Read bura-pabir Hoseya 7 Bible Online

Hoseya 7 - bura-pabir bible

Hoseya 7

¹“Kəlara sakatə I ata bara mbantə mjir Israila, I ana wutə bwar ɗimikura ɗa. Samariya ku shin ka vəi tə mjir thlandər, ka həlayeri, ka vəi tə maɗa' shambar na ana dlutsə su akəla mji ka dwali ata lakwayeri ana ndzi akwa.

²Da aɗi ana dzama abbər I ata ɗangtə shanga ɗimikur arɗa wa. Amma surharar ɗa na ɗimi ɗimi an kalaktə ɗa, antə I akwa wul ɗa shang.”

³Hyel akwa pəla, “Mji ana namtə ɗəffa kuthlir ɗa kəga kwakunayeri arni ka thlandərayeri ka suayeri na aɗi kalkal wa.

⁴Shanga ɗa an mjir ləka natə parang dza ɗa akwa thlatə kamnyar ngguka. Da ndzi apa mbwar ɓwa buradi na ana təl gərgər təng sakatə mdər ɓwa buradi ni akwa hər mpur buradi.

⁵Akwa vir kucali aka kuthli da ana vu ka kuthli kəga kwakunayeri arni sa yimər anap ka wika, har ka tsa paktə kər ka mjir kyartəkur ka ndzi sur kumshi aka mji.

⁶Kamnyar apatə lindi ana təla, antə ɗəffa ɗa ana təla kamnyar ɗimikur. Ɗəffa ɗa ana pi akwa mba ɗa apa u'u na pi akwa ɗuza, natə ma viri kuri tsa ana dlu u'u.”

⁷“Shanga ɗa ka ɗəffu na mwavər apa u'u, antə da ana tsəgəi kuthlyayeri arɗa. Apani da ku tsəgəi shanga kuthlyayeri arɗa pal pal, mda aɗi akwa nca ɗa na bara dlara akəli wa.”

⁸MTHLAKU akwa pəla, “Mjir Israila akwa gwardzi ka durayeri na kalaktə ɗa, ka ndzi apa kwasi natə kərari ku ɓwa amma kutari tsu hadlu.

⁹Israila aɗi nggaɓəla abbər mətəpiyayeri akwa səm dunari wa. Nggədza shishir kərari akwa ngka mwapu, amma shang tsa aɗi nggaɓəla wa.

¹⁰Hirkər tə mjir Israila kəgari ni akwa shinangkərdzi ala ɗa. Amma ata kəra shanga su nayeri ni da aɗi ngka adzə MTHLAKU na Hyelər ɗa wa, wala bara ka tsa dlar ɗa wa.

¹¹Mjir Israila ku ndzi kəgaɓu apa bukəl twangtwang, da ana hara su kula dzama. Ntangkəma da mwari ahar Masar kamnyar bara dlara, aghəla nda da hwi mwari ahar Assiriya!

¹²Amma təng tə da tsu ata laku I ata psəghəi banggamar na ata kəra ɗa, kəi ngkəi ɗa apa ɗikayeri. I ata ɗi ɗa kamnyar suayeri na ɗimi ɗimi tə da ana hara.”

¹³“Sha ku wutə ɗa! Da ku hara kər ɓəɓalkur ali ka təra kazhar ra, antə mda ata kurəmta ɗa. I ku bara kəi mbantə ɗa, amma da ana thlandər ata kəri.

¹⁴Da aɗi ana kiɗə su akəli ka jirkur wa. Təng da ana ndzəndzi ata dəkəlayeri arɗa ka tuwa ka kuraku. Ma sakatə da akwa kiɗə mthli ka yimər anap, da ana thləthla dza ɗa apatə mjir nu haptu ana hara.

¹⁵Wala tə I an kəlantə ɗa ka namtə ɗa ɓəɓal, da ku ɗəmhə ɗimikur ata kəri.

¹⁶Da aɗi ana dzamər bara Hyel na ka Səli ta Shang wa. Da ana hara su mbalmbalari apa lali na ana shi su wa. Antə dawayeri ata kurəmta mji ol'olər ɗa kamnyar tə da ana gari ka ruta. Antə mjir Masar ata sə kumshi ɗa.”