Read bura-pabir Hoseya 5 Bible Online

Hoseya 5 - bura-pabir bible

Hoseya 5

¹“Psi gir thləm, giri na pristayeri! Shahə gir hangkala giri, giri na mjir Israila! Psi gir thləma giri, giri na akwa nyarmbwar kuthlikur! Kamnyar shariya ngəni an ata kəra giri. Kamnyar giri ku ndzi dərku aka Mizpa ka ata Gar Tabor.

²Tsuwa giri ku la ku na zurang ahar Shittim. Antə I ata ɗi giri shang kamnyar su ndaga.

³Ai I asəndə ngə cau, Israila! Mda ngkər nga ali wa. Ga ku zhar ra apatə mwala karwa na ana təra kazhar salərni, antə ga ku ndzi dlimbur ali.

⁴“Ɗimikur tə giri hara akwa ngkata ala giri ngka adzə Hyelər giri. Kamnyar hangkala giri ku nutə haptu ka duna, antə giri asəndə MTHLAKU wa.

⁵“Hirkər tə mjir Israila kəgari ni ku ncanta ata bəbal abbər da mjir biku. Biku tə mjir Israila hara ni ata vu ka da tsagamta səla ɗa ka ndla! Antə mjir Yahuda ata ndla ata kəma duku kəga da.

⁶Da ana fatə təmayeri ka kwiyayeri ka thlayeri ka da ra hamta saɗaka aka MTHLAKU kəgari. Amma da aɗi ata wutə ni wa, kamnyar tsa ku kurtə təra kazhar ɗa.

⁷Da ndzi akwa thlandər aka MTHLAKU, kamnyar da akwa ya maɗangkyar ka mji da damwa aɓəla. Antə akwa sakar vəngkər səli ar thliya bilən mda ata kurəmta ɗa ka higəlantə fakayeri arɗa.”

⁸“Mbur təmbəl ar mpa akwa Gibeya, kara mbur akwa Rama! Ka gə tsa ləlu akwa Bethlaven! Giri na mjir Benjamin, ka giri pwa akəma akwa mpa!

⁹Jirkur antə I ata pəla ala giri, shanga giri na mjir Israila, abbər vir laga I na MTHLAKU ata sə ɗi giri. Antə giri ata sə ndzi su hilhila!”

¹⁰MTHLAKU akwa pəla, “Ɗəffi ku ɓzi adzə mjir Yahuda kamnyar da ku ndzi apa mjir həl tərar kəla vəi. Antə I ata pungkər ala ɗa bwani apatə pərtu ana pungkərdzi aka su.

¹¹Mjir Israila akwa ɗar bwani, kamnyar shariya ku ngkəi ɗa, kamnyar da pəla tar ma da nu haptu.

¹²I ata hilantə Israila apa su tə ləma ana hara aka kakaɗu, kəi tsi duna mjir Yahuda apa su tə kulamnya ana hara.

¹³“Sakatə Israila ku wuta abbər tsa nggawa, tə Yahuda wuta abbər tsa ka mbəlkəu, antə Israila ku bara dlara akəla kuthli Assiriya, natə tsa an kuthli na ola. Amma kuthli ni aɗi mzhi kuri alari shilkə ni wa, wala kuri mbəlka Yahuda ni wa

¹⁴I ata pwa ata kəra mjir Israila ka Yahuda ka mpa apatə tsəngi ata pwa ata kəra mwaɓi ka ngkəi. I surna an ata kukwahəmta ɗa raka raka, kəi təra kazhar ɗa. I ata fatə ɗa shang kəi təra ka da, antə mdər mzhi mbuli ɗa aɗi wa.

¹⁵“Aghəla nda I ata ngka akwa vəi vəngkər səli ali, tar ma da ku nggaɓəla vəi shar ɗa ka ləkwa bara ra. Kamnyar ma da ku ɗar bwani dwali da ata bara ra.”