Read bura-pabir Hoseya 8 Bible Online

Hoseya 8 - bura-pabir bible

Hoseya 8

¹MTHLAKU pəla, “Putə giri tsiya giri ata mnya giri ka giri tsa ləlu! Dawayeri akwa səghəi ata kəra mjirna apa dukwayeri! Mjirna ku ɓəli alkawal tə yeru mbwi kəga da, ka nggəlar surthlipərna.

²Wala apani da akwa tuwa ali ka pəla abbər I an Hyelər ɗa ka tsuwa da asəndə ra nggwa!

³Amma da ku kurtə nggəlar su na ɓɗaku, antə kulini dawayeri arɗa ata kədlə ɗa.”

⁴“Mjirna ku putə kuthlyayeri, amma da aɗi yu ra akwa wa. Da ku putə mji ol'olər ɗa kula da pəla ali. Da fata adzərfa ka dinar arɗa ka namtə haptayeri na ata ndəkərəngkər ala ɗa asar.”

⁵“Mjir Samariya, ɗəffi ɓzəɓzari kamnyar haptu ngəni tə giri namta apa kəna ni. Ɗəffi akwa mba ra ata kəra giri. Nawa antə giri ata zhar nu haptu nə ri?

⁶Mdər Israila laga diya an nam ala giri haptu ngəni ka tsiyari, aɗi Hyel mai! Antə mda ata pukthləmta haptə ni ka tsa ndzi miɗiɗi!

⁷“Da ku thləka shambar antə da ata thli kəwal. Fakər mthli tə da thləka ata ndzi ncir kədla daci, kula kər, antə mda aɗi ata wutə susəma ata wa. Wala ma da an pu munya, mjir tsəɗi damwa an ata səməmnyari.

⁸Mdə ku kuri ka mjir Israila. Antə kulini da ku ndzi apa mjir tsəɗi damwa, ka ndzi apa su na kula ampani.

⁹Da ku mwari ahar Assiriya kamnyar təpa sojayeri arɗa ka da sə dlar ɗa. Da ndzi apa kwaramtaku na ana kadlə shini. Mjir Israila ku ɗələmta kərɗa aka pazhayeri arɗa.

¹⁰Amma wala tə da ku ɗələmta kərɗa akwa tsəɗiyayeri, I ata tsaptə ɗa ata kəma duku kəi ɗi ɗa. Aɗi ata fəi wa da ata thlarəmtadzi ma sakatə kuthlir Assiriya ka mji ol'ola ku baɗitə na ɗa bwani.”

¹¹“Mjir Israila ku həntə bagaɗiyayeri hang ar hamta saɗakar tifəmta biku, amma da ku ndzi vəi hara biku!

¹²Wala tə I ku hamta ala ɗa shanga tsawayeri, da namta apa mda aɗi nam tsawayeri ni kamnyar ɗa wa.

¹³Mjir Israila hir hamta ali saɗakar mwaɓi ka ɓɗə kumari, amma saɗakayeri ni aɗi ana kəs kəri I na MTHLAKU wa. I ata vu ka da ɗar bwani kamnyar bikayeri arɗa, kəi ngka ka da ahar Masar.”

¹⁴“Mjir Israila ku həntə kəi kuthlikurayeri, tsuwa Yahuda ku latə bərniyayeri na ka duna, amma da ku fwari mdə na həntə ɗa. Antə I ata thlentə u'u na ata mbamta kəi kuthlikurayeri arɗa ka bərniyayeri na ka duna ni.”