Read bura-pabir Hoseya 4 Bible Online

Hoseya 4 - bura-pabir bible

Hoseya 4

¹MTHLAKU ku pəla aka mjir Israila abbər tsa ku wutə ɗa ka biku. Psi gir thləma giri mjir Israila aka su tə tsa akwa pəlari ni, “Mda aɗi na ka jirkur wala hirkur aka Hyel akwa tsəɗi ni wa, tsuwa mji aɗi ana nar səli aka Hyel wa.

²Mji akwa kahyel, ka thlandər, ka tsi mda, ka həla, ka ləka. Mji akwa mpa akwa kəlara bwa, antə mda akwa tsi mda ata kər ata kər.

³Apani di ni ata ula, antə shanga su na ka mpika ata mta. Shanga mwaɓiyayeri ka ɗikayeri ata mta, wala kəlfa ata mta.”

⁴MTHLAKU ku pəla, “Mda aɗiya vəngkər biku aka mji damwa wa, wala mpa ala ɗa wa. Kamnyar giri na pristayeri an ka biku ni.

⁵Apani ba təpci giri ata tsamta səla giri tsu apatə giri kəga naɓiyayeri ana tsamta səla giri aviri. Tsuwa I ata shamta Israila na mama' giri.

⁶Mjirna ku kurəmtadzi kamnyar tur sənda. Kamnyar tə giri na pristayeri ku nggəlar səndə ra, ka nggəlar surthlipərna, antə apani I ku nggəlar giri. I aɗi ata kətə səliyir maɗa' giri abbər da pristayeri arna wa.

⁷“Kəlara sakatə giri na pristayeri akwa jakjaka, giri akwa jakjakə hara biku ali. Antə kulini I ata kəli darajar giri ka giri ləkwa sur səli.

⁸Giri akwa hara gəna atar bikayeri tə mjirna ana hara, antə apani giri akwa bara ka da ləkəma ka hara biku.

⁹Antə I ata ɗi giri tsu apatə I ana ɗi mambila mji. I ata ɗi giri kamnyar ɗimikur tə giri hara, antə giri ata ɗar bwani kamnyar surharar giri.

¹⁰Giri ata səm susəma amma giri aɗi ata ndlə wa. Giri ata hara karwakur atar vəngkər səli aka haptər ya, amma wala apani giri aɗi wutə maɗangkyar wa, kamnyar giri ku zhar ra ka nu haptayeri.”

¹¹MTHLAKU akwa pəla, “Yimər anap na fəifəyari ka na bilənari ana kələmta hangkala mjirna.

¹²Da ana yu su aka udzəm. Da ana wuta apa zwal ata mzhi ngkərɓəla ala ɗa su na ata hara akəmazi. Kamnyar mwaɓər hara karwakur ku ndəkərəmta ɗa kazhar ra, ka vu ɗa akwa nu haptayeri.

¹³Da ana thla haptu ata kəra garayeri. Da ana mba sur shiwur na msəra akira nfur ok, ka shanga nfwayeri na ol'ola ata kəra ɗəɗəgəlayeri, ka nfwayeri na ka shanggurər ɗa msəra. “An su na hara tə maɗa' giri na maɗangkwi ana hara karwakur, ka tə mwankir maɗashilər giri ana ləkə ni.

¹⁴Wala apani I aɗi ata ɗi ɗa kamnyar suayeri ngəni wa, kamnyar wala giri na shili ma giri akwa ləka. Giri ka kəra giri ana bara karwayeri na akwa mashiɗayeri, ka paktə kər ka da akwa thla haptu ni. Antə apani kəgaɓkur giri ni ata shamta giri.

¹⁵“Giri na mjir Israila ku ndzi kula jirkur ali, amma I akwa kiɗa abbər mjir Yahuda aɗiya ndzi apa giri wa. Zhar giri mwari akwa vəngkər səli ahar Gilgal ka Bethlaven ni, ka giri zhar hara alkawal akwa thləma MTHLAKU na ka mpika.

¹⁶Mjir Israila, kəra giri ɓəɓal apa mbəkəl thla na mwavər. Antə I aɗi ata na giri susəma apatə mda ana mwantə təma akwa bəbalər kusar na bau ni wa.

¹⁷Mjir Israila akwa nu haptayeri ka duna. Antə psi lakur ɗa!

¹⁸Aghəla tə da ku kuri sa yimər anap, da ana ləkwa bara karwayeri. Da hir sur səli təramta sur daraja.

¹⁹Da ku ndzi kəkafu apa ka shambar ata fatə ɗa. Da ata sə ləkwa sur səli kamnyar hamta saɗakayeri aka haptu.”