəla akwa kəra mbwa.

⁴MTHLAKU akwa pəla, “I an MTHLAKU na Hyelər nga, na fwaɓəla giri kazhar mafakur akwa Masar. Giri aɗi ka Hyel damwa wa, tar I duku, tsuwa mdər mbantə damwa aɗi wa, tar I shira.

⁵I an wulwul giri akwa mtakər hamada na kula yimi.

⁶Amma sakatə giri ku ləkwa tsəɗi na ɓɗaku, antə giri ku səma ka ndli. Amma sakatə giri ku ndli, antə giri ku ləkwa waha har ka fwari ata kəri.

⁷Apani I ata pwa ata kəra giri ka mpa apa su tə tsəngi ana hara, wala ɗuwardzi ata mnya laku ka thla giri apa su tə tənvwa ana hara.”

⁸“I ata pwa ata kəra giri ka mpa apa mwala tənvwa tə mdə fatə maɗa'ni, kəi ntəntamta kuta giri. I ata ɓɗəmnya giri tsu ata vəyari apatə tsəngi ana hara, kəi thləthləhumta giri.”

⁹Mjir Israila, mda ata kurəmta giri, kamnyar giri ku nggəlar ra, I na ana dlar giri.

¹⁰Giri ku kiɗa abbər kəi na giri kuthli ka mji ol'ola na ata pwar giri. Da ama kulini ri? Kəga giri ɗa ka da mbantə giri, ma da amzha.

¹¹Kamnyar ɗəffi na ɓza antə I ku na ala giri kuthli, tsuwa kamnyar ɗəffi na ɓza ka duna antə I ku kələmta ni.

¹²Mdə ku rəbwamta ɗimikur ka bikayeri tə mjir Israila hara, ka ɗuwamta akwa mbwar ɗuwar su.

¹³Mjir Israila aɗi ɗəɗu wa. Da ndzi apa ɓzəngkyar akwa kuta natə sakar yarni ku hara amma tsa nggəlar ta səɓəla.

¹⁴I aɗi ata mbuli ɗa akwa tsiya mtə wa, wala ngkatə ɗa ta ləkwa kul wa. Har ma I an kəga ɗa ka si abbər, “Mtə ragai, shilkayeri ar nga ama ri? Kul ragai, dunar shamta su ar nga ama ri? I aɗi ata jaktə kətadzə mji ngəni kəra wa.

¹⁵Wala tə Israila ku ya hang ka titilidzi akwa nca maɗama'ni apa kusar, I ata vu ka shambar na bwarbwar thlata akwa mtakəu abwar raghəi. Antə tsa ata si ka tsa shuwumta kucirkilayeri kəga jiɓayeri arɗa. Tsa ata fatə shanga su na ka ampani ka təra kəgari.

¹⁶Ata ndzi dwali ali kəi ɗi mjir Samariya kamnyar biku tə da hara, kamnyar da ku hara kər ɓəɓalkur ali. Apani mda ata kurəmta ɗa akwa mpa, ka pukthləmta kəra maɗa' ɗa ka thləthləhumta kuta mwankir ɗa na ka hur.”