Read bura-pabir Hoseya 6 Bible Online

Hoseya 6 - bura-pabir bible

Hoseya 6

¹Mji Israila akwa pəla, “Ndzi ka mburu ngka adzə MTHLAKU! Tsa ku dəkəi mburu, amma tsa an ata mbwi ala mburu mbəlka mburu ka kuri ala mburu mbəlkə ni.

²Akwa kuta vir suɗa wala makər tsa ata thlentə mburu ka jaktə na mburu duna, har ka mburu ndzi ata kəma duku ka tsa.

³Ata hara ɓɗaku ka mburu səndə MTHLAKU! Mbura hangkər ka mburu səndə ni! Antə jiri apatə kula nuhum viri ana kura, ka apatə yimərhyel ana ləɓantə di, antə tsa ata nggatə tuwar mburu.”

⁴Amma MTHLAKU akwa pəla, “Mjir Israila ka Yahuda, man tə kəi hara ka giri ri? Hirkur ar giri ali ana kur taktar apatə ɗuza ana sha ɗəɗəpa, apatə kəlangkəu ana kura ata balti.

⁵An su na hara tə I ku thlentə naɓiyayeri arna ka da nthləmta hyala giri ka labar ar shariya, labar na ata thlivərantə giri abbər mda ata kurəmta giri. I ata hara ala giri shariya na ata ncantə surharar giri ata bəbal.

⁶Kətadza antə I akwa barari, aɗi saɗaka wa. I bara ka giri səndə ra, aɗi ka giri hamta ali saɗaka mbamba wa.”

⁷Amma giri ku ndzi tsu apa Adam, atar ndzi kula jirkur ka atar ɓəli alkawal tə mburu mbwi kəga giri.

⁸Gileyad an bərniyir mji na ɗimi ka mjir tsi mji.

⁹Pristayeri ku ndzi apa mjir thla laku na ɗuwardzi akwa səka mdə laga. Wala ata lakur ləhar Shekem pristayeri ni ana tsaptədzi ka tsi mda. Da ana hara shanga suayeri na ɗimi ɗimi!

¹⁰Jiri, I ku wutə su ɗimi akwa Israila. Mjirna ku hilantə kərɗa akwa nu haptayeri.

¹¹“Giri na mjir Yahuda, wala giri ma sakatə I ata ɗi giri akwa si. Tsuwa saka ata si tə I ata jaktə namtə mjirna ka da ndzi ka darajar ɗa apa na waci.”