Read bura-pabir Hoseya 2 Bible Online

Hoseya 2 - bura-pabir bible

Hoseya 2

¹Apani ka gə kəga maɗama' nga na shili abbər, “Mjirna”, ka pəla aka maɗama' nga na mwanki abbər, “Mjir Kətadza.”

²Ka giri kiɗə kəra mama' giri, wala tə tsa aɗi mwalangkəya kəra wa, tsuwa I aɗi salngkiɗa kəra wa. Kiɗə gir kərari ka tsa zhar wul su apa karwa ni, ka tsa ndəkəmtadzi kəga mjir ngkyaɓ uwari ni.

³Ma tsa aɗi zhar wa, I ata ntsui ni dura apa vir tə mdə ya ni. I ata vu ka tsa mtə ka thləli, ka tsa ndzi mwala ciri apa mtakər hamada na kula yimi.

⁴Tsuwa I aɗi ata hir maɗa'ni wa, kamnyar tsa kəl hurər ɗa akwa karwakur, antə da aɗi maɗa'na wa.

⁵Kamnyar mama' ɗa ku hara sur səli, tsa hara karwakur. Kamnyar tsa ana pəla, “I ata mwari adzə bangayeri arna na ana na ali susəma ka yimi, bangayeri na ana na ali zhaɓər ulu, ka lilin, ka mal ka sur sa.”

⁶Apani I ata tsangkər alari kadakar mtəhəra, kəi hənəngkər alari katangga, kəi ngkata alari lakur səɓəla.

⁷Tsa ata nu bangayeri arni ka hwi amma tsa aɗi ata kəli ɗa wa. Tsa ata pakə ɗa amma tsa aɗi ata wutə ɗa wa. Antə tsa ata pəla, “I ata ngka adzə salngkəya na ntangkəma. Kamnyar kuji sakatə yeru ka tsa ta su tə I akwa kulini ni.”

⁸Tsa aɗi ata nggaɓəla abbər, I andər na alari mthli, ka yimər anap, ka mal zaitun ni wa. Wala dinar ka adzərfa natə tsa ana kəthlər kəgari akwa vəngkər səli aka Baal nə ma, I an na alari.

⁹Apani akwa sakar nthlə mthli I ata dlutsə mthli ka yimər anap, kəi fəi zhaɓər ulu ka lilin natə I na alari kamnyar ɗuwar durakurərni ni.

¹⁰I ata ntsui ni dura akəma bangayeri arni, tsuwa mda aɗi na ata mzhi mbuli ni akwa tsi wa.

¹¹I ata thləthlatə ka shanga virayeri ar kucali arni, kucali tə tsa ana hara ata məva ata məva, ka na ata thliya ata thliya, ka na ar Vir Ghərəmtaghəra. Tsuwa I ata ngkata alari hara shanga tsaptədzayeri ar addin.

¹²I ata ɓzamtə shanga fakayeri ar anap ka kamnda, natə tsa pəla bangayeri arni an ntəmta ni watsəɓər hamta kərni ala ɗa ni. I ata namtə fakayeri arni ka da ndzi dlədləku, ka mwaɓi mtakəu ɓɗəmnya shanga yar nfwayeri na akwa.

¹³I ata ɗi ni kamnyar shanga virayeri tə tsa fwari ata kəri ka ra hamta saɗaka mbamba aka haptu Baal, sakatə tsa dəɓatə kərni ka sur thləm kəga bwadukwa liyar dəɓayeri, ka nutə bangayeri arni ni. I na MTHLAKU an pəla.

¹⁴Apani I ata ndəkərtə hangkalari kəi mwantə ni akwa mtakəu. Antə anda I ata gari alari ka hangkal kəi jaktə səm ɗəffari.

¹⁵Antə I ata jaktə hamta alari fakər anap arni, kəi namtə Mular ar Bwani ni ka tsa ndzi mular na ka barka. Tsa ata sə shinau ali apatə tsa ana hara akwa sakar ɓzərngkwakurərni, sakatə tsa haɗa səɓəla akwa tsəɗi Masar.

¹⁶Antə ma vir nda ku si tsa ata jaktə kəga ra abbər, “Salngkəya.” Tsa aɗi ata jaktə kəga ra abbər, “Mdərkəi na”, wa.

¹⁷Kamnyar I ata tsi thləma haptu Baal ni akwa mnyari, antə tsa aɗi ata jaktə kamnya thləmari wa.

¹⁸Ata saka ndaga I ata mbwi alkawal ka shanga mwaɓiyayeri ar mtakəu kəga ɗikayeri, ka shanga su na ana mwa ka yimər kutari ata di, antə da aɗi ata dəkəi mjirna wa. Tsuwa I ata famta shanga kari mpa kazhar tsəɗi ni, shanga katsakarayeri kəga lali, antə mjirna ata sə pəpəi ka thlatə kula thlivəra.

¹⁹Israila, I ata mbwangkər ala gə ngyika, antə ga ata ndzi mwalangkəya ba saka madi. I ata ndzi ka jirkur kəi hara su na kalkal ala ga, I ata hir nga kəi ndzi ala gə ka hangkal.

²⁰I ata mbwangkər ala gə ngyikar jirkur antə ga ata sənda abbər I an MTHLAKU.

²¹Antə vir nda I ata tsawa aka dlambayeri, antə da ata hamta yimi aka duniya.

²²I ata vu ka di ndzi ka ləsu, na ata mzhi ptsantə mthli, ka mbantə nfur anap ka zaitun, antə shanga ɗa ata pəla abbər Yezireyel.

²³I ata nci mjirna akwa tsəɗi ni, kəi hir mji natə mda aɗi hir ɗa wa. I ata pəla aka “Aɗi mjirna wa” abbər, “Giri an mjirna”, antə da ata pəla, “Ga an Hyelər yeru.”